മമതയെ കണ്ടെന്ന് റിപ്പോർട്ട്; മുകുൾ റോയ് തൃണമൂലിലേക്ക്? സൂചന നൽകി നേതാക്കൾ

കൊൽക്കത്ത: പശ്ചിമ ബംഗാളിൽ പുതിയ രാഷ്‌ട്രീയ നീക്കങ്ങൾക്ക് കളമൊരുക്കി ബിജെപി ദേശീയ ഉപാധ്യക്ഷൻ മുകൾ റോയ് തൃണമൂൽ കോൺഗ്രസിലേക്ക് മടങ്ങിയെത്തുമെന്ന റിപ്പോർട്ട് ശക്തിപ്പെടുന്നു. മുഖ്യമന്ത്രി മമതാ ബാനർജിയുമായി മുകുൾ റോയ് ചർച്ചകൾ നടത്തിയെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.

‘കുടിയേറ്റ മുസ്ലീം വിഭാഗം കുടുംബാസൂത്രണം നടത്തണം, എൻ്റെ വീട്ടിൽ പോലും കടന്നു കയറിയേക്കാം’: അസം മുഖ്യമന്ത്രി
തൃണമൂൽ നേതാക്കളുമായി മുകുൾ റോയ് പ്രത്യേക കൂടിക്കാഴ്‌ചകൾ നടത്തുമെന്നും തുടർന്ന് ബിജെപി വിടുന്ന കാര്യത്തിൽ പ്രഖ്യാപനം നടത്തിയേക്കുമെന്നും വാർത്താ ഏജൻസിയായ എൻഎൻഐ റിപ്പോർട്ട് ചെയ്‌തു. നിയമസഭാ തെരഞ്ഞെടുപ്പിന് പിന്നാലെ സംസ്ഥാന ബിജെപിയിലുണ്ടായ പൊട്ടിത്തെറികളാണ് മുകുൾ റോയിയെ മടങ്ങിവരവിന് പ്രേരിപ്പിക്കുന്നത്. ബിജെപിയിലെത്തിയ കൂടുതൽ നേതാക്കൾ തൃണമൂൽ കോൺഗ്രസിലേക്ക് എത്തുമെന്ന റിപ്പോർട്ടുകളും പുറത്തുവന്നു.

ബിജെപി സംസ്ഥാന അധ്യക്ഷൻ ദിലീപ് ഘോഷ്, പ്രതിപക്ഷ നേതാവ് സുവേന്ദു അധികാരി എന്നിവരുമായി മുകുൾ റോയി അകന്നു. കഴിഞ്ഞ ദിവസം ചേർന്ന ബിജ്ജെപി യോഗത്തിൽ അദ്ദേഹം പങ്കെടുത്തിരുന്നില്ല. കഴിഞ്ഞ മാസം മുകുൾ റോയിയുടെ ഭാര്യ ആശുപത്രിയിൽ ചികിത്സയിൽ കഴിയുമ്പോൾ ടിഎംസി നേതാവ് അഭിഷേക് ബാനർജി സന്ദർശനം നടത്തിയിരുന്നു. മുകുൾ റോയ് മടങ്ങിവരുമെന്ന വാർത്ത പുറത്തുവന്നെങ്കിലും തൃണമൂൽ നേതൃത്വം പ്രതികരിക്കാൻ തയ്യാറായിട്ടില്ല.

ഫൈസർ വാക്‌സിൻ ഇന്ത്യയിലേക്ക്? വിലവിവരം പുറത്ത്, സ്ഥിരീകരിക്കാതെ കേന്ദ്രം
പാർട്ടിയുടെ നേതൃനിരയിൽ നിന്ന് ബിജെപിയിലേക്ക് പോകുകയും തുടർന്ന് പാർട്ടിക്കെതിരെ കടുത്ത ഭാഷയിൽ ആരോപണം ഉന്നയിക്കുകയും ചെയ്‌ത മുകുൾ റോയിയുടെ മടങ്ങിവരവിൽ മുഖ്യമന്ത്രി മമതാ ബനാർജി തന്നെ പ്രതികരിക്കട്ടെ എന്ന നിലപാടിലാണ് മുതിർന്ന നേതാക്കൾ. പാർട്ടിയിലേക്ക് മടങ്ങിവരാൻ ആഗ്രഹിക്കുന്നവരുടെ കാര്യത്തിൽ അന്തിമതീരുമാനം മുഖ്യമന്ത്രിയാണ് സ്വീകരിക്കേണ്ടതെന്ന് തൃണമൂൽ എം പി സൗഗത റോയ് കഴിഞ്ഞ ദിവസം പറഞ്ഞു. “ആവശ്യമുണ്ടായിരുന്ന സമയത്ത് ഒപ്പം നിൽക്കാതെ പാർട്ടി വിട്ടവരാണ് ഇപ്പോൾ തിരികെ എത്താൻ ആഗ്രഹം പ്രകടിപ്പിക്കുന്നത്. ഇത്തരക്കാരുടെ കാര്യത്തിൽ മമത തന്നെ തീരുമാനം സ്വീകരിക്കട്ടെ” – എന്നും അദ്ദേഹം പറഞ്ഞു. മുകുൾ റോയി മടങ്ങിപ്പോകുന്നുവെന്ന വാർത്തയിൽ ബിജെപിയും തൃണമൂലും ഇതുവരെ പ്രതികരണം നടത്തിയിട്ടില്ല.