കണ്ടും കളിച്ചും പഠിക്കാം
ദോഹയുടെ ഹൃദയഭാഗത്ത് ഒരുങ്ങുന്ന കുട്ടികള്‍ക്ക് മാത്രമായുള്ള മ്യൂസിയത്തിന്റെ ലോഗോയും പേരും അധികൃതര്‍ പുറത്തുവിട്ടു. ദാദു എന്നു പേരിട്ടിരിക്കുന്ന മ്യൂസിയത്തിന്റെ പ്രവര്‍ത്തനങ്ങള്‍ കുട്ടികളെയും അവരുടെ കുടുംബത്തെയും ഒരു പോലെ വിസ്മയിപ്പിക്കും. കളിക്കിടെ രൂപപ്പെടുന്ന അടയാളങ്ങള്‍ അല്ലെങ്കില്‍ സര്‍ഗാത്മകമായ പ്രവര്‍ത്തനങ്ങള്‍ തുടങ്ങിയവയ്ക്കാണ് അറബി ഭാഷയില്‍ ദാദു എന്ന വാക്ക് കൊണ്ട് അര്‍ഥമാക്കുന്നത്. ഒരു ശില്‍പി കല്ലുകളില്‍ തീര്‍ക്കുന്ന കൊത്തുപണിക്കും ദാദു എന്നു പറയും.
കുട്ടികളില്‍ സര്‍ഗാത്മകത വളര്‍ത്തുക ലക്ഷ്യം
ഒരു മരുപ്പച്ചയുടെ മാതൃകയില്‍ രൂപകല്‍പ്പന ചെയ്തിരിക്കുന്ന മ്യൂസിയത്തില്‍ ഇന്‍ഡോര്‍, ഔട്ട്ഡോര്‍ ആക്ടിവിറ്റികള്‍ക്കുള്ള സൗകര്യങ്ങള്‍ ഒരുക്കിയിട്ടുണ്ട്. കുട്ടികളുടെ ബുദ്ധിപരമായ വികാസം ലക്ഷ്യമാക്കിയുള്ള കളികള്‍, അവരില്‍ ജിജ്ഞാസ വളര്‍ത്തുന്നതിനു വേണ്ടിയുള്ള കാഴ്ചകള്‍, പ്രവര്‍ത്തനങ്ങള്‍, പരസ്പര സഹകരണത്തിനും ചര്‍ച്ചകള്‍ക്കും ഉതകുന്ന പദ്ധതികള്‍, സര്‍ഗാത്മകത വര്‍ധിപ്പിക്കുന്നതിനും ഉത്തരവാദിത്ത ബോധം വളര്‍ത്തുന്നതിനുമുള്ള വഴികള്‍ തുടങ്ങിയവ ഉള്‍പ്പെടുന്നതാണ് ദാദു ചില്‍ഡ്രന്‍സ് മ്യൂസിയം. ഖത്തര്‍ മ്യൂസിയംസ് അധ്യക്ഷ ശെയ്ഖ അല്‍ മയാസ ബിന്‍ത് ഹമദ് അല്‍താനിയുടെ മേല്‍നോട്ടത്തിലാണ് ദാദു ഒരുങ്ങുന്നത്. ഏറ്റവും പുതിയ പഠന തത്വങ്ങളുടെയും പഠന മനശ്ശാസ്ത്രത്തിന്റെയും അടിസ്ഥാനത്തിലാണ് ദാദു മ്യൂസിയം ഒരുക്കിയിട്ടുള്ളതെന്ന് ഡയറക്ടര്‍ ഈസ്സ അല്‍ മന്നായി പറഞ്ഞു.
കുട്ടികള്‍ക്കായി ഓണ്‍ലൈന്‍ പരിപാടികളും
കുട്ടികള്‍ക്കു വേണ്ടിയുള്ള നിരവധി പ്രവര്‍ത്തനങ്ങള്‍ ഖത്തര്‍ മ്യൂസിയംസ് നേരത്തേ നടത്തിവരുന്നുണ്ട്. കൊവിഡ് കാലത്ത് ഓണ്‍ലൈന്‍ വഴി രസകരമായ പല പരിപാടികളും കുട്ടികള്‍ക്കായി സംഘടിപ്പിച്ചിരുന്നു. ഇതേത്തുടര്‍ന്നാണ് ദാദു എന്ന പേരില്‍ കുട്ടികള്‍ക്കു വേണ്ടി മാത്രമായി ഒരു മ്യൂസിയം എന്ന ആശയം ഉടലെടുത്തത്. കൊവിഡ് സാഹചര്യത്തില്‍ മ്യൂസിയം ഔദ്യോഗികമായി തുറന്നിട്ടില്ലെങ്കിലും ഓണ്‍ലൈന്‍ പ്രവര്‍ത്തനങ്ങള്‍ തുടരുമെന്നും അദ്ദേഹം അറിയിച്ചു. സ്വദേശികളും പ്രവാസികളുമായ കുട്ടികള്‍ക്ക് ഒരു തടസ്സവും കൂടാതെ ദാദുവിലെ സൗകര്യങ്ങള്‍ ഉപയോഗപ്പെടുത്താം. പൊതുജന സാമ്പത്തിക പങ്കാളിത്തത്തോടെയുള്ള ഖത്തറിലെ ആദ്യ മ്യൂസിയം കുടിയാണ് ദാദു. ദാദുവിന്റെ ഓണ്‍ലൈന്‍ പരിപാടിയില്‍ പങ്കെടുക്കാന്‍ ആഗ്രഹിക്കുന്നവര്‍ക്ക് @DaduQatar എന്ന ഔദ്യോഗിക ഇന്‍സറ്റഗ്രാം അക്കൗണ്ടില്‍ ബന്ധപ്പെടാവുന്നതാണെന്നും അധികൃതര്‍ അറിയിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : qatar museums introduces dadu childrens museum of qatar
Malayalam News from malayalam.samayam.com, TIL Network
