കനയ്യയും ജിഗ്നേഷ് മേവാനിയും സെപ്റ്റംബര്‍ 28ന് കോണ്‍ഗ്രസിലെത്തുമെന്ന് റിപ്പോർട്ട്

ന്യൂഡൽഹി: സിപിഐ നേതാവും ജെഎൻയു മുൻ വിദ്യാർഥി യൂണിയൻ പ്രസിഡൻ്റുമായ കനയ്യ കുമാറും ഗുജറാത്ത് എംഎൽഎയും ദളിത് അധികർ മഞ്ച് കൺ വീനറുമായ ജിഗ്നേഷ് മേവാനിയും വൈകാതെ കോൺഗ്രസിൽ എത്തുമെന്ന് റിപ്പോർട്ട്. സെപ്റ്റംബർ 28ന് ഇരുവരും കോൺഗ്രസ് ചേരുമെന്ന് ദേശീയ മാധ്യമങ്ങൾ റിപ്പോർട്ട് ചെയ്തു. എന്നാൽ ഇക്കാര്യത്തിൽ കോൺഗ്രസ് നേതൃത്വം സ്ഥിരീകരണം നടത്തിയിട്ടില്ല.



‘കണ്ണിൽ പൊടിയിടുന്നു’; ജിഎസ്ടി വന്നാലും പെട്രോൾ വില കുറയില്ലെന്ന് മന്ത്രി; ‘സെസ് ഒഴിവാക്കിയാൽ മതി’

കോൺഗ്രസ് നേതാവ് രാഹുൽ ഗാന്ധിയുമായി ഇരുവരും കഴിഞ്ഞ ദിവസം കൂടിക്കാഴ്ച നടത്തിയിരുന്നു. കനയ്യയെയും മേവാനിയെയും പാർട്ടിയിലേക്ക് എത്തിക്കുന്നതിൽ രാഹുലിന് എതിർപ്പില്ല. നിലവിൽ സിപിഐ ദേശീയ എക്സിക്യൂട്ടീവ് അംഗമായ കനയ്യ കുമാർ കോൺഗ്രസിൽ എത്തുന്നത് യുവാക്കളെ കോൺഗ്രസിലേക്ക് ആകർഷിക്കാൻ കാരണമാകുമെന്ന നിഗമനത്തിലാണ് കോൺഗ്രസുള്ളത്.

ബിജെപിക്കെതിരെ ദേശീയ തലത്തിൽ യുവനേതാക്കളെ അണിനിരത്താൻ കനയ്യയുടെ വരവ് സഹായമാകുമെന്ന വിലയിരുത്തലും കോൺഗ്രസിനുണ്ട്. കനയ്യയെ ഒപ്പം കൂട്ടുന്നതിൽ ബിഹാറിൽ കോൺഗ്രസിന്റെ ഘടകകക്ഷിയായ ആര്‍ജെഡിയുടെ നിലപാട് നിര്‍ണായകമാകും. സിപിഐ ദേശീയ എക്സിക്യൂട്ടീവ് അംഗമായ കനയ്യ കുമാര്‍ പാര്‍ട്ടിയിൽ അതൃപ്തനാണെന്നാണ് റിപ്പോര്‍ട്ടുകള്‍. അതേസമയം, സിപിഐ ജനറൽ സെക്രട്ടറി ഡി രാജ കഴിഞ്ഞ ദിവസം കനയ്യയെ കാണുകയും അദ്ദേഹം പാർട്ടി വിടില്ലെന്ന് വ്യക്തമാക്കുകയും ചെയ്തിരുന്നു.

പഞ്ചാബ് മുഖ്യമന്ത്രി അമരീന്ദർ സിങ് രാജിവച്ചു

കനയ്യയെ കോൺഗ്രസിൽ എത്തിക്കാനായാൽ ബിഹാറിൽ കോൺഗ്രസിന് കൂടുതൽ സ്വീകാര്യത ലഭിക്കുമെന്ന നിലപാടാണ് തെരഞ്ഞെടുപ്പ് തന്ത്രജ്ഞൻ പ്രശാന്ത് കിഷോറിനുള്ളത്. ഗുജറാത്തിലെ ദളിത് നേതാവായ ജിഗ്നേഷ് മേവാനി മികച്ച ജന പിന്തുണയുള്ള യുവമുഖമാണെന്ന വിലയിരുത്തലാണ് കോൺഗ്രസിനുള്ളത്. അടുത്ത വര്‍ഷം നടക്കാനിരിക്കുന്ന ഗുജറാത്ത് നിയമസഭാ തെരഞ്ഞെടുപ്പിൽ ജിഗ്നേഷ് മേവാനിയുടെ വരവ് ഗുണം ചെയ്യുമെന്നാണ് റിപ്പോർട്ട്. 2017 ലെ നിയമസഭാ തെരഞ്ഞെടുപ്പിൽ കോൺഗ്രസ് അദ്ദേഹവുമായി സഹകരിച്ചിരുന്നു. കഴിഞ്ഞ വര്‍ഷം മേവാനിയെ സഹായിക്കുന്നതിന്റെ ഭാഗമായി കോൺഗ്രസ് വഡ്ഗാം മണ്ഡലത്തിൽ സ്ഥാനാര്‍ത്ഥിയെ രംഗത്തിറക്കിയിരുന്നില്ല.