സഭയുടെ ആത്മീയ തലവൻ 16 ക്രിമിനൽ കേസുകളിലെ ഒന്നാം പ്രതി; കർദ്ദിനാൾ ആലഞ്ചേരി രാജിവെച്ച് മാറി നിൽക്കണം; സഭാ സുതാര്യ സമിതി

കൊച്ചി: സിറോ മലബാർ സഭ എറണാകുളം-അങ്കമാലി രൂപതയുടെ ഭൂമി ഇടപാടിൽ കർദ്ദിനാൾ മാർ ജോർജ്ജ് ആലഞ്ചേരിക്കെതിരെ സർക്കാർ അന്വേഷണം പ്രഖ്യാപിച്ച സാഹചര്യത്തിൽ കർദ്ദിനാൾ രാജിവെച്ച് മാറി നിൽക്കണമെന്ന് സഭാ സുതാര്യ സമിതി. പൊതു സമൂഹത്തിൽ വിശ്വാസികളെ ഇനിയും അപമാനിക്കാതെ രാജിവെയ്ക്കണമെന്നാണ് സമിതിയുടെ ആവശ്യം.



കോടികളുടെ ഭൂമിയിടപാട്: കർദിനാൾ മാർ ആലഞ്ചേരിക്കെതിരെ അന്വേഷണം പ്രഖ്യാപിച്ച് സർക്കാർ

16 ക്രിമിനൽ കേസുകളിലെ ഒന്നാം പ്രതിയാണ് ക്രിസ്തീയ സഭയുടെ ആത്മീയ തലവൻ എന്നുള്ളത് വിശ്വാസികളെ സംബന്ധിച്ച് അപമാനകരമാണ്. എന്നാൽ കർദ്ദിനാൾ ഇതും ഒരു അഭിമാനമായി കൊണ്ടുനടക്കുകയാണെന്ന് സഭാ സുതാര്യ സമിതി കുറ്റപ്പെടുത്തി.

അതേസമയം ഹൈക്കോടതി ഉത്തരവിന്റെ പശ്ചാത്തലത്തിലാണ് മാർ ജോർജ്ജ് ആലഞ്ചേരിക്കെതിരെ സർക്കാർ അന്വേഷണം പ്രഖ്യാപിച്ചിരിക്കുന്നത്. ലാൻഡ് റവന്യൂ അസിസ്റ്റൻ്റ് കമ്മിഷണറുടെ നേതൃത്വത്തിൽ ഏഴംഗ സമിതിയാകും അന്വേഷണം നടത്തുക. സഭാ നടത്തിയ ഭൂമിയിടപാടിൽ സർക്കാർ ഭൂമി ഉണ്ടോ എന്നാകും പ്രധാനമായും അന്വേഷിക്കുക. തണ്ടപ്പേരു തിരുത്തിയോ എന്നും അന്വേഷിക്കും. ഈ ഇടപാടിൽ സർക്കാർ ഉദ്യോഗസ്ഥർക്ക് പങ്കുള്ളതായുള്ള ആരോപണത്തിലും അന്വേഷണം നടക്കും.

എറണാകുളം അങ്കമാലി അതിരൂപതയുടെ ഉടമസ്ഥതയിലുള്ള കാക്കനടുള്ള 60 സെൻ്റ് ഭൂമി വിൽപ്പന നടത്തിയതിലൂടെ സഭയ്ക്ക് ലക്ഷണങ്ങളുടെ നഷ്ടം ഉണ്ടായെന്നും സഭയുടെ വിവിധ സമിതികളിൽ ആലോചിക്കാതെയാണ് ഭൂമി ഇടപാട് നടത്തിയതെന്നുമാണ് കേസ്.

സാമൂഹ്യ തിന്മകൾക്ക് മതത്തിന്റെ നിറം നൽകുന്നത് മുളയിലേ നുള്ളണം: മുഖ്യമന്ത്രി

വിവാദ ഭൂമിയിടപാടിൽ തനിക്കെതിരായ എട്ട് കേസുകളും റദ്ദാക്കണമെന്നാവശ്യപ്പെട്ട് കർദിനാൾ ഹൈക്കോടതിയെ സമീപിച്ചിരുന്നു. എന്നാൽ വിചാരണ നേരിടണമെന്ന നിലപാടാണ് ഹൈക്കോടതിയുടെ ഭാഗത്ത് നിന്നുമുണ്ടായത്. കേസിൽ വിദഗ്ധ സമിതി അന്വേഷണം നടത്തണമെന്നും ഹൈക്കോടതി നിർദേശം നൽകിയിരുന്നു.