തൊഴില്‍ നിയമത്തില്‍ ഭേദഗതി വരുത്തി
സ്‌പോണ്‍സര്‍ഷിപ്പ് സമ്പ്രദായത്തില്‍ മാറ്റം വരുത്തിക്കൊണ്ട് സൗദി അറേബ്യ കഴിഞ്ഞ വര്‍ഷം മുതല്‍ നടപ്പിലാക്കിയ നിയമഭേദഗതിയില്‍ മാറ്റങ്ങള്‍ വരുത്തിക്കൊണ്ടാണ് പുതിയ ഇളവ് അനുവദിച്ചിരിക്കുന്നത്. ഇനി മുതല്‍ പുതുതായി രാജ്യത്തേക്കെത്തുന്ന വിദേശികള്‍ക്ക് പുതിയ തൊഴിലിലേക്ക് മാറാന്‍ ഒരു വര്‍ഷം കാത്തിരിക്കേണ്ടതില്ല. പകരം രാജ്യത്തെത്തിയ ശേഷം ഇഷ്ടമുള്ള സമയത്ത് തൊഴില്‍ മാറാം. എന്നാല്‍ ഏതാനും നിബന്ധനകളോടെയാണ് തൊഴില്‍ മാറ്റത്തിലെ ഈ ഇളവ് പ്രഖ്യാപിച്ചിരിക്കുന്നത്.
സ്‌പോണ്‍സറുടെ അനുമതി വേണം
ഒരു വര്‍ഷം തികയുന്നതിന് മുമ്പ് തൊഴില്‍ മാറ്റം നേടുന്നതിന് നിലവിലെ തൊഴിലുടമയുടെ അനുമതി തേടണമെന്നതാണ് വ്യവസ്ഥകളില്‍ ഒന്നാമത്തേത്. അതോടൊപ്പം നിതാഖാത്ത് നിയമത്തിന്റെ വ്യവസ്ഥയ്ക്ക് എതിരാവരുതെന്നും നിബന്ധനയുണ്ട്. ഇതുപ്രകാരം സ്വകാര്യ മേഖലയിലെ പുതിയൊരു സ്ഥാപനത്തേക്ക് ജോലി മാറുമ്പോള്‍ അത് സ്വദേശിവല്‍ക്കരണത്തിന്റെ ഭാഗമായുള്ള നിതാഖാത്ത് നിയമപ്രകാരം സൗദി പൗരന് വേണ്ടി മാറ്റിവയ്ക്കപ്പെട്ട ജോലിയാവാന്‍ പാടില്ല. എന്നു മാത്രമല്ല, പുതിയ ആള്‍ വരുന്നതോടെ നിതാഖാത്ത് പ്രകാരമുള്ള സ്വദേശി, വിദേശി അനുപാതത്തിലും മാറ്റം വരാന്‍ പാടില്ല.
വരുത്തിയത് മൂന്ന് ഭേദഗതികള്‍
തൊഴില്‍ ട്രാന്‍സ്ഫര്‍ എളുപ്പമാക്കുന്ന ഈ മാറ്റം ഉള്‍പ്പെടെ മൂന്ന് ഭേദഗതികളാണ് തൊഴില്‍ നിയമത്തില്‍ വരുത്തിയിരിക്കുന്നത്. തൊഴിലാളിയും തൊഴിലുടമയും തമ്മിലുള്ള കരാര്‍ അവസാനിച്ചാല്‍ നിലവിലെ സ്‌പോണ്‍സറുടെ അനുമതി ഇല്ലാതെ തന്നെ തൊഴില്‍ മാറ്റം അനുവദിക്കുന്നതാണ് രണ്ടാമത്തെ ഭേദഗതി. അതോടൊപ്പം ഒരു തൊഴില്‍ മാറ്റവുമായി ബന്ധപ്പെട്ട പുതിയ നിര്‍ദ്ദേശങ്ങള്‍ പുറപ്പെടുവിച്ചുള്ള മുന്നാമത്തെ ഭേദഗതിക്കും മന്ത്രാലയം അനുമതി നല്‍കി. സൗദിയിലെത്തിയ ശേഷമുള്ള തൊഴിലുടമയുടെ കീഴില്‍ 12 മാസം പൂര്‍ത്തിയാക്കിയ ശേഷം തൊഴില്‍ മാറുന്നതിന് ചുരുങ്ങിയത് 90 ദിവസം മുമ്പെങ്കിലും സ്‌പോണ്‍സറെ അക്കാര്യം അറിയിക്കണമെന്ന് പുതിയ ഭേദഗതി വ്യവസ്ഥ ചെയ്യുന്നുണ്ട്. അതേസമയം, തൊഴിലുടമ അനുവദിക്കുകയാണെങ്കില്‍ 90 ദിവസം മുമ്പ് അറിയിക്കണമെന്ന നിബന്ധന ബാധകമാവില്ല.
Web Title : easy for expatriates to switch from one job to another in saudi arabia
Malayalam News from malayalam.samayam.com, TIL Network
