പാരീസ് ഫാഷന്‍ വീക്ക്: തൂവെള്ളയിൽ അതിസുന്ദരിയായി ഐശ്വര്യ റായ് ബച്ചന്‍

സെലിബ്രിറ്റികള്‍ ഏറെ ആകര്‍ഷകത്വതോടെ പ്രത്യക്ഷപ്പെടുന്ന വേദിയാണ് പാരീസ് ഫാഷന്‍ വീക്ക്. ആരാധകരുടെ മനം കവരുന്ന തരത്തിലാണ് ഈ വേദിയില്‍ താരങ്ങളെല്ലാം തന്നെ പ്രത്യക്ഷപ്പെടാറുള്ളത്. ഇത്തവണ ആരാധകരുടെ കണ്ണുകളുടക്കിയത് കലര്‍പ്പില്ലാത്ത തൂവെള്ള നിറത്തിലുള്ള വസ്ത്രമണിഞ്ഞെത്തിയ ഐശ്വര്യ റായ് ബച്ചനിലാണ്. ബോളിവുഡ് താരവും മുന്‍ ലോക സുന്ദരിയുമായ ഐശ്വര്യ റായ് നേരത്തെയും പാരിസ് ഫാഷന്‍ വീക്കില്‍ അഴകിന്റെ ആള്‍രൂപമായി പ്രത്യക്ഷപ്പെട്ടിരുന്നു.



എന്നാല്‍ ഇത്തവണ പ്രത്യേകിച്ച് ഡിസൈനുകളോ നിറങ്ങളോ ഉപയോഗിക്കാതെ നൈര്‍മല്യം വിരിയുന്ന വെള്ള നിറത്തില്‍ ഒരുങ്ങിയെത്തിയത് ആരാധകര്‍ക്ക് നയനമനോഹരമായ ഒരു കാഴ്ച തന്നെയാണ്.

മനോഹാരിത കൂട്ടി മുടിയിഴകള്‍:



വസ്ത്രം മാത്രമല്ല താരത്തിന്‍റെ മാസ്മരിക സൗന്ദര്യത്തിന് പിന്നില്‍. മുടിയിഴകളും മനോഹരമായ മിഴികളും എല്ലാം ചേരുന്നതാണ്. ഒരു വശത്തേയ്ക്ക് ചീകിയിട്ട മുടിയിഴകള്‍ ഐശ്വര്യയുടെ മനോഹാരിത വര്‍ദ്ധിപ്പിക്കുന്നുണ്ട്. ചുണ്ടുകളില്‍ ഫുഷ്ചിയ ലിപ്സ്റ്റിക് കൂടി അണിഞ്ഞതോടെ വാക്കുകളില്‍ വര്‍ണ്ണിക്കാനാകാത്ത വിധം ഐശ്വര്യ റായ്ക്ക് ചുറ്റും ഒരു ആകര്‍ഷക വലയം രൂപപ്പെട്ടതായി തോന്നി.

Also read: ചുവപ്പിന് ഇത്ര ഭംഗിയോ? ചുവപ്പിൽ തിളങ്ങിയ സുന്ദരിമാർ

റാംപില്‍ മായാജാലം തീര്‍ത്ത നടപ്പ്:



തൂവെള്ള ഗൗണില്‍ റാംപില്‍ നടന്ന താരത്തിന് ചുറ്റും ആരാധകരുടെ കണ്ണുകള്‍ ഒരു മാന്ത്രിക വലയത്തിലെന്ന പോലെ നീങ്ങി. സോഷ്യല്‍ മീഡിയയില്‍ പോസ്റ്റ്‌ ചെയ്ത ഈ ചിത്രത്തിന് താഴെയും ലക്ഷക്കണക്കിന് കണ്ണുകള്‍ നീങ്ങിയതിന് തെളിവാണ് ലൈക്കുകളും കമന്റുകളും നിറയുന്നത്. ഇടയ്ക്കെപ്പോഴോ ഐശ്വര്യ റായ് എന്ന താര സൗന്ദര്യത്തിന്റെ സാന്നിധ്യം കുറഞ്ഞു പോകുന്നു എന്ന തോന്നല്‍ ആരാധകര്‍ക്ക് ഉണ്ടായിരുന്നുവെങ്കില്‍ , ആ ചിന്ത മാറ്റിയെടുക്കാന്‍ ഈ ഔട്ട്‌ലുക്കിന് കഴിഞ്ഞിട്ടുണ്ട്.

പശ്ചാത്തലം പാരിസ് ഈഫൽ ടവര്‍:



പ്രസിദ്ധമായ പാരിസ് ടവറാണ് പാരിസ് ഫാഷന്‍ വീക്കിന് പശ്ചാതലമാകുന്നത്. ടവറിന് മുന്‍പിലായി നടക്കുന്ന പരിപാടിയില്‍ പങ്കെടുക്കുന്നത് ലോറിയല്‍ പാരിസ് ബ്രാന്‍ഡ്‌ അംബാസഡര്‍മാരും. പല രാജ്യങ്ങളില്‍ നിന്ന്, രൂപത്തിലും ഭാവത്തിലും വേഷ വിധാനങ്ങളിലും വ്യത്യസ്തത പുലര്‍ത്തിക്കൊണ്ട്, അതേസമയം സൗന്ദര്യ സങ്കല്‍പം എന്ന ഒറ്റ ആശയത്തിന്‍റെ ഭാഗമായി ഹെലെന്‍ മിറെന്‍, അംബര്‍ ഹെര്ഡ് എന്നിവര്‍ക്കൊപ്പം ഐശ്വര്യ റായ് ബച്ചന്‍ ചേര്‍ന്ന് നില്‍ക്കുന്ന കാഴ്ചയാണ് പാരിസ് ഫാഷന്‍ വീക്കില്‍ കാണാനായത്.