സെപ്റ്റംബറില്‍ 166.6 മില്ലിലിറ്റര്‍ എന്ന തോതിലാണ് സാധാരണയായി മഴ പെയ്യാറ്. പക്ഷെ, ഇത്തവണ 223 മില്ലിലിറ്ററാണ് സെപ്റ്റംബറിലെ മഴ. 1994ന് ശേഷമുള്ള മികച്ച മഴയാണ് ഇതെന്ന് കാലാവസ്ഥാ വകുപ്പ് ഡയറക്ടര്‍ ജനറല്‍ മൃത്യുജ്ഞയ് മൊഹാപത്ര ടൈംസ് ഓഫ് ഇന്ത്യയോട് പറഞ്ഞു. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദങ്ങളും കാലാവസ്ഥാ മാറ്റങ്ങളുമാണ് സെപ്റ്റംബറില്‍ മണ്‍സൂണ്‍ സജീവമാവാന്‍ സഹായിച്ചത്.
1961-2010 കാലത്ത് തെക്കു പടിഞ്ഞാറന്‍ മണ്‍സൂണില്‍ ശരാശരി 88 സെന്റിമീറ്റര്‍ മഴ പെയ്തിരുന്നു. സെപ്റ്റംബറിലെ മഴയോടെ ഈ വര്‍ഷത്തെ മഴയുടെ അളവ് 87 സെന്റിമീറ്ററായി ഉയര്‍ന്നു. സെപ്റ്റംബറില്‍ അവസാനിക്കേണ്ടതാണെങ്കിലും തെക്കു പടിഞ്ഞാറന്‍ മണ്‍സൂണ്‍ അല്‍പ്പ ദിവസം കൂടി തുടരാനുള്ള സാധ്യതയുണ്ടെന്നാണ് കാലാവസ്ഥാ ശാസ്ത്രജ്ഞരുടെ കണക്കുകുട്ടല്‍. ചിലപ്പോള്‍ ഒക്ടോബര്‍ ആദ്യവാരം വരെ തുടര്‍ന്നേക്കാം. നിലവില്‍ കുറവുള്ള ഒരു ശതമാനം മഴ നേടാന്‍ ഈ സമയം സഹായിക്കും.
ആഗസ്റ്റിന്റെ നേര്‍ വിപരീതമായ സ്വഭാവമാണ് സെപ്റ്റംബര്‍ കാണിച്ചതെന്ന് കാലാവസ്ഥാ വകുപ്പിലെ ശാസ്ത്രജ്ഞനായ ഡി.എസ് പൈ പറയുന്നു. ബംഗാള്‍ ഉള്‍ക്കടലിലുണ്ടായ ന്യൂനമര്‍ദ്ദവും വടക്ക് പടിഞ്ഞാറന്‍ പസിഫിക്കിലെ മാറ്റങ്ങളുമാണ് മഴ കൂടാന്‍ സഹായിച്ചത്. ആഗസ്റ്റില്‍ ഇത്തരം മാറ്റങ്ങള്‍ പ്രകൃതിയിലുണ്ടായിരുന്നില്ല. ന്യൂനമര്‍ദ്ദത്തിന്റെ ശേഷിപ്പുകള്‍ പടിഞ്ഞാറന്‍ തീരത്തേക്ക് പോയിക്കൊണ്ടിരിക്കുകയാണ്. ഇത് ഗുജറാത്ത് പോലുള്ള പടിഞ്ഞാറന്‍ സംസ്ഥാനങ്ങളില്‍ മഴ കൂടാന്‍ കാരണമാവുമെന്നും അദ്ദേഹം കൂട്ടിച്ചേര്‍ത്തു.
ഏറ്റവുമധികം മഴ കോട്ടയത്ത്
തെക്കു പടിഞ്ഞാറന്‍ മണ്‍സൂണില്‍ കേരളത്തില്‍ ഏറ്റവുമധികം മഴ പെയ്തത് കോട്ടയം ജില്ലയിലാണ്. ആലപ്പുഴ, എറണാകുളം ജില്ലകളില്‍ മഴ കുറഞ്ഞെന്നും റിപ്പോര്‍ട്ടുകള്‍ പറയുന്നു. പത്തനംതിട്ട ജില്ലയില്‍ നേരിയ വര്‍ധനയുണ്ടായി.
കേരളത്തില്‍ പ്രധാനമായും മഴ ലഭിക്കുന്നത് ജൂണ്‍ മുതല്‍ സെപ്റ്റംബര്‍ അവസാനം വരെയുള്ള തെക്കു പടിഞ്ഞാറന്‍ മണ്‍സൂണ്‍ അഥവാ കാല വര്‍ഷത്തിലൂടെയാണ്. ഒക്ടോബര്‍ മുതല്‍ ഡിസംബര്‍ വരെയുള്ള കാലത്താണ് വടക്ക് കിഴക്കന്‍ മണ്‍സൂണ്‍.
ജൂണ്‍ മുതല്‍ സെപ്റ്റംബര്‍ വരെയുള്ള തെക്ക് പടിഞ്ഞാറന്‍ കാലവര്‍ഷത്തിലാണ് കൂടുതല്‍ മഴ പെയ്യുക. മഴയുടെ 60-75 ശതമാനം ഇതിലൂടെയാണ് ലഭിക്കുക. കേരളത്തിന്റെ തെക്കന്‍മേഖലയില്‍ 70-100 സെന്റിമീറ്റര്‍ വരെ മഴ ലഭിക്കും. വടക്കന്‍ മേഖലയില്‍ ഇത് 250-300 സെന്റിമീറ്റര്‍ ആവും. പശ്ചിമഘട്ടത്തിന്റെ ഉന്നത മേഖലയില്‍ വര്‍ഷപാതം 400 സെന്റിമീറ്റര്‍ കടക്കാറുമുണ്ട്. മഴയില്‍ ഉണ്ടായ വര്‍ധനയാണ് രണ്ടു പ്രളയങ്ങള്‍ക്കു കാരണമായത്.
****
[Compiled by അനീബ് പി.എ]
