കഴുത്തിലെ കറുപ്പ് പലരേയും അലട്ടുന്ന ഒരു പ്രധാന പ്രശ്‌നമാണ്. ചിലപ്പോള്‍ കഴുത്തിന് ചുറ്റും ബെല്‍റ്റു പോലെ കറുത്ത മാര്‍ക്ക് പലര്‍ക്കും ഉണ്ടാകും. ഇത് പോകാന്‍ അത്ര എളുപ്പവുമാകില്ല. സൂര്യന്റെ അൾട്രാവയലറ്റ് രശ്മികൾ ചർമ്മത്തിൽ അടിക്കുന്നത് മൂലവും ഇത് സംഭവിക്കാം. പരിസ്ഥിതി മലിനീകരണം, രാസവസ്തുക്കൾ നിറഞ്ഞ ചർമ്മസംരക്ഷണ ഉൽ‌പന്നങ്ങളുടെ അമിത ഉപയോഗം എന്നിവയെല്ലാം കഴുത്തിലെ കറുപ്പ് നിറത്തിന് കാരണമാകാം. പലര്‍ക്കും ഇത് എടുത്തു കാണിയ്ക്കുകയും ചെയ്യും. സാധാരണ നമ്മൾ ഫേഷ്യലുകളും മറ്റും ചെയ്യുമ്പോൾ മുഖത്തിന് മാത്രമാണ് കൂടുതൽ ശ്രദ്ധ നൽകാറുള്ളത്. കഴുത്തിന് ഭാഗത്തെ പലപ്പോഴും അവഗണിക്കാറാണ് പതിവ്. ഇതിനു പരിഹാരമായി വീട്ടില്‍ തന്നെ ചെയ്യാവുന്ന പല പരിഹാര വഴികളുമുണ്ട്. ഇത്തരത്തില്‍ ഒന്നിനെ കുറിച്ചറിയൂ.

പുളി

ഇതിനായി മൂന്നു സ്റ്റെപ്പില്‍ ഒരു പ്രത്യേക ബ്ലീച്ചിംഗ് ആന്റ് പായ്ക്ക് വേണം. ഇതിനായി വേണ്ട ചേരുവകള്‍ പുളി, പഞ്ചസാര, കാപ്പിപ്പൊടി, തക്കാളി, തൈര്, അരിപ്പൊടി, ഗോതമ്പുപൊടി എന്നിവയാണ്. പുളി നല്ലൊരു ബ്ലീച്ചിംഗ് ഇഫക്ട് നല്‍കുന്ന വസ്തുവാണ്.വാളന്‍ പുളിയ്ക്ക് ബ്ലീച്ചിംഗ് ഇഫക്ടുണ്ട്. ഇതാണ് നിറം നല്‍കാന്‍ സഹായിക്കുന്നത്. തികച്ചും സ്വാഭാവിക ചേരുവപയായതിനാല്‍ ദോഷവും വരുന്നില്ല. ഇതിലെ ഹൈഡ്രോക്‌സി ആഡിഡാണ് ഈ ഗുണം നല്‍കുന്നത്. പല ചര്‍മ പ്രശ്‌നങ്ങള്‍ക്കുമുള്ള നല്ലൊരു മരുന്നു കൂടിയാണ് വാളന്‍ പുളി.

തൈര്

മൂന്നാമത്തെ സ്റ്റെപ്പിനായി ഉപയോഗിയ്ക്കുന്ന അരിപ്പൊടി, ഗോതമ്പു പൊടി, തൈര് എന്നിവയും സൗന്ദര്യ ഗുണങ്ങളില്‍ മികച്ചു നില്‍ക്കുന്നവയാണ്. ആരോഗ്യ സംരക്ഷണത്തില്‍ മാത്രമല്ല, സൗന്ദര്യ സംകക്ഷണത്തിലും മികച്ചതാണ് തൈര്. ചര്‍മത്തിന് ഈര്‍പ്പം നല്‍കുന്ന, ചര്‍മത്തിലെ ചുളിവുകള്‍ അകറ്റുന്ന, പ്രോട്ടീന്‍ ഗുണം നല്‍കുന്ന ഒന്നാണിത്. . ലാക്ടിക് ആസിഡ് അടങ്ങിയ ഇത് നല്ലൊരു ബ്ലീച്ചിംഗ് ഇഫക്ടാണ് നല്‍കുന്നത്.തൈരിൽ സമ്പുഷ്ടമായി അടങ്ങിയിരിക്കുന്ന കൊഴുപ്പ് ചർമ്മത്തിലെ ഈർപ്പം നിലനിർത്തുവാൻ സഹായിക്കും, ഇത് വളരെനേരം ചർമ്മത്തിൽ ജലാംശം നിലനിർത്തുന്നു. ചർമ്മത്തിലെ കരുവാളിപ്പ്, മങ്ങൽ, നിറവ്യത്യാസം എന്നിവ പരിഹരിക്കാനും ഇത് സഹായിക്കുന്നു.

തക്കാളി

ഇതില്‍ അടുത്ത സ്‌റ്റെപ്പിനായി ഉപയോഗിയ്ക്കുന്ന തക്കാളി, കാപ്പിപ്പൊടി, പഞ്ചസാര എന്നിവയും സൗന്ദര്യപരമായ പല ഉപയോഗങ്ങളും ഉള്ളതാണ്. ചര്‍മം വൃത്തിയാക്കാനുള്ള ഒരു സ്വാഭാവിക ക്ലൻസറാണ് തക്കാളി നീര് . ഇത് ബ്ലീച്ചിംഗിന്റെ ഫലം ചെയ്യുമെന്നാണ് ആരോഗ്യ വിദഗ്ദർ പറയുന്നത്. പലപ്പോഴും വേനൽക്കാലത്ത് സൂര്യനിൽ നിന്നേൽക്കുന്ന ചൂട് കാരണം മുഖത്തെ ചര്‍മം കരുവാളിക്കാറുണ്ട്. ഇതില്ലാതാക്കാൻ തക്കാളി നീര് ഉപയോഗിക്കാവുന്നതാണ്. മുഖത്തെ കരുവാളിപ്പു മാറാനും മുഖത്തിന് നിറം വയ്ക്കാനുമെല്ലാം ഇതേറെ നല്ലതാണ്. പല സൗന്ദര്യ പ്രശ്‌നങ്ങള്‍ക്കുമുള്ള പരിഹാരമാണ് കാപ്പിപ്പൊടി. ഇതു പോലെ പഞ്ചസാര നല്ലൊരു സ്‌ക്രബറും കൂടിയാണ്

ഇതു ചെയ്യാന്‍

ഇതു ചെയ്യാന്‍ ആദ്യം പുളി അല്‍പം വെള്ളമൊഴിച്ച് പേസ്റ്റാക്കുക. ഇത് കഴുത്തില്‍ വച്ച് നല്ലതു പോലെ സ്‌ക്രബ് ചെയ്യണം. അല്‍പനേരം ഇതു ചെയ്യണം. ശേഷം തുടച്ചു മാറ്റുക. പിന്നീട് പകുതി തക്കാളി കാപ്പിപ്പൊടിയിലും പഞ്ചസാരയിലും മുക്കി ഇതു വച്ച് അല്‍പനേരം കഴുത്തിലെ കരുവാളിപ്പില്‍ സ്‌ക്രബ് ചെയ്യണം. ഇത് ചെയ്തു കഴിഞ്ഞ് തുടച്ചു മാറ്റുക. പിന്നീട് തൈര്, ഗോതമ്പു പൊടി, അരിപ്പൊടി എന്നിവ ചേര്‍ത്തിളക്കി പേസ്റ്റാക്കുക. ഇത് കഴുത്തില്‍ പുരട്ടി ഉണങ്ങുമ്പോള്‍ കഴുകാം. കഴുത്തിലെ കരുവാളിപ്പിന് ഇത് നല്ല മരുന്നാണ്.