ലഹരി പാർട്ടിയിൽ പങ്കെടുത്തവരിൽ ഹോട്ടൽ ഉടമയും; സൈജുവിന്റെ ഫോണിലെ തെളിവുകൾ ഉന്നതർക്കും കുരുക്കാകുമോ?

കൊച്ചി: മോഡലുകൾ വാഹനാപകടത്തിൽ കൊല്ലപ്പെട്ട സംഭവത്തിലെ മുഖ്യപ്രതി കൊല്ലം നല്ലില സ്വദേശി സൈജു എം തങ്കച്ചന്റെ (41) ഫോണിൽ ഞെട്ടിക്കുന്ന ദൃശ്യങ്ങൾ. സ്ത്രീകളുടെ ശരീരത്തിൽ രാസലഹരി വസ്തുക്കൾ വിതറി ഒന്നിലധികം പുഷുന്മാർ ചേർന്ന് പീഡിപ്പിക്കുന്നതിന്റെ ദൃശ്യങ്ങളാണ് കണ്ടെത്തിയിരിക്കുന്നത്. അൻപതിലധികം വീഡിയോകളാണ് കണ്ടെത്തിയത്.



ലഹരി ഉപയോഗിക്കുന്നതിന്റെയും പ്രകൃതിവിരുദ്ധ പീഡനത്തിന്റെയും ദൃശ്യങ്ങൾ കൂട്ടത്തിലുണ്ട്. ഹോട്ടൽ 18 ഉടമ റോയ് അടക്കമുള്ള ഉന്നതർ ലഹരി പാർട്ടികളിൽ പങ്കെടുത്തതിന്റെ ദൃശ്യങ്ങളും പോലീസിന് ലഭിച്ചു. ദൃശ്യങ്ങളിലുള്ള ആളുകളുടെ പേരു വിവരങ്ങളും ഫോൺ നമ്പറും സൈജു അന്വേഷണ സംഘത്തിന് കൈമാറി.

Also Read: യുവതികളുടെ ശരീരത്തിൽ എംഡിഎംഎ വിതറി, ഫോണിൽ സൈജുവിന്‍റെ പീഡന ദൃശ്യങ്ങളും

ലഹരി മരുന്നുമായി ബന്ധപ്പെട്ട് സമൂഹമാധ്യമങ്ങളിൽ സൈജു നടത്തിയ ചാറ്റിന്റെ വിശദാംശങ്ങൾ പോലീസ് ശേഖരിച്ചിട്ടുണ്ട്. സൈറ ബാനു എന്ന പ്രൊഫൈലുമായി നടത്തിയ ചാറ്റിൽ ലഹരിമരുന്ന് പാർട്ടി നടത്തിയതായും കാട്ടുപോത്തിനെ വെടിവെച്ചു കൊന്നതായും സൈജു വ്യക്തമാക്കുന്നുണ്ട്. 2021 ജുലൈ 26 നാണ് ഈ സംഭാഷണം നടന്നിട്ടുള്ളത്. കൊച്ചി, മൂന്നാർ, ഗോവ എന്നിവിടങ്ങളിൽവെച്ചു നടത്തിയ ലഹരി പാർട്ടികളുടെ വിവരങ്ങളും അന്വേഷണ സംഘത്തിന് ലഭിച്ചിട്ടുണ്ട്- മനോരമ ന്യൂസ് റിപ്പോർട്ട് ചെയ്തു.

Also Read: പള്ളികൾ മുസ്ലിം ലീഗിന്‍റെ ആപ്പീസുകളല്ല; ശിഹാബ് തങ്ങൾ ഈ തീക്കളിയിൽ നിന്ന് ലീഗിനെ പിന്തിരിപ്പിക്കമെന്ന് കെടി ജലീൽ

സൈജു ഉപയോഗിച്ച ഔഡി കാറിന്റെ ഉടമ ഫെബി ജോൺ എന്നയാളാണ്. ഇയാളും സുഹൃത്തുക്കളുമായി കാക്കനാട്ടെ ഫ്ലാറ്റിൽവെച്ചു നടത്തിയ പാർട്ടിയുടെ വിവരങ്ങളും പോലീസ് അന്വേഷിക്കുന്നുണ്ട്. 2020 സെപ്റ്റംബർ ഏഴിന് ചലവന്നൂരിലെ ഫ്ലാറ്റിൽ സൈജു നടത്തിയ പാർട്ടിയിൽ പങ്കെടുത്തവരെ പോലീസ് ചോദ്യം ചെയ്യും. അമൽ പപ്പടവട, നസ്‌ലിൻ, സലാഹുദീൻ മൊയ്തീൻ, ഷിനു മിന്നു എന്നിവരെയാണ് ചോദ്യം ചെയ്യുക. പോലീസ് കോടതിയിൽ സമർപ്പിച്ച റിമാൻഡ് റിപ്പോർട്ടിലാണ് ഇവരുടെ പേരുള്ളത്.

സൈജുവിന്‍റെ ഫോണിൽ എംഡിഎംഎ, ഹാഷിഷ് ഓയില്‍, കഞ്ചാവ് എന്നിവ ഉപയോഗിക്കുന്ന ദൃശ്യങ്ങളുണ്ട്. മോഡലുകൾ കൊല്ലപ്പെട്ട ഒക്ടോബര്‍ 31നു ശേഷം സൈജു നവംബര്‍ ഏഴു മുതല്‍ ഒമ്പതുവരെയുള്ള തീയതികളില്‍ ഗോവയില്‍ പോയി പാര്‍ട്ടിയില്‍ പങ്കെടുത്തു. ഇതുമായി ബന്ധപ്പെട്ട വീഡിയോകളും അന്വേഷണ സംഘത്തിനു ലഭിച്ചിട്ടുണ്ട്.