ഒമാനില്‍ കൊവിഡ് വ്യാപനം കൂടുന്നു; ഐസിയു കേസുകളും മരണവും വര്‍ധിച്ചു

മസ്‌ക്കറ്റ്: ഒമാനില്‍ കൊവിഡ് വ്യാപനം വര്‍ധിച്ചുവരുന്നതായി ആരോഗ്യ മന്ത്രാലയത്തിന്റെ റിപ്പോര്‍ട്ട്. കൊവിഡ് ബാധിച്ച് ആശുപത്രിയില്‍ പ്രവേശിപ്പിക്കപ്പെടുന്നവരുടെയും മരണപ്പെടുന്നവരുടെയും എണ്ണം വലിയ തോതില്‍ വര്‍ധിച്ചതായാണ് കണക്കുകള്‍. വ്യാഴാഴ്ച പുതുതായി 1640 പോസിറ്റീവ് കേസുകളാണ് റിപ്പോര്‍ട്ട് ചെയ്യപ്പെട്ടത്. 19 കൊവിഡ് മരണങ്ങളും റിപ്പോര്‍ട്ട് ചെയ്യപ്പെടുകയുണ്ടായി. ഏപ്രിലിന് ശേഷം ഇത്രയേറെ മരണം റിപ്പോര്‍ട്ട് ചെയ്യപ്പെടുന്നത് ഇതാദ്യമായാണ്.



ജൂണ്‍ മാസത്തിലെ ആദ്യ 10 ദിവസങ്ങള്‍ക്കകം 13,000 കേസുകളാണ് റിപ്പോര്‍ട്ട് ചെയ്യപ്പെട്ടത്. അതായത് ദിവസം ശരാശരി 1300 കേസുകള്‍ ഈ കാലയളവിലുണ്ടായി. എന്നാല്‍ ഇതിനു മുമ്പ് ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്യപ്പെട്ടത് കഴിഞ്ഞ വര്‍ഷം ജൂലൈയിലായിരുന്നു. ആ മാസം 39,000 പേര്‍ക്കായിരുന്നു കൊവിഡ് ബാധ റിപ്പോര്‍ട്ട് ചെയ്തത്. പ്രതിദിന ശരാശി 1303 ആയിരുന്നു അന്ന്. എന്നാല്‍ നിലവിലെ രീതിയില്‍ കൊവിഡ് കേസുകള്‍ വരികയാണെങ്കില്‍ ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്യുന്ന മാസമായി ജൂണ്‍ മാറുമെന്നാണ് വിലയിരുത്തപ്പെടുന്നത്.

Also Read: കൊവിഡ് വ്യാപനത്തിന് കുറവില്ല; ബഹ്‌റൈനില്‍ ലോക്ക്ഡൗണ്‍ രണ്ടാഴ്ചത്തേക്കു കൂടി നീട്ടി

ആശുപത്രി പ്രവേശനത്തിന്റെ കാര്യത്തില്‍ 31 ശതമാനം വര്‍ധനവാണ് ജൂണ്‍ മാസം ഉണ്ടായത്. നിലവില്‍ 1060 പേര്‍ ആശുപത്രിയില്‍ ചികില്‍സയിലുണ്ട്. ഐസിയു രോഗികളുടെ കാര്യത്തില്‍ 40 ശതമാനത്തിലേറെയാണ് വര്‍ധന. 345 പേരാണ് നിലവില്‍ തീവ്രപരിചരണ വിഭാഗത്തില്‍ ചികില്‍സയിലുള്ളത്. നിലവിലെ നില തുടര്‍ന്നാല്‍ പ്രതിദിന കേസുകള്‍ അടുത്ത ആഴ്ചയോടെ രണ്ടായിരം കടക്കുമെന്നാണ് ആരോഗ്യ രംഗത്തെ വിദഗ്ധര്‍ അഭിപ്രായപ്പെടുന്നത്. മരണ സംഖ്യയും കൂടാനിയുണ്ട്. ഒമാനില്‍ ഇതിനകം 230,219 പേര്‍ക്കാണ് കൊവിഡ് ബാധ റിപ്പോര്‍ട്ട് ചെയ്യപ്പെട്ടത്. 2467 പേര്‍ ഇതിനകം കൊവിഡ് ബാധിച്ച് മരിച്ചു.