ബ്രസീലിയ: ഭർത്താവിനെ കൊന്ന് ജനനേന്ദ്രിയും ഫ്രൈ ചെയ്തെന്ന കേസിൽ ബ്രസീലിൽ യുവതി അറസ്റ്റിൽ. ഡയേൻ ക്രിസ്റ്റീന റോഡ്രിഗസ് മച്ചാദോ എന്ന 33കാരിയാണ് അറസ്റ്റിലായിരിക്കുന്നത്. ബ്രസീലിയൻ നഗരമായ റിയോ ഡി ജനീറയ്ക്ക് സമീപം ജൂൺ ഏഴിനാണ് കൃത്യം നടന്നതെന്ന് അന്താരാഷ്ട്ര മാധ്യമമായ ഡെയ്ലി മെയിലാണ് റിപ്പോർട്ട് ചെയ്തത്. ദമ്പതികളെക്കുറിച്ചും കൊലപാതകത്തിലേക്ക് നയിച്ച വിവരത്തെക്കുറിച്ചും അറിയാം.

​മൃതദേഹം കണ്ടെത്തിയത് വീട്ടിൽ

കൊലപാതക വിവരം ലഭിച്ചതിനെത്തുടർന്ന് ദമ്പതികളുടെ വീട്ടിലെത്തിയ പോലീസ് നടത്തിയ പരിശോധനയിൽ വീട്ടിനുള്ളിൽ നിന്നാണ് യുവാവിന്‍റെ മൃതദേഹം കണ്ടെത്തുന്നത്. നഗ്നമാക്കപ്പെട്ട നിലയിലായിരുന്ന മൃതദേഹം വികൃതമാക്കപ്പെട്ടിരുന്നെന്നും പോലീസ് പറയുന്നു. ആൻഡ്രെ എന്നാണ് കൊല്ലപ്പെട്ടയാളുടെ പേര്. ഇയാളെക്കുറിച്ചുള്ള കൂടുതൽ വിവരങ്ങളൊന്നും അധികൃതർ പുറത്ത് വിട്ടിട്ടില്ല.

​ലിംഗം ഛേദിച്ച് പാചകം ചെയ്തു

പോലീസ് ഉദ്യോഗസ്ഥർ പറയുന്നതിനനുസരിച്ച് ഡയേൻ ഭർത്താവിന്‍റെ ലിംഗം ഛേദിച്ച് ഫ്രൈയിങ് പാനിൽ ഇട്ട് വേവിക്കുകയായിരുന്നു. ഇരുവരും തമ്മിലുള്ള തർക്കത്തിനൊടുവിൽ പുലർച്ചെ നാല് മണിയോടെയാണ് കൃത്യം നടന്നതെന്നാണ് കരുതുന്നത്. ഭർത്താവിനെ കൊല്ലാനും ലിംഗം ഛേദിക്കാനും ഉപയോഗിച്ച കത്തി പോലീസുകാർ സ്ഥലത്ത് നിന്ന് കണ്ടെടുത്തിട്ടുണ്ട്. കൊലപാതകത്തിനും മൃതദഹേത്തെ വികലമാക്കിയതിനുമുള്ള വകുപ്പുകൾ ചുമത്തിയാണ് യുവതിയെ പോലീസ് അറസ്റ്റ് ചെയ്തത്.

​രണ്ട് വർഷമായി വേർപിരിഞ്ഞ് കഴിയുന്നു

പത്ത് വർഷത്തോളം ഒന്നിച്ച് കഴിഞ്ഞ ദമ്പതികൾ, കഴിഞ്ഞ രണ്ടുവർഷമായി വേർപിരിഞ്ഞ് താമസിക്കുകയാണ്. എങ്കിലും ഇവർ പരസ്പരം കാണാറുണ്ടായിരുന്നു. ദമ്പതികൾക്ക് ഏട്ട് വയസുള്ള മകനും, അഞ്ച് വയസുള്ള ഒരു മകളും ഉണ്ട്. എന്നാൽ കൃത്യം നടക്കുന്ന സമയത്ത് കുട്ടികൾ ഇവിടെ ഉണ്ടായിരുന്നോ എന്ന് വ്യക്തമല്ല. സംഭവ ദിവസം രാത്രി ഇവർ ലഘുഭക്ഷണ ശാലയിലേക്ക് പോയിരുന്നെന്നും റിപ്പോർട്ടുകളുണ്ട്.

​സ്വയരക്ഷയ്ക്കായി കൊലപ്പെടുത്തി

ആൻഡ്രെ മച്ചാദോയെ ഭീഷണിപ്പെടുത്തിയിരുന്നെന്നും സ്വയരക്ഷയ്ക്ക് വേണ്ടിയാണ് യുവതി കൃത്യം നടത്തിയതെന്നുമാണ് ഇവരുടെ അഭിഭാഷകൻ പറയുന്നത്. എന്നാൽ തന്നെ ചതിച്ചതിന് പ്രതികാരമായിട്ടാണ് യുവതി സഹോദരനെ കൊന്നതെന്നാണ് ആൻഡ്രെയുടെ സഹോദരി അഡ്രിയാന സാന്‍റോസ് പറയുന്നത്. ദമ്പതികൾ നിരന്തരം വഴക്കിടാറുണ്ടെന്ന് ബന്ധുക്കളും വെളിപ്പെടുത്തിയിട്ടുണ്ട്. ഒരിക്കൽ മച്ചാദോ ഭർത്താവിനെതിരെ പരാതി നൽകിയിരുന്നെന്നും റിപ്പോർട്ടുണ്ട്.

​തർക്കം ബന്ധം അവസാനിപ്പിക്കുന്നതിനെച്ചൊല്ലി

ബന്ധം അവസാനിപ്പിക്കാമെന്ന യുവതിയുടെ നിർദേശം യുവാവ് അംഗീകരിച്ചില്ലെന്നും മച്ചാദോയുടെ അഭിഭാഷകൻ പറയുന്നു. തന്‍റെ ഒപ്പം കഴിയുന്നില്ലെങ്കിൽ മറ്റാർക്കൊപ്പവും യുവതി ഉണ്ടാകില്ലെന്ന് അയാൾ ഭീഷണിപ്പെടുത്തിയിരുന്നു. ഇതിനെച്ചൊല്ലിയുള്ള തർക്കമാണ് കൊലപാതകത്തിൽ അവസാനിച്ചത്. അതേസമയം യുവതിയുടെ മാനസിക നില പരിശോധിക്കണമെന്ന് ആവശ്യം ഉയർന്നിട്ടുണ്ട്. കേസിൽ വിശദമായ അന്വേൽണം പുരോഗമിക്കുകയാണ്.