കൊവിഡ് വ്യാപനത്തിന് കുറവില്ല; ബഹ്‌റൈനില്‍ ലോക്ക്ഡൗണ്‍ രണ്ടാഴ്ചത്തേക്കു കൂടി നീട്ടി

മനാമ: കൊവിഡ് വ്യാപനം രൂക്ഷമായി തുടരുന്ന സാഹചര്യത്തില്‍ രണ്ടാഴ്ചയായി തുടരുന്ന ലോക്ക് ഡൗണ്‍ രണ്ടാഴ്ചത്തേക്കു നീട്ടാന്‍ കൊവിഡ് പ്രതിരോധത്തിനായുള്ള നാഷണല്‍ മെഡിക്കല്‍ ടാസ്‌ക് ഫോഴ്‌സ് തീരുമാനിച്ചു. മെയ് 27ന് അര്‍ധ രാത്രി 12 മണി മുതല്‍ ജൂണ്‍ 10 രാത്രി 12 മണി വരെ അടിയന്തര സേവനങ്ങള്‍ നല്‍കുന്ന സ്ഥാപനങ്ങളൊഴികെ മറ്റെല്ലാ സ്ഥാപനങ്ങളും വാണിജ്യകേന്ദ്രങ്ങളും അടച്ചിട്ടിരുന്നുവെങ്കിലും രോഗ വ്യാപനം ശക്തമായി തുടരുന്ന സാഹചര്യത്തിലാണ് ജൂണ്‍ 25 വരെ ലോക്ക് ഡൗണ്‍ നീട്ടാന്‍ അധികൃതര്‍ തീരുമാനമെടുത്തത്.



Also Read: യാത്രാ പ്രശ്നം പരിഹരിക്കാന്‍ ശ്രമം; ഗള്‍ഫ് രാജ്യങ്ങളിലെ അംബാസഡര്‍മാരുമായി കേന്ദ്ര വിദേശകാര്യ മന്ത്രി കൂടിക്കാഴ്‍ച നടത്തി

ഇതുപ്രകാരം ഷോപ്പിംഗ് മാളുകള്‍, സിനിമാശാലകള്‍, റസ്റ്റോറന്റുകള്‍, കോഫി ഷോപ്പുകള്‍, സ്വകാര്യ ജിമ്മുകള്‍, വിനോദ ഹാളുകള്‍, നീന്തല്‍ക്കുളങ്ങള്‍, ബാര്‍ബര്‍ ഷോപ്പുകള്‍, സലൂണുകള്‍ ഉള്‍പ്പെടെയുള്ള സ്ഥാപനങ്ങള്‍ അടച്ചിടുന്നത് തുടരും. റസ്റ്റോറന്റുകളില്‍ ഹോം ഡെലിവറി, ടേക്ക് എവേ സേവനങ്ങള്‍ മാത്രം അനുവദിക്കും. അതേസമയം, അടിയന്തര സര്‍വീസുകളായ ഹൈപ്പര്‍മാര്‍ക്കറ്റുകള്‍, സൂപ്പര്‍മാര്‍ക്കറ്റുകള്‍, കോള്‍ഡ് സ്റ്റോറുകള്‍, പലചരക്കു കടകള്‍, മല്‍സ്യ ഷോപ്പുകള്‍, ബേക്കറികള്‍, ഗ്യാസ് സ്റ്റേഷനുകള്‍, ആശുപത്രികള്‍, എടിഎമ്മുകള്‍, ബാങ്കുകള്‍, ഫാര്‍മസികള്‍ തുടങ്ങിയവ തുറന്നിരിക്കും.

സര്‍ക്കാര്‍- പൊതു മേഖലാ ഓഫീസുകളിലെ 70 ശതമാനം ജീവനക്കാര്‍ വര്‍ക്ക് ഫ്രം ഹോം രീതിയില്‍ പ്രവര്‍ത്തിക്കണം. 30 ശതമാനം പേര്‍ മാത്രമേ ഓഫീസുകളില്‍ നേരിട്ട് ഹാജരാവാന്‍ പാടുള്ളൂ. വിദ്യാഭ്യാസ സ്ഥാപനങ്ങളില്‍ നേരിട്ടുള്ള ക്ലാസ്സുകള്‍ പാടില്ല. സ്വകാര്യ ചടങ്ങുകള്‍, ഒത്തു ചേരലുകള്‍, കായിക പരിപാടികള്‍ എന്നിവയ്ക്കും വിലക്കുണ്ട്.