സംസ്ഥാനങ്ങള്‍ തയ്യാറാക്കി നല്‍കിയ ആനത്താര പട്ടികയും കേന്ദ്രസര്‍ക്കാരിന്റെ കൈവശമുള്ള പട്ടികയും തമ്മില്‍ പൊരുത്തമില്ലെന്നതാണ് പ്രശ്‌നമെന്ന് വനം മന്ത്രാലയത്തിന് കീഴിലെ പ്രൊജക്ട് എലിഫന്റിലെ ഡോ.പ്രജ്‌ന പാണ്ഡ ഇന്ത്യന്‍ എക്‌സ്പ്രസിനോട് പറഞ്ഞു.
”ആനത്താര എന്താണെന്ന് കൃത്യമായി നിര്‍വചിച്ചത് ഈ വര്‍ഷമാണ്. ആനത്താരകളെ തിരിച്ചറിയാനുള്ള മാര്‍ഗനിര്‍ദേശങ്ങളും തയ്യാറാക്കി കഴിഞ്ഞു. ഇത് ആശയക്കുഴപ്പങ്ങള്‍ ഒഴിവാക്കാന്‍ സഹായിക്കും. ഭൂവിനിയോഗ സ്വഭാവം പരിശോധിക്കുന്നത് ഓരോ ആനത്താരയും സംരക്ഷിക്കാന്‍ എന്തൊക്കെ പദ്ധതികള്‍ നടപ്പാക്കാമെന്ന് തീരുമാനിക്കാനും സഹായിക്കും” ഡോ. പ്രജ്‌ന പാണ്ഡ വിശദീകരിച്ചു.
ആനത്താരകളിലെ പ്രശ്‌നങ്ങള്‍
ആനത്താരകളില്‍ ഗുരുതരമായ ചില മാറ്റങ്ങള്‍ ഉണ്ടാവുന്നുണ്ടെന്നാണ് വനം മന്ത്രാലയത്തിന്റെ വിലയിരുത്തല്‍. വനം മന്ത്രാലയവും വൈല്‍ഡ് ലൈഫ് ട്രസ്റ്റ് ഓഫ് ഇന്ത്യയും സംയുക്തമായി 2005ല്‍ നടത്തിയ പഠനത്തില്‍ രാജ്യത്ത് 88 ആനത്താരകളുണ്ടെന്നാണ് കണ്ടെത്തിയത്. പക്ഷെ, ആനത്താരകളുടെ എണ്ണം 101 ആണെന്നാണ് 2015ലെ പഠനത്തില്‍ ബോധ്യപ്പെട്ടത്.
ആനത്താരകളില്‍ മനുഷ്യരുണ്ടാക്കിയ തടസമാണ് പുതിയ വഴികള്‍ നിര്‍മിക്കാന്‍ ആനകളെ പ്രേരിപ്പിച്ചതെന്ന് വൈല്‍ഡ് ലൈഫ് ട്രസ്റ്റ് ഓഫ് ഇന്ത്യയിലെ സംരക്ഷണ വിഭാഗം മേധാവിയായ ഡോ. സന്ദീപ് കുമാര്‍ തിവാരി പറഞ്ഞു.
മനുഷ്യര്‍ നിര്‍മിക്കുന്ന തടസങ്ങളും മറ്റു പ്രശ്‌നങ്ങളും മൂലം ഒരു പതിറ്റാണ്ടിനുള്ളില്‍ ഏഴ് ആനത്താരകളാണ് ആനകള്‍ ഉപേക്ഷിച്ചത്. അവ കൂടി കണക്കിലെടുക്കുകയാണെങ്കില്‍ മൊത്തം ആനത്താരകളുടെ എണ്ണം 108 ആവും. റോഡ്, റെയില്‍വേ തുടങ്ങിയ അടിസ്ഥാന സൗകര്യ പദ്ധതികളും കൃഷി, തോട്ടം പദ്ധതികളുമാണ് പ്രധാന പ്രശ്‌നമെന്നും ഡോ. സന്ദീപ് കുമാര്‍ തിവാരി ആരോപിക്കുന്നു.
രാജ്യത്തെ ആനത്താരകളിലെ 24 ശതമാനവും പൂര്‍ണമായും വനമായിരുന്നുവെന്നാണ് 2005ലെ രേഖകള്‍ പറയുന്നത്. നിലവില്‍ 12.9 ശതമാനം ആനത്താരകള്‍ മാത്രമേ പൂര്‍ണമായും വനമായുള്ളൂ.
നടപടികള്‍ 18ന് ആരംഭിക്കും
രാജ്യത്ത് ആനകള്‍ ധാരാളമായുള്ള നാലു പ്രദേശത്തെയും ആനത്താരകളാണ് ഉദ്യോഗസ്ഥര്‍ പരിശോധിക്കുക. ഉത്തര്‍പ്രദേശിലെയും ഉത്തരാഖണ്ഡിലെയും വനംവകുപ്പ് ഉദ്യോഗസ്ഥര്‍ക്കും സന്നദ്ധ സംഘടനകള്‍ക്കുമുള്ള ബോധവല്‍ക്കരണ ക്ലാസ് വെള്ളിയാഴ്ച്ച ആരംഭിച്ചു. സമാനമായ ക്ലാസുകള്‍ മറ്റു മേഖലകളിലും നടക്കും. അതിന് ശേഷമായിരിക്കും 18ന് പദ്ധതി ആരംഭിക്കുക.
മുന്‍കാലത്ത് രേഖപ്പെടുത്തിയ പല ആനത്താരകളിലും മനുഷ്യവാസമുണ്ടായിരുന്നുവെന്ന് വനം മന്ത്രാലയത്തിന്റെ രേഖകള്‍ പറയുന്നു.
ചില ആനത്താരകളില്‍ പിന്നീടാണ് മനുഷ്യര്‍ എത്തിയത്. ഇത് ആനകളുടെ സ്വാഭാവിക പാത കൈയ്യേറ്റം ചെയ്യപ്പെടാന്‍ കാരണമായി. ചില ആനത്താരകള്‍ സ്വകാര്യ വ്യക്തികളുടെ ഭൂമിയിലൂടെ കടന്നുപോവുന്നതും പ്രശ്‌നമാണ്. അതിനാല്‍ സ്വകാര്യഭൂമിയിലെ ഭൂവിനിയോഗം നിയന്ത്രിക്കുന്ന രീതിയിലുള്ള വിജ്ഞാപനമായിരിക്കും വനം മന്ത്രാലയം ഇറക്കുക. സ്വകാര്യ ഭൂമിയില്‍ ആനകളുടെ സഞ്ചാര സ്വാതന്ത്ര്യം തടസപ്പെടുത്താത്ത നിര്‍മാണങ്ങളെ അനുവദിക്കൂ.
മനുഷ്യ-ആന സംഘര്‍ഷം
മനുഷ്യരും ആനകളും തമ്മിലുണ്ടായ സംഘര്‍ഷത്തില്‍ 2009-2019 കാലത്ത് 4642 മനുഷ്യരാണ് മരിച്ചത്. 1025 ആനകളും കൊല്ലപ്പെട്ടു. പശ്ചിമബംഗാളില്‍ മാത്രം 821 പേര്‍ മരിച്ചു. രാജ്യത്ത് ഇക്കാലത്ത് 640 ആനകളാണ് ഷോക്കേറ്റ് മരിച്ചത്. ട്രെയിന്‍ തട്ടി 170 ആനകളും വിഷം അകത്ത് ചെന്ന് 62 ആനകളും മരിച്ചതായി വനംമന്ത്രാലയത്തിന്റെ കണക്കുകള്‍ പറയുന്നു.
മനുഷ്യരും ആനകളും തമ്മിലുള്ള സംഘര്‍ഷത്തില്‍ പ്രതിവര്‍ഷം 400-450 പേര്‍ രാജ്യത്ത് മരിക്കുന്നുണ്ടെന്നാണ് വൈല്‍ഡ് ലൈഫ് ട്രസ്റ്റ് ഓഫ് ഇന്ത്യയുടെ കണക്കുകള്‍ പറയുന്നത്. മനുഷ്യരുടെ പ്രതികാരം മൂലം 100ഓളം ആനകളും കൊല്ലപ്പെടുന്നു.
കേരളവും ആനത്താരയും
കേരളത്തിന്റെ അകത്ത് 12 ആനത്താരകളുണ്ടെന്നാണ് കേന്ദ്രം വനം പരിസ്ഥിതി മന്ത്രാലയത്തിന്റെ രേഖകള്‍ പറയുന്നത്. കേരള-കര്‍ണാടക അതിര്‍ത്തിയിലും കേരള-തമിഴ്‌നാട് അതിര്‍ത്തിയിലും ഓരോ ആനത്താരകളുണ്ട്. കേരളത്തിലെ ഭൂരിഭാഗം ആനത്താരകളും നേരത്തെ തന്നെ സുരക്ഷിതമാക്കിയിട്ടുണ്ട്. പേരിയ-കൊട്ടിയൂര്‍ ആനത്താര പാതിവഴിയിലാണെന്ന് ആരോപണമുണ്ട്.
****
[Compiled by അനീബ് പി.എ]
