പക്ഷേ, എന്തായിരിക്കും ചര്‍മത്തില്‍ ഇങ്ങനെയൊരു മാറ്റം വരാന്‍ കാരണം?
“ശ്രീദേവി എന്തൊക്കെ സൗന്ദര്യവര്‍ധക വസ്തുക്കളാണ് ഉപയോഗിക്കുന്നത്?, പൗഡര്‍ ഉപയോഗിക്കുന്നുണ്ടോ?, ഏത് സോപ്പാണ് ഉപയോഗിക്കുന്നത്?, ഏതൊക്കെ ക്രീമുകളാണ് പുരട്ടുന്നത്” ഡോക്ടര്‍ ചോദിച്ചു.
മുഖം വെളുക്കാനും തിളങ്ങാനുമായി ക്ലോബിറ്റസോള്‍ (Clobetasol) എന്ന രാസവസ്തു അടങ്ങിയ ക്രീം പുരട്ടാറുണ്ടെന്ന് ശ്രീദേവി ഡോക്ടറോട് വെളിപ്പെടുത്തി. ഒരു സുഹൃത്താണത്രെ ഈ ക്രീം ശുപാര്‍ശ ചെയ്തത്. ഒരു വര്‍ഷത്തിലധികമായി ക്രീം പുരട്ടാറുണ്ടെന്നും ശ്രീദേവി വിശദീകരിച്ചു. ഇതോടെ, ടോപ്പിക്കല്‍ സ്റ്റീറോഡുകളുടെ (topical steroid) ദുരുപയോഗമാണ് പ്രശ്‌നകാരണമെന്ന നിഗമനത്തില്‍ ഡോക്ടര്‍ എത്തി.
പക്ഷേ, മുഖക്കുരുവും ചുവന്ന നിറവും മാത്രമേ ചികില്‍സിച്ചു ഭേദമാക്കാനാവൂ. കണ്‍പോളകളുടെ കട്ടിക്കുറവ് ഇനി പരിഹരിക്കാന്‍ കഴിയാത്ത ഘട്ടത്തില്‍ എത്തിയെന്നും ഡോക്ടര്‍ ശ്രീദേവിയെ അറിയിച്ചു.
വെളുക്കാനായി പലതരം ക്രീമുകള്‍ ഉപയോഗിച്ച് ചര്‍മം നശിച്ച ആദ്യത്തേതോ അവസാനത്തേയോ ആളല്ല ശ്രീദേവിയെന്നാണ് സമയം പ്ലസ് സംസാരിച്ച അഞ്ചിലധികം ത്വക്ക് രോഗ വിദഗ്‍ധര്‍ പറയുന്നത്.
”കഴിഞ്ഞ 35 വര്‍ഷമായി ഞാന്‍ ത്വക്ക് രോഗങ്ങള്‍ക്ക് ചികില്‍സിക്കുന്നു. മുന്നില്‍ വരുന്ന രോഗികളില്‍ പത്ത് ശതമാനവും മുഖം വെളുപ്പിക്കാന്‍ ശ്രമിച്ചതിന്‍റെ പാര്‍ശ്വഫലങ്ങള്‍ നേരിടുന്നവരാണ്. സ്റ്റീറോയ്ഡിന്റെ പ്രവര്‍ത്തനം മൂലം മുഖത്തെ ചര്‍മം കട്ടി കുറഞ്ഞ് നശിക്കുമ്പോള്‍ അല്‍പ്പം വെളുപ്പും തിളക്കവും തോന്നാം. പക്ഷേ, ഇത് പിന്നീട് വലിയ പ്രശ്‌നങ്ങളാണുണ്ടാക്കുക. ഇത്തരം പ്രശ്‌നങ്ങള്‍ ഒറ്റനോട്ടത്തില്‍ മനസിലാക്കാന്‍ കഴിയുന്ന അത്രയും മോശം കേസുകള്‍ ചികില്‍സിച്ചിട്ടുണ്ട്.”– കൊല്ലം ജില്ലയില്‍ നിന്നുള്ള കേരളത്തിലെ ഏറ്റവും മുതിര്‍ന്ന ത്വക്ക് രോഗ ഡോക്ടര്‍മാരിലൊരാള്‍ സമയം പ്ലസിനോട് പറഞ്ഞു.
***
ആലപ്പുഴ സ്വദേശിയായ ലതയുടെ മുഖത്തെ ചുവപ്പ് നിറത്തിനും കുരുപ്പുകള്‍ക്കും കാരണം ഇന്ത്യയിലെ പ്രശസ്‍തമായ ഒരു സൗന്ദര്യവര്‍ധക ക്രീം ആയിരുന്നു. പത്ത് വയസു മുതല്‍ ലത ഈ ക്രീം ഉപയോഗിക്കുമായിരുന്നു. സൗന്ദര്യവര്‍ധക ക്രീം ഉപയോഗം ഉടനടി നിര്‍ത്താനാണ് ലതയ്ക്ക് ഡോക്ടര്‍ നിര്‍ദേശം നല്‍കിയത്. തുടര്‍ന്ന് ചില മരുന്നുകളും കാരം കുറഞ്ഞ സോപ്പും നിര്‍ദേശിച്ചു. ചര്മത്തിന്റെ ആരോഗ്യം തിരികെ കൊണ്ടുവരാന്‍ സമീകൃത ആഹാരം കഴിക്കാനും നിര്‍ദേശിച്ചു. തുടര്‍ന്ന് ഒരു മാസമെടുത്താണ് പ്രശ്‌നം പരിഹരിച്ചത്.
യു.എസില്‍ ആഫ്രിക്കന്‍-അമേരിക്കന്‍ വംശജനായ ജോര്‍ജ് ഫ്‌ളോയിഡിനെ പോലീസുകാരന്‍ കൊലപ്പെടുത്തിയ സംഭവത്തെ തുടര്‍ന്ന് ‘ബ്ലാക്ക് ലൈവ്‌സ് മാറ്റര്‍’ എന്ന പേരില്‍ ലോകമെമ്പാടും ശക്തമായ പ്രതിഷേധമാണ് നടന്നത്. വര്‍ണ്ണവിവേചനവും അടിച്ചമര്‍ത്തലും സംബന്ധിച്ച ചര്‍ച്ചകള്‍ സജീവമായതോടെ ‘ഇരുണ്ട നിറം’ മോശമാണെന്ന രീതിയിലുള്ള പരസ്യങ്ങളും പ്രചരണങ്ങളും സൗന്ദര്യവര്‍ധക കമ്പനികള്‍ക്ക് ഉപേക്ഷിക്കേണ്ടി വന്നു. അങ്ങനെ ഒരു കമ്പനി പേരു മാറ്റിയ ഒരു ഉല്‍പ്പന്നമാണ് ലത ഉപയോഗിച്ചത്. പക്ഷേ, ഇത്തരം വസ്തുക്കളുടെ പാര്‍ശ്വഫലങ്ങള്‍ തുടരുകയാണെന്നാണ് ലതയുടെ അനുഭവം പറയുന്നത്.
”വെളുപ്പാണ് സുന്ദരമെന്ന കാഴ്ച്ചപ്പാടാണ് ചര്മത്തിന്റെ ആരോഗ്യത്തെ പ്രതികൂലമായി ബാധിക്കുന്നത്. എന്‍റെ ഒ.പിയില്‍ എത്തുന്ന നൂറിലൊരാളെങ്കിലും വെളുക്കാന്‍ സഹായിക്കണമെന്നാണ് ആവശ്യപ്പെടാറ്. അപ്പോള്‍ എത്രയോ പേരായിരിക്കും വെളുക്കാനായി ബ്യൂട്ടി ക്ലിനിക്കുകളെയും മറ്റും സമീപിക്കുന്നുണ്ടാവുക. അവിടെ അവര്‍ എന്തൊക്കെയായിരിക്കും ചെയ്യുന്നുണ്ടാവുക.”– ഒരു സീനിയര്‍ ഡോക്ടര്‍ ആശങ്ക പങ്കുവെച്ചു.
ഏറെ അപകടകരമായ ‘വെളുപ്പിക്കല്‍’ ക്രീമുകള്‍ നിരവധി മാര്‍ഗങ്ങളിലൂടെയാണ് ജനങ്ങളിലേക്ക് എത്തുന്നത്. ഓണ്‍ലൈന്‍ സ്‌റ്റോറുകളില്‍ നിന്നും മെഡിക്കല്‍ സ്‌റ്റോറുകളിലെ ‘ഓവര്‍ ദ കൗണ്ടര്‍’ വില്‍പ്പന (പ്രിസ്‍ക്രിപ്ഷൻ ഇല്ലാതെ) യിലൂടെയും ബ്യൂട്ടിപാര്‍ലറുകളിലൂടെയും ഇവ ജനങ്ങളില്‍ എത്തുന്നു. സോഷ്യല്‍ മീഡിയയിലും യൂട്യൂബിലും ഇത്തരം ഉല്‍പ്പന്നങ്ങളുടെ പരസ്യം വ്യാപകമാണ്. വെറുതെ ഗൂഗിളില്‍ സെര്‍ച്ച് ചെയ്താല്‍ പോലും ഓണ്‍ലൈന്‍ ഷോപ്പുകളിലെ പരസ്യം കാണാനാവും. കൂടാതെ സുഹൃത്തുക്കളും ക്രീമുകള്‍ ശുപാര്‍ശ ചെയ്യുന്നു.
”എം.ബി.ബി.എസും എം.ഡിയുമെല്ലാം പഠിച്ചാണ് ഡോക്ടര്‍മാര്‍ സ്‌കിന്‍ പ്രശ്‌നങ്ങള്‍ കൈകാര്യം ചെയ്യുന്നത്. മൂന്നുമാസത്തെ സര്‍ട്ടിഫിക്കറ്റ് കോഴ്‌സും ആറു മാസത്തെ ഡിപ്ലോമ കോഴ്‌സുമെല്ലാം പഠിച്ച് ബ്യൂട്ടീഷ്യന്‍മാരാവുന്നവര്‍ വെളുക്കാന്‍ ആഗ്രഹിക്കുന്നവര്‍ക്ക് സ്റ്റീറോയിഡ് അടങ്ങിയ മോയ്‍സ്‍ചുറൈസിങ് ക്രീമുകള്‍ നല്‍കുന്നുണ്ടെന്നാണ് വിലയിരുത്തല്‍. ഇത്തരം ക്രീമുകള്‍ പുരട്ടി പ്രശ്‌നങ്ങള്‍ നേരിടുന്നവരെ കാണുമ്പോള്‍ തന്നെ സ്റ്റീറോയ്ഡ് ‘മണക്കും.’ നിരവധി പേരാണ് ഇത്തരം പ്രശ്‌നങ്ങളുമായി ത്വക്ക് രോഗ വിദഗ്ദരെ സമീപിക്കുന്നത്. പക്ഷേ, അവരാരും പ്രശ്‌നത്തിന് കാരണമായ സ്ഥാപനങ്ങള്‍ക്കും വ്യക്തികള്‍ക്കുമെതിരെ നിയമ നടപടികള്‍ സ്വീകരിക്കാറില്ല.”– സീനിയര്‍ ഡോക്ടര്‍ പറയുന്നു.
ചര്‍മ്മവീക്കം, ചൊറിച്ചില്‍, എക്‌സിമ, സോറിയാസിസ് തുടങ്ങിയ രോഗങ്ങള്‍ ചികിത്സിക്കാന്‍ സ്റ്റീറോയ്ഡ് അടങ്ങിയ ക്രീമുകള്‍ സഹായിക്കും. പക്ഷേ, ഡോക്ടറുടെ നിര്‍ദേശത്തിന്‍റെ അടിസ്ഥാനത്തില്‍ നിശ്ചിതകാലത്തേക്ക് മാത്രമേ ഇത്തരം മരുന്നുകള്‍ ഉപയോഗിക്കാവൂയെന്നാണ് വ്യവസ്ഥ. വ്യത്യസ്ത വീര്യങ്ങളിലുള്ള സ്റ്റീറോയ്ഡുകളുള്ളതിനാല്‍ മരുന്നു പുരട്ടേണ്ട ഭാഗത്തെ ചര്മത്തിന്റെ സ്വഭാവവും രോഗിയുടെ പ്രായവും കൂടി പരിഗണിച്ചാണ് ഉചിതമായത് നിര്‍ദേശിക്കുക. ഇത്തരത്തിലുള്ള ഒരു ക്രീമാണ് സുഹൃത്തിന്റെ നിര്‍ദേശപ്രകാരം മെഡിക്കല്‍ ഷോപ്പില്‍ നിന്ന് വാങ്ങി ശ്രീദേവി ഉപയോഗിച്ചത്.
സ്റ്റീറോയ്ഡിന്റെ പ്രവര്‍ത്തനം മൂലം ചര്മത്തിന്റെ കട്ടി കുറയുന്നതിനാല്‍ വെളുത്തെന്ന പ്രതീതിയുണ്ടാവാം. പക്ഷേ, സ്റ്റീറോയ്ഡ് ദുരുപയോഗം നിരവധി ചര്‍മപ്രശ്‌നങ്ങള്‍ക്കു കാരണമാവുമെന്നാണ് ഡോക്ടര്‍മാരുടെ അനുഭവങ്ങളും നിരവധി പഠനങ്ങളും പറയുന്നത്. ചര്മത്തിന്റെ കട്ടികുറയല്‍, നിറംമാറ്റം, അസാധാരണമായ മുഖക്കുരു, രക്തം പൊടിയല്‍, ചര്‍മത്തിനടിയിലെ രക്തക്കുഴലുകളുടെ സ്ഥിരം വികാസം, വട്ടച്ചൊറി പോലുള്ള രോഗങ്ങള്‍ പടരല്‍ തുടങ്ങിയവയാണ് പ്രധാന പ്രശ്‌നങ്ങളെന്ന് ത്വക്ക് രോഗ വിദഗ്ദരുടെ സംഘടനയായ ഐ.എ.ഡി.വി.എല്ലിന് കീഴിലുള്ള ടാസ്‌ക് ഫോഴ്‌സ് എഗയിന്‍സ്റ്റ് ടോപ്പിക്കല്‍ സ്റ്റീറോയ്ഡ് എബ്യൂസ് (ഐ.ടി.എ.ടി.എസ്.എ) പറയുന്നു.
സ്റ്റീറോയ്ഡ് അടങ്ങിയ ക്രീമുകള്‍ ഡോക്ടറുടെ നിര്‍ദേശപ്രകാരം മാത്രമേ വില്‍ക്കാന്‍ അനുവദിക്കാവൂ എന്ന് ആവശ്യപ്പെട്ട് ഐ.എ.ഡി.വി.എല്‍ 2017ല്‍ ഡല്‍ഹി ഹൈക്കോടതിയെ സമീപിച്ചിരുന്നു. കോര്‍ട്ടിക്കോ സ്റ്റീറോയിഡ് അടങ്ങിയ ക്രീമുകളുടെ ഉത്തരവാദിത്ത രഹിതമായ വില്‍പ്പന ജനങ്ങളുടെ ആരോഗ്യത്തെ പ്രതികൂലമായി ബാധിക്കുകയാണെന്നാണ് സംഘടന ഹര്‍ജിയില്‍ ചൂണ്ടിക്കാട്ടിയത്. തുടര്‍ന്ന് 14 തരം സ്റ്റീറോയ്ഡുകളെ കേന്ദ്രസര്‍ക്കാര്‍ ഡ്രഗ്‌സ് ആന്‍റ് കോസ്‌മെറ്റിക്‌സ് ചട്ടങ്ങളിലെ ഷെഡ്യൂള്‍ എച്ചില്‍ ഉള്‍പ്പെടുത്തി. അതായത്, ഡോക്ടറുടെ കുറിപ്പില്ലാതെ ഇവ മെഡിക്കല്‍ ഷോപ്പുകളിലൂടെ വില്‍ക്കരുതെന്നാണ് ഇപ്പോഴത്തെ നിയമം.
ഷെഡ്യൂൾ എച്ച്-ലേക്ക് മാറ്റിയ ക്രീമുകളില്‍ അടങ്ങിയ ഘടകങ്ങള്‍
Alclometasone, Beclomethasone, Betamethasone, Desonide, Desoximetasone, Dexamethasone, Diflorasone diacetate, Fluocinonide, Fluocinolone acetonide, Halobetasol propionate, Halometasone, Methylprednisone, Prednicarbate, Triamcinolone acetonide
പക്ഷേ, ഇത്തരം സ്റ്റീറോയ്ഡുകള്‍ അടങ്ങിയ ക്രീമുകള്‍ സംസ്ഥാനത്തെ വിവിധ മെഡിക്കല്‍ ഷോപ്പുകളില്‍ നിന്നും ഡോക്ടറുടെ കുറിപ്പില്ലാതെ പൊതുജനങ്ങള്‍ക്ക് വാങ്ങാനാവുമെന്നാണ് സംസ്ഥാനത്തെ മെഡിക്കല്‍ ഷോപ്പുകളില്‍ ‘സമയം പ്ലസ്’ നടത്തിയ അന്വേഷണത്തില്‍ കണ്ടെത്തിയത്.
ഫംഗസ് ബാധക്കുള്ള മരുന്നാണ് ‘സമയം പ്ലസ്’ പ്രതിനിധി തൃശൂരിലെ മെഡിക്കല്‍ ഷോപ്പുകളില്‍ ചോദിച്ചത്. പത്തോളം കടകളില്‍ നടത്തിയ അന്വേഷണത്തില്‍ ഭൂരിപക്ഷം എണ്ണത്തില്‍ നിന്നും ഷെഡ്യൂള്‍ എച്ചില്‍ ഉള്‍പ്പെട്ട ക്രീമുകള്‍ ഡോക്ടറുടെ കുറിപ്പില്ലാതെ തന്നെ ലഭിച്ചു. ആദ്യ ചോദ്യത്തില്‍ തന്നെ പലരും ഇത്തരം ക്രീമുകളാണ് എടുത്തുനല്‍കിയത്. ഒരു മെഡിക്കല്‍ ഷോപ്പില്‍ നിന്നുമാത്രമാണ് സ്റ്റീറോയ്ഡ് അടങ്ങാത്ത ആന്‍റിഫംഗല്‍ ക്രീം ലഭിച്ചത്.
കൂടാതെ മുഖത്തെ പാടുകളും വടുക്കളും മാറാന്‍ സഹായിക്കുമെന്ന് അവകാശപ്പെടുന്ന നിരവധി തരം ക്രീമുകളും മെഡിക്കല്‍ സ്റ്റോറുകളിലും മറ്റു സൗന്ദര്യവര്‍ധകവസ്തുക്കള്‍ വില്‍ക്കുന്ന ഷോപ്പുകളിലും കണ്ടെത്താനായി. ഇതില്‍ ചിലത് നിയന്ത്രണങ്ങള്‍ ലംഘിച്ചാണ് വില്‍ക്കുന്നതെന്നും ഡോക്ടര്‍മാര്‍ ചൂണ്ടിക്കാട്ടുന്നു.
സ്റ്റീറോയ്ഡ് അടങ്ങിയ ക്രീമുകളുടെ ദുരുപയോഗം ശരീരത്തിലെ കോര്‍ട്ടിസോള്‍ ഹോര്‍മോണിന്റെ അളവില്‍ വ്യതിയാനമുണ്ടാക്കുമെന്നും കണ്ടെത്തിയിട്ടുണ്ട്. സോറിയാസിസ് രോഗത്തിന് ഇത്തരം ക്രീമുകള്‍ ധാരാളമായി ഉപയോഗിച്ച ഒരു യുവാവിന്‍റെ ശരീരത്തില്‍ അടുത്തിടെ ഹോര്‍മോണ്‍ പ്രശ്‌നങ്ങള്‍ കണ്ടെത്തിയിരുന്നു. ഹോര്‍മോണ്‍ അളവ് സാധാരണതോതിലേക്ക് മാറ്റിയ ശേഷമേ ഇത്തരം കേസുകള്‍ ചികില്‍സ ഫലിക്കൂയെന്നാണ് ഡോക്ടര്‍മാരുടെ അനുഭവം പറയുന്നത്. മുഖത്തെ സ്റ്റീറോയ്ഡ് ദുരുപയോഗം ചിലരില്‍ തിമിരത്തിന് കാരണമാവുന്നതായും ഡോക്ടര്‍മാര്‍ കണ്ടെത്തിയിട്ടുണ്ട്.
സ്റ്റീറോയ്ഡ് ക്രീമുകള്‍ക്ക് ചര്‍മം അടിമപ്പെടാറുണ്ടെന്നാണ് പഠനങ്ങള്‍ പറയുന്നത്. ”സ്‌കിന്‍ സ്റ്റീറോയ്ഡിന് അഡിക്ടായി കഴിഞ്ഞാല്‍ പിന്നെ ഉപയോഗം നിര്‍ത്തല്‍ പ്രയാസമേറിയ കാര്യമാണ്. ഉപയോഗം നിര്‍ത്തിയാല്‍ ഉടന്‍ ചര്‍മത്തില്‍ കുരുക്കളും ചുവപ്പുനിറവും ഉണ്ടാവാം. അതിനാലാണ് പലരും സ്റ്റീറോയ്ഡ് ക്രീം ഉപയോഗം തുടരുന്നത്. സ്റ്റീറോയ്ഡ് മൂലമുണ്ടാവുന്ന പ്രശ്‌നങ്ങള്‍ പരിഹരിക്കാവുന്നതാണ്. പക്ഷേ, ഒരു ഘട്ടം കഴിഞ്ഞാല്‍ പിന്നെയൊരു തിരിച്ചുവരവുണ്ടാവില്ല. ശ്രീദേവിയുടെ കേസ് അത്തരമൊന്നാണ്”– പേരു വെളിപ്പെടുത്താന്‍ ആഗ്രഹിക്കാത്ത മറ്റൊരു ഡോക്ടര്‍ പറഞ്ഞു.
പുഴുക്കടി, വട്ടച്ചൊറി, വളംകടി പോലുള്ള ഫംഗസ് രോഗങ്ങള്‍ക്ക് സ്റ്റീറോയ്ഡ് അടങ്ങിയ ക്രീമുകള്‍ ഉപയോഗിക്കുന്നത് വലിയ ദോഷമാണുണ്ടാക്കുകയെന്ന് ടാസ്‌ക് ഫോഴ്‌സ് എഗയിന്‍സ്റ്റ് ടോപ്പിക്കല്‍ സ്റ്റീറോയ്ഡ് അബ്യൂസിന്റെ കേരള ഘടകം ഭാരവാഹികള്‍ സമയം പ്ലസിനോട് പറഞ്ഞു. സ്റ്റീറോയ്ഡുകള്‍ ഫംഗസുകളെ നശിപ്പിക്കില്ലെന്നു മാത്രമല്ല അവയെ വളരാന്‍ സഹായിക്കുകയും ചെയ്യുമെന്നതാണ് ഇതിന് കാരണം.
പായല്‍ വര്‍ഗത്തില്‍ പെടുന്ന ഫംഗസിന് വളരാന്‍ വേണ്ട പോഷകങ്ങള്‍ സ്റ്റീറോയ്ഡ് നല്‍കുന്നു. യു.എസ് സര്‍ക്കാരിന് കീഴിലെ സെന്റേഴ്‌സ് ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷനും ഇക്കാര്യത്തില്‍ മുന്നറിയിപ്പ് നല്‍കിയിട്ടുണ്ട്. പുഴുക്കടി, വട്ടച്ചൊറി, വളംകടി പോലുള്ള രോഗാവസ്ഥകള്‍ക്ക് മരുന്നായി മെഡിക്കല്‍ ഷോപ്പുകളില്‍ നിന്നു ഓവര്‍ ദ കൗണ്ടറായി നല്‍കുന്ന ക്രീമുകളില്‍ പലതിലും പലതരം സ്റ്റീറോയ്ഡുകളുണ്ടാവും. കൂടാതെ മറ്റു പല രോഗാവസ്ഥകള്‍ക്കുള്ള മരുന്നുകള്‍ കൂടി അവയില്‍ അശാസ്ത്രീയമായി ഉള്‍പ്പെടുത്തിയിരിക്കുകയാണ്.
”സ്റ്റീറോയ്ഡ് അടങ്ങിയ ക്രീമുകളുടെ ദുരുപയോഗം മൂലം ശക്തിയാര്‍ജിച്ച ഫംഗസുകള്‍ ഇന്ത്യയില്‍ ഒരു മഹാമാരി പോലെ പടരുകയാണ്. അതിനോടൊപ്പം തന്നെ ടോപ്പിക്കല്‍ സ്റ്റീറോയ്ഡ് അടങ്ങിയ വെളുപ്പിക്കല്‍ ക്രീമുകളുടെ ഏറ്റവും വലിയ വിപണിയായി കേരളവും മാറിയിരിക്കുകയാണ്.”–ടാസ്‌ക് ഫോഴ്‌സ് എഗയിന്‍സ്റ്റ് ടോപ്പിക്കല്‍ സ്റ്റീറോയ്ഡ് അബ്യൂസിന്റെ കേരള ഘടകം ഭാരവാഹി ആശങ്ക പങ്കുവെച്ചു.
****
(ഈ അന്വേഷണ വാര്‍ത്താറിപ്പോര്‍ട്ടില്‍ പ്രതിപാദിച്ചിരിക്കുന്ന വ്യക്തികളുടെ പേരുകള്‍ യഥാര്‍ഥമല്ല. വെളിപ്പെടുത്തലുകളുടെ സ്വഭാവവും സ്വകാര്യതയും മാനിച്ച് ഡോക്ടര്‍മാരുടെ പേരുകള്‍ പരസ്യമാക്കുന്നില്ല)
