കാര്‍ വാടക കുത്തനെ കുറയും
കാര്‍ റെന്റല് കമ്പോളത്തിലേക്ക് നിസ്സാര വാടകയുമായി ആമസോണ്‍ ഇറങ്ങുന്നതോടെ കാര്‍ വാടക വലിയ തോതില്‍ കുറയുമെന്ന് മേഖലയില്‍ പ്രവര്‍ത്തിക്കുന്നവര്‍ അഭിപ്രായപ്പെട്ടു. ഉപഭോക്താക്കളെ സംബന്ധിച്ചിടത്തോളം ഇത് വലിയ നേട്ടമാവും. അതേസമയം, ഈ മേഖലയിലെ ചെറിയ കമ്പനികള്‍ക്ക് ആമസോണിനോട് മല്‍സരിച്ച് പിടിച്ചു നില്‍ക്കാന്‍ പറ്റാത്ത സ്ഥിതി വരുമെന്നും വിലയിരുത്തപ്പെടുന്നുണ്ട്. അതേസമയം, ഓണ്‍ലൈന്‍ സേവനം അത്ര ശക്തമല്ലാത്ത ചെറുകിട കമ്പനികള്‍ക്ക് ആമസോണ്‍ വഴി കൂടുതല്‍ ഉപഭോക്താക്കളിലേക്ക് എത്തിച്ചേരാന്‍ സാധിക്കുമെന്നത് വലിയ നേട്ടമാകും. എന്നാല്‍ ഇത്ര ചെറിയ വാടകയ്ക്ക് ബിസിനസ് നിലനിര്‍ത്തി കൊണ്ടുപോവാന്‍ സാധിക്കുമോ എന്നതാണ് ചോദ്യചിഹ്നമായി അവശേഷിക്കുന്നത്.
നിസാന്‍ സണ്ണിക്ക് മാസ വാടക 1416 ദിര്‍ഹം
നിലവിലെ മറ്റ് റെന്റ് എ കാര്‍ കമ്പനികളെ അപേക്ഷിച്ച് കുറഞ്ഞ വാടയ്ക്കാണ് ആമസോണ്‍ കാറുകള്‍ ഓഫര്‍ ചെയ്യുന്നത്. കിയ പിക്കാന്റോ തുടങ്ങിയ ഹാച്ച്ബാക്ക് കാറുകള്‍ക്ക് 74 ദിര്‍ഹമാണ് ദിവസ വാടക ഈടാക്കുക. മാസക വാടക 1322 ദിര്‍ഹം. നിസാന്‍ സണ്ണി പോലുള്ള സെഡാന്‍ കാറുകള്‍ക്ക് ദിവസം 84 ദിര്‍ഹമും മാസം 1416 ദിര്‍ഹമുമാണ് ആമസോണ്‍ പരസ്യം ചെയ്യുന്ന വാടക. ദുബായ് ആസ്ഥാനമായി പ്രവര്‍ത്തിക്കുന്ന ഇസയര്‍ കാര്‍ റെന്റല് കമ്പനിയുമായി സഹകരിച്ചാണ് ആമസോണിന്റെ പ്രവര്‍ത്തനം. ഇസയര്‍ ഇതിനേക്കാള്‍ അല്‍പം ഉയര്‍ന്ന വാടകയാണ് ഉപഭോക്താക്കളില്‍ നിന്ന് നിലവില്‍ ഈടാക്കുന്നത്.
ആമസോണിന് ഡിപ്പോസിറ്റ് ആവശ്യമില്ല
ആസമോണിന്റെ ഹോം സര്‍വീസസ് ഓഫര്‍ പ്രകാരം കാറുകള്‍ ഉപഭോക്താക്കള്‍ക്ക് എത്തിച്ച് നല്‍കുകയും ഉപയോഗം കഴിഞ്ഞാല്‍ ആമസോണില്‍ നിന്ന് ആള്‍ വന്ന് തിരികെ കൊണ്ടുപോവുകയും ചെയ്യും. കാര്‍ വാടകയ്‌ക്കെടുക്കുമ്പോള്‍ ഡെപ്പോസിറ്റ് തുക നല്‍കേണ്ടതില്ലെന്നതാണ് ഓഫറുകളില്‍ പ്രധാന ആകര്‍ഷണം. ഓര്‍ഡര്‍ ചെയ്ത് മൂന്ന് മണിക്കൂറിനകം ഉപഭോക്താവ് ആവശ്യപ്പെടുന്ന കാര്‍ വീട്ടില്‍ നേരിട്ട് എത്തിക്കാനാണ് പദ്ധതിയെന്ന് ആമസോണിന്റെ മിഡിലീസ്റ്റ് ജനറല്‍ മാനേജര്‍ അമീന്‍ മംലൂക്ക് പറഞ്ഞു. മറ്റു കാര്‍ റെന്റല് കമ്പനികളും ഈ രീതിയിലുള്ള ഇളവുകളും സൗകര്യങ്ങളും ഉപഭോക്താക്കള്‍ക്ക് നല്‍കാന്‍ ഇതോടെ നിര്‍ബന്ധിതരായിരിക്കുകയാണ്. അതേസമയം, ആമസോണിന്റെ വരവിനെ സ്വാഗതം ചെയ്തിരിക്കുകയാണ് യുഎഇയിലെ കാര്‍ റെന്റല് സ്ഥാപനങ്ങള്‍.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : amazon home services launches online car rentals in uae
Malayalam News from malayalam.samayam.com, TIL Network
