ഈ പശ്ചാത്തലത്തിലാണ് പഞ്ചാബിന്റെ പാര്‍ട്ടി ചുമതലയുള്ള മുതിര്‍ന്ന നേതാവ് ഹരീഷ് റാവത്തിനെ വീണ്ടും ഡല്‍ഹിയിലേക്ക് വിളിച്ചിരിക്കുന്നത്. പഞ്ചാബില്‍ നടക്കുന്ന രാഷ്ട്രീയ സംഭവവികാസങ്ങള്‍ സസൂക്ഷ്മം നിരീക്ഷിക്കുന്ന വ്യക്തി എന്ന നിലക്ക് ഹരീഷ് റാവത്ത് പഞ്ചാബിലെ കോണ്‍ഗ്രസിന്റെ രാഷ്ട്രീയ ഭാവി എന്താണെന്ന് വ്യക്തമാക്കാന്‍ ബാധ്യസ്ഥനാണെന്നാണ് ഹൈക്കമാന്റ് പറയുന്നത്. മാത്രമല്ല, നിയമസഭാ തെരഞ്ഞെടുപ്പ് നടക്കാന്‍ മാസങ്ങള്‍ മാത്രം ബാക്കി നില്‍ക്കെ പാര്‍ട്ടിക്കുള്ളില്‍ നടക്കുന്ന പ്രശ്‌നങ്ങള്‍ പരിഹരിച്ചില്ലെങ്കില്‍ പഞ്ചാബ് നഷ്ടമാകും എന്ന ഭയവും കോണ്‍ഗ്രസിനുണ്ട്.
ഇവിടെ ശ്രദ്ധിക്കേണ്ട ഒരു കാര്യം, ഹരീഷ് റാവത്തിനെ സംബന്ധിച്ചിടത്തോളം പഞ്ചാബിന് പുറമെ സ്വന്തം സംസ്ഥാനമായ ഉത്തരാഖണ്ഡിനെ കൂടി സംരക്ഷിക്കേണ്ട ഉത്തരവാദിത്വം അദ്ദേഹത്തിനുണ്ട്. നിലവില്‍, പഞ്ചാബിലെ എ.ഐ.സി.സി നേതാവ് എന്നതിന് പുറമെ ഉത്തരാഖണ്ഡിലെ പാര്‍ട്ടിയുടെ തെരഞ്ഞെടുപ്പ് പ്രചാരണ സമിതിയുടെ ചുമതലക്കാരനുമാണ് അദ്ദേഹം. എന്നാല്‍, രണ്ട് സംസ്ഥാനങ്ങളിലേയും പാര്‍ട്ടി ചുമതല ഹരീഷ് റാവത്തറിനെ ഏല്‍പിച്ചതില്‍ ചില അമര്‍ഷങ്ങള്‍ ഉയരുന്നുണ്ട്. അതോടൊപ്പം രണ്ട് സംസ്ഥാനങ്ങളിലേയും രാഷ്ട്രീയ കാര്യങ്ങളില്‍ ശ്രദ്ധ ചെലുത്താന്‍ അദ്ദേഹത്തിന് കഴിയുമോ എന്ന സംശയവും കോണ്‍ഗ്രസ് നേതാക്കള്‍ക്കിടയിലുണ്ട്.
ഉത്തരാഖണ്ഡിലെ ഹരീഷ് റാവത്തിന്റെ അഭാവം കോണ്‍ഗ്രസ് പാര്‍ട്ടിയെ ദോഷകരമായി ബാധിക്കുമെന്നും പഞ്ചാബില്‍ നടക്കുന്ന രാഷ്ട്രീയ പ്രതിസന്ധി, അദ്ദേഹത്തിന്റെ നേതൃത്വ വൈദഗ്ധ്യത്തെ ചോദ്യം ചെയ്യുന്നുണ്ടെന്നും രാഷ്ട്രീയ വിശകലന വിദഗ്ധനായ ഉദിത് ഗില്‍ഡിയാല്‍ പറഞ്ഞു. കൂടാതെ ഉത്തരാഖണ്ഡും പഞ്ചാബും ഒരേസമയം തെരഞ്ഞെടുപ്പ് നേരിടുന്നതിനാല്‍, ഹരീഷ് റാവത്തിനെ പഞ്ചാബ് തെരഞ്ഞെടുപ്പിന്റെ ചുമതലക്കാരനാക്കിയത് ആശ്ചര്യകരമാണെന്ന് രാഷ്ട്രീയ വിശകലന വിദഗ്ധന്‍ ജയ് സിംഗ് റാവത്ത് പറഞ്ഞു. മാത്രമല്ല, ഉത്തരാഖണ്ഡിലെ കോണ്‍ഗ്രസ് നേതാക്കളുടെ ഇടയിലെ അപ്രഖ്യാപിത മുഖ്യമന്ത്രി മുഖമാണ് റാവത്ത്, അതിനാല്‍ തന്നെ ഈ സാഹചര്യത്തില്‍ അദ്ദേഹം പഞ്ചാബിലെ കാര്യങ്ങള്‍ മാത്രം കൈകാര്യം ചെയ്യുന്നത് വലിയ നഷ്ടത്തിന് ഇടവരുത്തുമെന്നും ജയ് സിംഗ് റാവത്ത് കൂട്ടിച്ചേര്‍ത്തു.
അതേസമയം, തെരഞ്ഞെടുപ്പ് അടുത്തിരിക്കുന്ന സാഹചര്യത്തില്‍ പാര്‍ട്ടിയുടെ മുതിര്‍ന്ന അംഗവും ഉത്തരാഖണ്ഡിലെ തെരഞ്ഞെടുപ്പ് പ്രചാരണ സമിതിയുടെ ചെയര്‍മാനുമായ ഹരീഷ് റാവത്തിന്റെ സാന്നിദ്ധ്യം സംസ്ഥാനത്ത് കൂടുതല്‍ ആവശ്യമാണെന്ന് കോണ്‍ഗ്രസ് സംസ്ഥാന വൈസ് പ്രസിഡന്റ് സൂര്യകാന്ത് ധസ്മന പറഞ്ഞു. അദ്ദേഹം ഡല്‍ഹിയിലേയും പഞ്ചാബിലേയും രാഷ്ട്രീയ കാര്യങ്ങള്‍ മാത്രം ശ്രദ്ധിക്കുന്നത്, ഉത്തരാഖണ്ഡില്‍ കോണ്‍ഗ്രസിന് നേട്ടമുണ്ടാക്കില്ലെന്നാണ് സൂര്യകാന്ത് ധസ്മന അഭിപ്രായപ്പെടുന്നത്. ഓണ്‍ലൈന്‍ മീറ്റിംഗുകളിലൂടെയും സോഷ്യല്‍ മീഡിയകളിലൂടെയും മാത്രമാണ് അദ്ദേഹം തന്റെ സാന്നിദ്ധ്യം അറിയിക്കുന്നത്. ഇപ്പോള്‍ സംസ്ഥാന ഇന്‍ചാര്‍ജ് ദേവേന്ദര്‍ യാദവിന്റെ നേതൃത്വത്തിലാണ് പ്രചാരണം നടത്തുന്നതെന്നും അദ്ദേഹം കൂട്ടിച്ചേര്‍ത്തു.
ഹരീഷ് റാവത്തിന്റെ സാന്നിദ്ധ്യം സംസ്ഥാന പാര്‍ട്ടി നേതൃത്വം ഇപ്പോള്‍ ആവശ്യപ്പെടുന്നതില്‍ മറ്റൊരു വസ്തുത കൂടിയുണ്ട്. ബി.ജെ.പി സര്‍ക്കാര്‍ രാഷ്ട്രീയപരമായി ധാരാളം വെല്ലുവിളികളാണ് സംസ്ഥാനത്ത് നേരിട്ടുകൊണ്ടിരിക്കുന്നത്. ഈ വര്‍ഷം നാല് മാസത്തിനിടെ രണ്ട് മുഖ്യമന്ത്രിമാരെ പാര്‍ട്ടി മാറ്റി എന്നതുതന്നെ ബി.ജെ.പി സര്‍ക്കാരിന്റെ പരാജയത്തെയാണ് കാണിക്കുന്നത്. കൂടാതെ, കൊവിഡിനെതിരെയുള്ള പോരാട്ടത്തിലും സംസ്ഥാനത്തിന്റെ വികസന കാര്യങ്ങളിലും സര്‍ക്കാര്‍ പരാജയമാണെന്ന അഭ്യൂഹങ്ങളും പരക്കെ ഉയരുന്നുണ്ട്. ഇതെല്ലാം ഒരു പിടിവള്ളിയാക്കി ഹരീഷ് റാവത്തിന്റെ നേതൃത്വത്തില്‍ രാഷ്ട്രീയ പ്രചാരണം കൊഴുപ്പിക്കാനാണ് കോണ്‍ഗ്രസ് ശ്രമിക്കുന്നത്.
ഉത്തരാഖണ്ഡിലെ പാര്‍ട്ടി കാര്യങ്ങളില്‍ നിന്ന് ഹരീഷ് റാവത്ത് ഒഴിഞ്ഞു നില്‍ക്കുന്നതായി നേതാക്കള്‍ക്ക് തോന്നാന്‍ ചില കാര്യങ്ങളുണ്ട്. അതിലൊന്ന്, കോണ്‍ഗ്രസിന്റെ പരിവര്‍ത്തന യാത്രയുടെ രണ്ടാം ഘട്ടം സെപ്റ്റംബര്‍ 17 ന് ഹരിദ്വാറില്‍ നിന്ന് ആരംഭിച്ചെങ്കിലും യാത്രയില്‍ പങ്കെടുക്കാനാകാതെ റാവത്തിന് ഡല്‍ഹിയിലേക്ക് പോകേണ്ടിവന്നിരുന്നു. കോണ്‍ഗ്രസിനെ സംബന്ധിച്ചിടത്തോളം വളരെ വളക്കൂറുള്ള മണ്ണാണ് ഹരിദ്വാര്‍. കാരണം, 2017ലെ തെരഞ്ഞെടുപ്പില്‍ കോണ്‍ഗ്രസ് വലിയ രീതിയില്‍ പരാജയപ്പെട്ടെങ്കിലും, ഹരിദ്വാറില്‍ മാത്രം പാര്‍ട്ടിക്ക് മൂന്ന് സീറ്റാണ് ലഭിച്ചത്.
മറ്റൊരു കാര്യം, പഞ്ചാബിന്റെ ചുമതല ഉള്ളതിനാല്‍ വരുന്ന തെരഞ്ഞെടുപ്പില്‍ മുഖ്യമന്ത്രി സ്ഥാനാര്‍ത്ഥി ആകാനില്ലെന്ന് അദ്ദേഹം പരസ്യമായി പ്രഖ്യാപിച്ചു എന്നതാണ്. എന്നാല്‍, തന്റെ പിന്മാറ്റം ഉത്തരാഖണ്ഡില്‍ പഞ്ചാബ് മോഡല്‍ മുഖ്യമന്ത്രി വരുന്നതിന് വേണ്ടിയാണെന്നാണ് അദ്ദേഹം പറഞ്ഞത്. അതായത് സംസ്ഥാനത്ത് ഏകദേശം 18 ശതമാനത്തോളം ദളിതരുണ്ടെന്നും അതിനാല്‍ ഒരു ദളിത് മുഖ്യമന്ത്രി ആ സ്ഥാനത്ത് വരണമെന്നാണ് തന്റെ ആഗ്രഹമെന്നും അദ്ദേഹം പറഞ്ഞിരുന്നു. പക്ഷെ, അദ്ദേഹത്തിന്റെ ഈ പ്രഖ്യാപനം നേതാക്കളെ രോഷാകുലരാക്കുകയാണ് ഉണ്ടായത്.
എന്നാല്‍, റാവത്തിന്റെ പെട്ടെന്നുള്ള ദലിത് ശ്രദ്ധ കേന്ദ്രീകരിക്കലിന് പിന്നില്‍ ആം ആദ്മി പാര്‍ട്ടിയുടെ വളര്‍ച്ചയാണ്. പ്രത്യേകിച്ച് ഹരിദ്വാര്‍, ഉദം സിംഗ് നഗര്‍ എന്നിവിടങ്ങളില്‍. രണ്ട് ജില്ലകളിലെയും ജനസംഖ്യയുടെ 50 ശതമാനത്തോളം ദളിതരും മുസ്ലീങ്ങളും ആണ്. 70 അംഗ നിയമസഭയിലെ 22 സീറ്റുകളില്‍ ഇക്കൂട്ടര്‍ക്ക് നേരിട്ട് സ്വാധീനവുമുണ്ട്. 2022 -ല്‍ ഒരു തിരിച്ചുവരവ് ഉറപ്പാക്കണമെങ്കില്‍ പാര്‍ട്ടി പുതിയ നടപടികള്‍ സ്വീകരിക്കണമെന്ന് കോണ്‍ഗ്രസ് നേതാക്കള്‍ പോലും സമ്മതിക്കുന്ന കാര്യമാണ്. ഈ പശ്ചാത്തലത്തില്‍ മുഖ്യമന്ത്രി സ്ഥാനത്ത് നിന്നുള്ള അദ്ദേഹത്തിന്റെ പിന്മാറ്റത്തെ ഒരു ബുദ്ധിപരമായ നീക്കമായി കണക്കാക്കേണ്ടി വരും. കൂടാതെ, ഉത്തരാഖണ്ഡ് രാഷ്ട്രീയത്തില്‍ ശ്രദ്ധ ചെലുത്തുന്നില്ലെന്ന നേതാക്കളുടെ വാദവും തള്ളിക്കളയേണ്ടി വരും.
****
[Compiled by ഭദ്ര ചന്ദ്രൻ]
