രാഹുൽ ഗാന്ധിയുടെ വിശ്വസ്തനും തൃണമൂലിലേക്ക്; അശോക് തൻവാറും കീർത്തി ആസാദും കോൺഗ്രസ് വിടുന്നു

ന്യൂഡല്‍ഹി: കോൺഗ്രസ് നേതാക്കളായ കീർത്തി ആസാദും അശോക് തൻവാറും തൃണമൂൽ കോൺഗ്രസിലേക്ക്. ഇന്ന് ഡൽഹിയിൽ വെച്ച് മമത ബാനർജിയുടെ സാന്നിധ്യത്തിൽ ഇരുവരും തൃണമൂൽ പ്രവേശനം നടത്തുമെന്നാണ് റിപ്പോർട്ട്. മുൻ കോൺഗ്രസ് എംപിയായ അശോക് തൻവാർ രാഹുൽ ഗാന്ധിയുമായി അടുപ്പം പുലർത്തുന്ന നേതാവാണ്.



മുൻ ക്രിക്കറ്റ് താരമായ കീർത്തി ആസാദ് ബിജെപിയിൽ നിന്ന് സസ്പെൻഡ് ചെയ്തതിന് പിന്നാലെയാണ് കോൺഗ്രസിലെത്തിയത്. 2018ലായിരുന്നു ഇത്. 1983 ൽ ലോകകപ്പ് നേടിയ ക്രിക്കറ്റ് ടീം അംഗമായിരുന്നു അദ്ദേഹം. ധനകാര്യ മന്ത്രിയായിരുന്ന അരുൺ ജയ്റ്റ്ലിക്കെതിരെ നടത്തിയ വിമർശനങ്ങളെത്തുടർന്നായിരുന്നു ആസാദിനെ ബിജെപി സസ്പെൻഡ് ചെയ്തത്.

Also Read : ബിഹാർ ആവർത്തിക്കുമോ? യുപിയിൽ 100 സീറ്റിൽ മത്സരിക്കുമെന്ന് ഒവൈസി; നേട്ടം ബിജെപിയ്ക്കോ?



ബിഹാറിലെ ദർഭാംഗ മണ്ഡലത്തിൽ നിന്ന് മൂന്ന് തവണ ലോക് സഭയിലേക്ക് തെരഞ്ഞെടുക്കപ്പെട്ട വ്യക്തിയാണ് ആസാദ്. നാലു ദിവസത്തെ സന്ദര്‍ശനത്തിനായാണ് മമത ബാനര്‍ജി ഡല്‍ഹിയില്‍ എത്തിയിരിക്കുന്നത്. സാധാരണ ഡല്‍ഹിയില്‍ വരുമ്പോഴെല്ലാം കോണ്‍ഗ്രസ് അധ്യക്ഷ സോണിയ ഗാന്ധിയുമായി മമത കൂടിക്കാഴ്ച നടത്താറുണ്ട്. എന്നാൽ ഇത്തവണ ഇത് ഉണ്ടാകില്ലെന്നാണ് റിപ്പോർട്ടുകൾ.

Also Read : വീണ്ടും ട്വിസ്റ്റ്; ലഹരിക്കേസിൽ ആര്യനെ കുടുക്കിയതോ? അന്വേഷണത്തിനൊരുങ്ങി മുംബൈ പോലീസ്



ബിജെപി നേതാവും എംപിയുമായ വരുൺ ഗാന്ധി തൃണമൂൽ കോൺഗ്രസിൽ ചേർന്നേക്കുമെന്നും കഴിഞ്ഞദിവസം റിപ്പോർട്ടുകളുണ്ടായിരുന്നു. സുശ്മിത ദേവ്, ബാബുൽ സുപ്രിയോ, ലൂസിഞ്ഞോ ഫലൈറോ, ലിയാണ്ടർ പേസ് തുടങ്ങിയവരുടെ തൃണമൂൽ കോൺഗ്രസ് പ്രവേശനത്തിന് പിന്നാലെയാണ് കൂടുതൽ നേതാക്കൾ പാർട്ടിയിലേക്കെത്തുമെന്ന വാർത്ത പുറത്ത് വരുന്നത്. കോൺഗ്രസ്, ബിജെപി നേതാക്കൾ തൃണമൂലിലേക്കെത്തുന്നത് വരുന്ന നിയമസഭ തെരഞ്ഞെടുപ്പുകളിൽ പാർട്ടിയ്ക്ക് ഗുണമാകുമെന്നാണ് കരുതപ്പെടുന്നത്.