സെല്‍ഫി എടുക്കുന്നതിനിടെ നദിയില്‍ വീണു; അമ്മയും 12 വയസുള്ള മകനും മരിച്ചു

മണാലി: സെൽഫി എടുക്കുന്നതിനിടെ കാൽവഴുതി നദിയിൽ വീണ് അമ്മയും മകനും മരിച്ചു. ഹിമാചൽപ്രദേശിലെ മണാലിയ്ക്കടുത്താണ് അപകടമുണ്ടായത്. ഡൽഹി സ്വദേശികളാണ് അപകടത്തിൽപ്പെട്ടതെന്ന് ഇംഗ്ലീഷ് വാർത്താ ചാനലായ ടൈംസ് നൗവാണ് റിപ്പോർട്ട് ചെയ്തത്.

ചൊവ്വാഴ്ച രാവിലെ ഭാംഗ് പ്രദേശത്താണ് അപകടമുണ്ടായത്. പാറയുടെ മുകളിൽ നിന്ന് സെൽഫി എടുക്കാൻ ശ്രമിക്കുന്നതിനിടെ കാൽവഴുതി ഇരുവരും ബിയാസ് നദിയിലേക്ക് വീഴുകയായിരുന്നെന്നാണ് റിപ്പോർട്ട്. പ്രീതി ഭാസിനും മകൻ പുൾകിത് ഭാസിനുമാണ് മരിച്ചതെന്ന് തിരിച്ചറിഞ്ഞതായി പോലീസ് പറഞ്ഞു. മരിച്ച കുട്ടിയ്ക്ക് 12 വയസ് മാത്രമാണ് പ്രായം.

Also Read : പാർട്ടിയിലെത്തിയതിന് പിന്നാലെ പിഎസ് പ്രശാന്തിന് ആദ്യ പദവി നൽകി സിപിഎം; ഇനി കർഷകസംഘം ജില്ലാ വൈസ് പ്രസിഡന്‍റ്



ഡൽഹിയിൽ നിന്ന് മണാലിയിലേക്കെത്തിയ ഇവർ പ്രദേശത്തെ ഒരു ഹോട്ടലിലാണ് കഴിഞ്ഞിരുന്നത്. അമ്മയും മകനും കാൽവഴുതി വീഴുന്നത് കണ്ട ഹോട്ടലിലെ ഒരു ജീവനക്കാരന്‍ ഇവരെ രക്ഷിക്കാനായി പുഴയിലേക്ക് എടുത്ത് ചാടിയെങ്കിലും ശ്രമം വിജയിച്ചില്ല. പുഴയിലേക്ക് ചാടിയതിനെ തുടര്‍ന്ന് ഇയാള്‍ക്കും പരിക്കേറ്റിട്ടുണ്ട്.

രവി എന്ന ജീവനക്കാരനാണ് അമ്മയെയും മകനെയും രക്ഷിക്കാൻ പുഴയിലേക്ക് ചാടിയത്. ഇയാളുടെ ശ്രമം പരാജയപ്പെട്ടതോടെ ഇവർ പോലീസിനെ വിവരം അറിയിക്കുകയായിരുന്നു. തുടർന്ന് സ്ഥലത്തെത്തിയ ഉദ്യോഗസ്ഥർ പ്രദേശ വാസികളുടെ സഹായത്തോടെയാണ് രക്ഷാപ്രവർത്തനം നടത്തിയത്.

Also Read : പാലാ ബിഷപ്പ് ആത്മപരിശോധന നടത്തണം; കേരളത്തെ വീണ്ടും ഭ്രാന്താലയമാക്കേണ്ടതുണ്ടോയെന്ന് കാനം



തെരച്ചിലിനൊടുവിൽ സംഭവസ്ഥലത്തിന് നാല് കിലോമീറ്റർ താഴെ നിന്ന് ഇരുവരുടെയും മൃതദേഹം പോലീസ് കണ്ടെടുത്തു. മൃതദേഹങ്ങള്‍ പോസ്റ്റുമോർട്ടത്തിനായി മണാലിയിലെ ആശുപത്രിയിലേക്ക് അയച്ചതായും ഇതിനു ശേഷം കുടുംബത്തിന് കൈമാറുമെന്നും സബ്ഡിവിഷണൽ പോലീസ് ഓഫീസർ സഞ്ജീവ് കുമാർ പറഞ്ഞു.

Also Read : സൗമ്യയെ പ്രണയിച്ചത് പ്ലസ് വണ്ണിൽ; വെള്ളാപ്പള്ളി പറഞ്ഞത് വർഗീയത, പള്ളിയിലെ വിവാഹത്തിന് ഇരുകുടുംബങ്ങളും സമ്മതിച്ചിരുന്നെന്ന് സന്തോഷ്