‘ജ്യൂസാണെന്നു കരുതി’, മുത്തച്ഛൻ വാങ്ങിവെച്ച മദ്യം കഴിച്ച കുഞ്ഞിനു ദാരുണാന്ത്യം; ഹൃദയാഘാതത്തെ തുടര്‍ന്ന് മുത്തച്ഛനും മരിച്ചു

വെല്ലൂര്‍: മുത്തച്ഛൻ വാങ്ങി വെച്ച മദ്യം ശീതള പാനീയമാണെന്നു കുരുതി അബദ്ധത്തിൽ എടുത്തു കുടിച്ച കുഞ്ഞിനു ദാരുണാന്ത്യം. തമിഴ്നാട്ടിലെ വെല്ലൂരിനു സമീപം കട്പാടിയിലാണ് സംഭവമുണ്ടായത്. കുഞ്ഞിൻ്റെ നില ഗുരുതരമാണെന്ന് അറിഞ്ഞ മുത്തച്ഛനും ഹൃദയാഘാതത്തെ തുടര്‍ന്ന് മരിച്ചു. നാലു വയസുള്ള ബാലനാണ് മദ്യം ഉള്ളിൽ ചെന്നു മരിച്ചത്.



കുട്ടിയുടെ മുത്തച്ഛനായ പി ചിന്നസ്വാമി (62) കഴിഞ്ഞ ദിവസം വാങ്ങി വെച്ച ബ്രാണ്ടി കുട്ടി അബദ്ധത്തിൽ എടുത്തു കുടിക്കുകയായിരുന്നുവെന്നാണ് പോലീസ് പറയുന്നത്. വെല്ലൂര്‍ ജില്ലയിലെ തിരുപ്പാക്കുട്ടൈ ഗ്രാമത്തിലാണ് ചിന്നസ്വാമി ജോലി ചെയ്യുന്നത്. ജോലിയ്ക്കു ശേഷം തിരിച്ചു വീട്ടിലെത്തിയതിനു ശേഷമാണ് ഇയാള്‍ മദ്യപിച്ചത്. ഈ സമയത്ത് മുത്തച്ഛൻ നല്‍കിയ പലഹാരങ്ങള്‍ നാലുവയസുകാരനായ രുദ്രേഷ് കഴിക്കുകയും ചെയ്തിരുന്നു. തുടര്‍ന്ന് പകുതിയോളം മദ്യം കഴിച്ചു തീര്‍ത്ത ശേഷം കുപ്പി അവിടെ തന്നെ വെച്ച ചിന്നസ്വാമി ടിവി കാണുന്നതിനായി ഹാളിലേയ്ക്ക് പോകുകയായിരുന്നു.

Also Read: രാഹുൽ ഗാന്ധിക്ക് ലഖിംപൂർ ഖേര്‍ സന്ദര്‍ശനാനുമതി നിഷേധിച്ച് യുപി

ഈ സമയത്ത് വീട്ടിൽ മറ്റാരും ഉണ്ടായിരുന്നില്ല. കുട്ടിയുടെ മാതാപിതാക്കളായ സി സെന്ദുപരപ്പാണ്ടിയും എസ് വിജയയും അടുത്ത് പ്രദേശിക തെരഞ്ഞെടുപ്പിൻ്റെ പ്രചാരണ പ്രവര്‍ത്തനങ്ങളിലായിരുന്നു. തുടര്‍ന്ന് മദ്യക്കുപ്പി കണ്ട് ഇത് ജ്യൂസാണെന്ന് തെറ്റിദ്ധരിച്ച കുട്ടി ഇതെടുത്ത് കുടിക്കുകയായിരുന്നു. ഇതേത്തുടര്‍ന്ന് കുട്ടിയ്ക്ക് ശ്വാസതടസ്സം അനുഭവപ്പെടുകയായിരുന്നുവെന്നാണ് ടൈംസ് ഓഫ് ഇന്ത്യ റിപ്പോര്‍ട്ടിൽ പറയുന്നത്. കുട്ടി ശ്വാസം വലിക്കുന്ന ശബ്ദം കേട്ടാണ് ചിന്നസ്വാമി ഓടിയെത്തിയത്. മദ്യം കഴിച്ചാണ് കുട്ടി ഗുരുതരാവസ്ഥയിലായതെന്നു മനസ്സിലാക്കിയ ചിന്നസ്വാമി ഉടൻ തന്നെ കുട്ടിയുടെ മാതാപിതാക്കളെ വിളിച്േചു വരുത്തി.

കുട്ടിയെ ശ്രദ്ധിക്കാത്തതിനു ചിന്നസ്വാമിയോട് വിജയ ദേഷ്യപ്പെടുകയും ചെയ്തു. ഇതിനു പിന്നാലെ ഹൃദയാഘാതമുണ്ടായ ചിന്നസ്വാമി കുഴഞ്ഞു വീഴുകയായിരുന്നു. തുടര്‍ന്ന് നാട്ടുകാര്‍ വഴി വിവരമറിഞ്ഞ സെന്ദുരപ്പാണ്ടി ഉടൻ തന്നെ വീട്ടിലെത്തുകയും ബോധരഹിതരായി കിടന്ന കുഞ്ഞിനെയും അച്ഛനെയും ആശുപത്രിയിലെത്തിക്കുകയുമായിരുന്നു. എന്നാൽ ഇതിനോടകം തന്നെ ചിന്നസ്വാമി മരിച്ചിരുന്നു. കുട്ടിയടെ നില ഗുരുതരമായിരുന്നതിനാൽ വെല്ലൂര്‍ ക്രിസ്ത്യൻ മെഡിക്കൽ കോളേജേലിയ്ക്ക് തിരിക്കാനായിരുന്നു ആശുപത്രിയിൽ നിന്നുല്ള നിര്‍ദേശം. തുടര്‍ന്ന് പ്രാഥമിക ശുശ്രൂഷകള്‍ക്കു ശേഷം വിദഗ്ധ ചികിത്സയ്ക്കായി കുടുംബം വെല്ലൂരിലെ ആശുപത്രിയിലെത്തിയെങ്കിലും കുട്ടി ചികിത്സയ്ക്കിടെ മരണപ്പെടുകയായിരുന്നു.

Also Read: പാഠ്യപദ്ധതിയിൽ ജെൻഡർ വിദ്യാഭ്യാസം ഉൾപ്പെടുത്തണം; വനിതാ കമ്മീഷനു പിന്നാലെ ശുപാർശയുമായി യുവജന കമ്മീഷനും

സംഭവത്തിൽ തിരുവാലം പോലീസ് കേസെടുത്തിട്ടുണ്ട്. സിആര്‍പിസി 174 പ്രകാരം അസ്വാഭാവിക മരണത്തിനാണ് കേസെടുത്തിട്ടുള്ളത്. മരിച്ച കുട്ടിയുടെ അമ്മാവനായ സി ശേഖറിൻ്റെ പരാതിയിലാണ് അറസ്റ്റ്. മൃതദേഹങ്ങള്‍ പോസ്റ്റ് മോര്‍ട്ടത്തിനായി വെല്ലൂര്‍ സര്‍ക്കാര്‍ ജനറൽ ആശുപത്രിയിലേയ്ക്ക് മാറ്റിയതായി പോലീസ് അറിയിച്ചു. സംഭവത്തിൽ പോലീസ് അന്വേഷണവും ആരംഭിച്ചിട്ടുണ്ട്.

അതേസമയം, കുട്ടിയുടെ ദാരുണ മരണത്തിൻ്റെ പശ്ചാത്തലത്തിൽ സംസ്ഥാനത്തെ എല്ലാ മദ്യശാലകളും അടച്ചിടണമെന്ന് പിഎകം കെ യൂത്ത് വിങ് അധ്യക്ഷനും രാജ്യസഭാ എംപിയുമായ അൻപുമണി രാംദാസ് ആവശ്യപ്പെട്ടു. സംസ്ഥാനത്ത് സമ്പൂര്‍ണ മദ്യനിരോധനം നടപ്പാക്കുകയാണ് വേണ്ടതെന്നും അദ്ദേഹം ആവശ്യപ്പെട്ടു.