നമുക്കുള്ള പല അസുഖങ്ങളുടേയും ലക്ഷണം ശരീരം തന്നെ പലപ്പോഴും നമ്മെ കാണിച്ചു തരും. എന്നാല്‍ പലപ്പോഴും നാം ഇത്തരം ലക്ഷണങ്ങള്‍ നാം അവഗണിയ്ക്കും. അല്ലെങ്കില്‍ ചിലപ്പോള്‍ തിരിച്ചറിയാറുമില്ല.ചിലരുടെ കാലുകളിലും തുടകളിലുമായി ചര്‍മ്മത്തിന് പുറത്തേക്കായി ഞരമ്പുകള്‍ കെട്ടുപിണഞ്ഞ് കിടക്കുന്നത് കാണാറുണ്ട്. ? ഇതൊരുപക്ഷേ ഡീപ് വെയിന്‍ ത്രോംബോസിസ് ലക്ഷണമായി വരാം.പലരും വല്ലാതെ അവഗണിച്ചു കളയുന്ന ഇത് ചിലപ്പോഴെങ്കിലും സീരിയസ് രോഗങ്ങളിലേയ്ക്ക് വഴിയൊരുക്കും. ഇത്തരം പ്രശ്‌നങ്ങള്‍ തുടക്കത്തിലേ ശ്രദ്ധിക്കുകയും വേണ്ട ചികിത്സ തേടുകയും ചെയ്തില്ലെങ്കില്‍ ഒരുപക്ഷേ ജീവന്‍ തന്നെ നഷ്ടമായേക്കാം.

ഡീപ് വെയിന്‍ ത്രോംബോസിസ്

രക്തം കട്ട പിടിച്ചുകിടക്കുന്നതാണ് ഇത്തരത്തില്‍ പുറത്തേക്ക് കാണുന്നത്. ഞരമ്പിനകത്ത് രക്തം കട്ടയായി കിടക്കുന്ന അവസ്ഥയാണ് ഡീപ് വെയിന്‍ ത്രോംബോസിസ് . ഒന്നോ അതിലധികമോ ഞരമ്പുകളില്‍ ഇത് സംഭവിക്കാം, പ്രത്യേകിച്ച് കാലുകളില്‍. ഇതു സംഭവിയ്ക്കാന്‍ കാരണങ്ങള്‍ പലതുമുണ്ട്.ദീര്‍ഘനേരം അനക്കമില്ലാതെ ഒരേ രീതിയില്‍ ശരീരം വയ്ക്കുന്നത്, മണിക്കൂറുകളോളം ഒരേ ഘടനയില്‍ നിന്ന് ജോലി ചെയ്യുന്നത്, ദോഷകരമായ രീതിയില്‍ ഉറങ്ങുന്നത്, എല്ലാം ഡീപ് വെയിന്‍ ത്രോംബോസിസ് കാരണമായേക്കാം. ശരീരത്തില്‍ പരിക്കുകളോ മറ്റോ സംഭവിക്കുന്ന സാഹചര്യത്തില്‍ രക്തം കട്ട പിടിക്കുന്നത് നല്ലതാണ്. അതുപോലെ ചലനമില്ലാത്ത അവസ്ഥയില്‍ രക്തം കട്ട പിടിച്ച് ശരീരത്തിലെവിടെയെങ്കിലും കിടപ്പുണ്ടെങ്കില്‍ അതും അപകടകരമല്ല.

രക്തം കട്ട പിടിച്ചുകിടക്കുന്നത്

അതേസമയം രക്തം കട്ട പിടിച്ചുകിടക്കുന്നത് ഒരിടത്തു നിന്നും നീങ്ങിഅത് തലച്ചോറിലോ ശ്വാസകോശത്തിലോ എല്ലാം എത്തുന്നപക്ഷം അത് മരണം വരെ സംഭവിയ്ക്കാന്‍ കാരണമാകും വിധത്തില്‍ അപകടമാണ്. കട്ട പിടിച്ചുകിടക്കുന്ന രക്തം പൊട്ടുകയും അത് ശ്വാസകോശത്തിലേക്കോ തലച്ചോറിലേക്കോ നീങ്ങുകയും ചെയ്യുന്നതോടെയാണ് ഇങ്ങനെ പെട്ടെന്നുള്ള മരണം സംഭവിക്കുന്നത്. ലക്ഷണങ്ങളിലൂടെ ഡിവിടി മനസിലാക്കാന്‍ നമുക്ക് സാധിക്കും. അത്തരത്തിലൊരു പ്രധാന ലക്ഷണമാണ് കാലില്‍ ഞരമ്പുകള്‍ കെട്ടുപിണഞ്ഞ് കിടക്കുന്നത്.

അധികവും ഒരു കാലില്‍

അധികവും ഒരു കാലില്‍ എന്ന രീതിയിലായിരിക്കും വേദന. കണങ്കാല്‍, തുട എന്നിവിടങ്ങളിലെ വേദന പ്രത്യേകം കരുതുക. ഇത്തരത്തില്‍ ഞരമ്പുകള്‍ പിണഞ്ഞു കിടക്കുന്നയിടങ്ങളില്‍ അസാധാരണമായ മാര്‍ദ്ദവം, കുത്തുന്നത് പോലുള്ള വേദന, വീക്കം എന്നിവ കാണുന്നപക്ഷം വേഗത്തില്‍ തന്നെ മെഡിക്കല്‍ സഹായം തേടുക.കാല്‍ ചുവന്ന നിറം പടരുന്നതും ശ്രദ്ധിക്കുക. ഞരമ്പുകള്‍ പുറത്തേക്ക് തള്ളിനില്‍ക്കുന്നത് പോലെ കാണപ്പെടുന്നതും ഡിവിടിയുടെ ലക്ഷണമാകാം. ഇവിടങ്ങളില്‍ തൊടാന്‍ സാധിക്കാത്തത് പോലെ വേദനയും അനുഭവപ്പെടാം.

ഡിവിടി

ഡിവിടി അപൂര്‍വ്വമായ ഒരസുഖമല്ല. ദിവസവും പലര്‍ക്കും ഡിവിടി മൂലമുള്ള സങ്കീര്‍ണതകളാല്‍ ജീവന്‍ നഷ്ടമാകുന്നുണ്ടെന്നാണ് പഠനങ്ങള്‍ പറയുന്നത്. വളരെ പെട്ടെന്നുള്ള മരണമായിരിക്കും അധികവും ഇത്തരത്തില്‍ സംഭവിക്കുകയെന്നും പഠനങ്ങള്‍ പറയുന്നത്. അതിനാല്‍ തന്നെ ഇക്കാര്യം ഏവരും ശ്രദ്ധിക്കേണ്ടതുണ്ട്. നേരത്തെ കണ്ടെത്തിയാല്‍ കൃത്യമായി പരിഹാരമുള്ള ഇത് അവഗണിയ്ക്കുന്നതാണ് പലപ്പോഴും പ്രശ്‌നങ്ങള്‍ക്ക് കാരണമാകുന്നത്. ഇത് ഒഴിവാക്കാന്‍ ശ്രദ്ധിയ്ക്കുക.