തൊഴിലാളികളെ മറ്റ് ജോലികളില്‍ ഏര്‍പ്പെടാന്‍ അനുവദിക്കുന്ന തൊഴിലുടമകള്‍ക്ക് ഒരു കൊല്ലത്തേക്ക് തൊഴിലാളികളെ റിക്രൂട്ട് ചെയ്യുന്നതിന് വിലക്കേര്‍പ്പെടുത്തുമെന്നും ജവാസാത്ത് അറിയിച്ചു.
മൂന്നു മാസം വരെ തടവും അര ലക്ഷം റിയാല്‍ പിഴയും
പ്രവാസികളില്‍ നിന്ന് നിശ്ചിത തുക ഈടാക്കി മറ്റ് ജോലികള്‍ ചെയ്യാന്‍ അവരെ അനുവദിക്കുന്ന തൊഴിലുടമകള്‍ക്ക് മൂന്നു മാസം വരെ ജയിലും 50,000 റിയാല്‍ വഴെ പിഴയും ലഭിക്കുമെന്നാണ് ജവാസാത്ത് മുന്നറിയിപ്പ് നല്‍കിയിരിക്കുന്നത്. ഈ കുറ്റകൃത്യത്തിന്റെ പേരില്‍ ആദ്യമായി പിടിക്കപ്പെടുന്ന തൊഴിലുടമയ്ക്ക് ഒരു മാസം തടവും 5000 റിയാല്‍ വരെ പിഴയുമാണ് ലഭിക്കുക. എന്നാല്‍ രണ്ടാം വട്ടവും തെറ്റ് ആവര്‍ത്തിക്കുന്ന പക്ഷം തടവ് രണ്ട് മാസമായും പിഴ 20,000 റിയാലായും വര്‍ധിക്കും. എന്നാല്‍ വീണ്ടും ഇതേ തേറ്റ് ആവര്‍ത്തിക്കുന്ന സ്ഥിതി വന്നാല്‍ മൂന്നു മാസം തടവും 50,000 റിയാല്‍ പിഴയുമാണ് അവരെ കാത്തിരിക്കുന്നത്. തൊഴിലുടമ വിദേശിയാണെങ്കിലാണ് ഈ ശിക്ഷ.
റിക്രൂട്ട്‌മെന്റ് വിലക്കും ഏര്‍പ്പെടുത്തും
എന്നാല്‍ തൊഴിലുടമ സൗദി പൗരനാണെങ്കില്‍ ആദ്യ വട്ടം 5000 റിയാല്‍ പിഴയും, രണ്ടാം വട്ടം 10,000 റിയാല്‍ പിഴയും ഒരു മാസം തടവും, മൂന്നാം വട്ടം 20,000 റിയാല്‍ പിഴയും മൂന്നു മാസം തടവുമാണ് ലഭിക്കുക. രാജ്യത്തെ തൊഴില്‍ നിയമത്തിന് വിരുദ്ധമായി ഒന്നില്‍ കൂടുതല്‍ തൊഴിലാളികളെ ഈ രീതിയില്‍ ജോലി ചെയ്യാന്‍ അനുവദിച്ചാല്‍ അതിനനുസരിച്ച് ശിക്ഷയും ഇരട്ടിയാവും. ഇതിനു പുറമെ, തൊഴിലാളികളെ മറ്റ് ജോലികളില്‍ ഏര്‍പ്പെടാന്‍ അനുവദിക്കുന്ന തൊഴിലുടമകള്‍ക്ക് ഒരു കൊല്ലത്തേക്ക് തൊഴിലാളികളെ റിക്രൂട്ട് ചെയ്യുന്നതിന് വിലക്കേര്‍പ്പെടുത്തുമെന്നും ജവാസാത്ത് അറിയിച്ചു. തെറ്റ് ആവര്‍ത്തിക്കുന്നതിനനുസൃതമായി റിക്രൂട്ട്‌മെന്റ് വിലക്കിന്റെ വര്‍ഷവും വര്‍ധിക്കും.
പ്രവാസി ജീവനക്കാര്‍ക്ക് ശിക്ഷ കൂടും
അതേസമയം, യഥാര്‍ഥ തൊഴിലുടമയുടെ കീഴിലല്ലാതെ മറ്റു ജോലി ചെയ്യുന്ന പ്രവാസികള്‍ക്ക് ആറ് മാസം തടവും 50,000 രൂപ വരെ പിഴയുമാണ് ലഭിക്കുകയെന്നും ജവാസാത്ത് മുന്നറിയിപ്പ് നല്‍കി. ശിക്ഷാ കാലാവധിക്കു ശേഷം ഇവരെ നാടുകടത്തുകയും ചെയ്യും. അവരുടെ റെസിഡന്‍സി പെര്‍മിറ്റ് അഥവാ ഇഖാമ റദ്ദ് ചെയ്ത ശേഷമായിരിക്കും നാട്ടിലേക്ക് തിരിച്ചയക്കുക. വിസയില്‍ കാണിച്ചിരിക്കുന്ന ജോലി തന്നെയാണ് പ്രവാസികള്‍ ചെയ്യുന്നതെന്ന് പരിശോധിക്കുന്നതിനായി രാജ്യത്തിന്റെ വിവിധ ഭാഗങ്ങളില്‍ പരിശോധന കര്‍ശനമാക്കിയിരിക്കുകയാണ് അധികൃതര്‍. കഴിഞ്ഞ മാസം പലയിടങ്ങളില്‍ നിന്നായി മലയാളികള്‍ ഉള്‍പ്പെടെ നൂറു കണക്കിന് പ്രവാസികള്‍ ഈ രീതിയില്‍ ജോലി ചെയ്തതിന് പിടിയിലായിരുന്നു.
റെസ്റ്റോറന്റുകളിലും കഫേകളിലും പരിശോധന
അതിനിടെ, സൗദിയില്‍ റെസ്റ്റോറന്റുകളിലും കോഫി ഷോപ്പുകളിലും സ്വദേശിവല്‍ക്കരണം നടപ്പിലായതോടെ പരിശോധന ശക്തമാക്കി മാനവ വിഭവശേഷി മന്ത്രാലയം. രാജ്യത്തിന്റെ വിവിധ പ്രവിശ്യകളില്‍ നടത്തിയ പരിശോധനയില്‍ ഇരുപതോളം നിയമ ലംഘനങ്ങള്‍ കണ്ടെത്തി. കഴിഞ്ഞ ദിവസം മുതല്‍ സ്വദേശിവല്‍ക്കരണം പ്രാബല്യത്തിലായ റെസ്റ്റോറന്റുകള്‍, കഫേള്‍, സൂപ്പര്‍മാര്‍ക്കറ്റുകള്‍ എന്നിവിടങ്ങളിലാണ് പരിശോധന നടത്തിയത്. മന്ത്രാലയത്തിലെ പ്രവിശ്യാ മേധാവികളുടെ നേരിട്ടുള്ള മേല്‍നോട്ടത്തിലാണ് പരിശോധനകള്‍. മന്ത്രാലയം നിര്‍ദ്ദേശിച്ച സ്വദേശിവല്‍ക്കരണം പാലിക്കാതിരിക്കുക, തൊഴില്‍ കരാറോ താമസ രേഖയോ ഇല്ലാത്ത തൊഴിലാളികളെ നിയമിക്കുക, ഇഖാമയില്‍ രേഖപ്പെടുത്തിയ ജോലിക്ക് വിരുദ്ധമായ തൊഴില്‍ ചെയ്യുക തുടങ്ങിയ നിയമ ലംഘനങ്ങള്‍ പരിശോധനയില്‍ കണ്ടെത്തിയതായി മന്ത്രാലയ മേധാവി ഡോ. മുഹമ്മദ് അല്‍ഹര്‍ബി പറഞ്ഞു.
ബിനാമി സ്ഥാപനങ്ങള്‍ക്കെതിരേയും നടപടി
ഇതിനിടെ, ബിനാമി വിരുദ്ധ നടപടികള്‍ ശക്തമാക്കി വാണിജ്യ മന്ത്രാലയവും പരിശോധനകള്‍ തുടരുകയാണ്. പുതുക്കിയ ബിനാമി വിരുദ്ധ നിയമം ചുമത്തി രാജ്യത്ത് കേസുകള്‍ രജിസ്റ്റര്‍ ചെയ്തിട്ടുണ്ട്. നിയമ ലംഘകരുടെ ബിസിനസ് സ്ഥാപനങ്ങള്‍ നിയമ വിധേയമാക്കുന്നതിന് ഇതിനകം അപേക്ഷ നല്‍കാത്തവരാണെങ്കില്‍ പുതിയ നിയമത്തിന്റെ പരിധിയില്‍ ഉള്‍പ്പെടുത്തും. ഇത്തരക്കാര്‍ക്ക് അഞ്ച് വര്‍ഷം വരെ തടവും അഞ്ച് ദശലക്ഷം റിയാല്‍ വരെ പിഴയും ശിക്ഷയായി ലഭിക്കും. സ്വന്തം പേരിലല്ലാതെ ബിസിനസുകള്‍ സ്ഥാപിച്ച് പ്രവര്‍ത്തിക്കുന്നവര്‍ക്കെതിരേയാണ് നടപടി വരിക.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : jail and fine for employer if allowed expat to work for personal benefit
Malayalam News from malayalam.samayam.com, TIL Network
