ലോകത്തെ ആദ്യത്തെ ജീവനുള്ള റോബോട്ടുകളെ വികസിപ്പിച്ച് ഗവേഷകർ; പ്രത്യുല്പാദനം നടത്താനും കഴിവ്

അമേരിക്കയിലെ ഗവേഷകർ വികസിപ്പിച്ച ജീവനുള്ള റോബോട്ടുകൾക്ക് ഇനി പ്രത്യുല്പാദനം നടത്താൻ കഴിയും. സെനോബോട്ട് എന്നാണ് ഈ ജീവനുള്ള റോബോട്ടുകൾക്ക് ഗവേഷകർ നൽകിയിരിക്കുന്ന പേര്. ആഫ്രിക്കൻ ക്ലോവ്ഡ് തവളകളുടെ (Xenopus laevis) വിത്തുകോശത്തിൽ (stem cells) നിന്നുമാണ് ഒരു മില്ലീമീറ്ററിൽ താഴെ വലുപ്പമുള്ള ഈ റോബോട്ടുകളെ വികസിപ്പിച്ചെടുത്തിരിക്കുന്നത്.



2020ൽ നടന്ന പരീക്ഷണ പ്രകാരം ഈ റോബോട്ടുകൾക്ക് സ്വയം ചലിക്കാനും സംഘങ്ങളായി പ്രവ‍ര്‍ത്തിക്കാനും സ്വയം സുഖപ്പെടുത്താനും കഴിയുമെന്ന് കണ്ടെത്തിയിരുന്നു. എന്നാൽ ഇതിൽ നിന്നും ഏറെ വ്യത്യസ്തമായ പ്രത്യുല്പാദന ശേഷിയുള്ള റോബോട്ടുകളെയാണ് യൂണിവേഴ്സിറ്റി ഓഫ് വെർമോണ്ട്, ടഫ്റ്റ്സ് യൂണിവേഴ്സിറ്റി, ഹാർവാർഡ് യൂണിവേഴ്സിറ്റിയുടെ വൈസ് ഇൻസ്റ്റിറ്റ്യൂട്ട് ഫോർ ബയോളജിക്കൽ ഇൻസ്പൈർഡ് എഞ്ചിനീയറിംഗ് എന്നിവിടങ്ങളിലെ ഗവേഷക‍ര്‍ വികസിപ്പിച്ചിരിക്കുന്നത്.

റിഹാന ‘ദേശീയ ഹീറോ’: അംഗീകാരം കർഷക സമരത്തിനല്ല, ബാർബേഡോസ് റിപ്പബ്ലിക് ആയതിന്

“ഞാൻ അമ്പരന്നു പോയി,” എന്നാണ് ഗവേഷണ പ്രബന്ധത്തിന്റെ സഹ-രചയിതാവും ബയോളജി പ്രൊഫസറും ടഫ്റ്റ്‌സ് യൂണിവേഴ്‌സിറ്റിയിലെ അലൻ ഡിസ്‌കവറി സെന്റർ ഡയറക്‌ടറുമായ മൈക്കൽ കെവിൻ കണ്ടുപിടുത്തത്തെക്കുറിച്ച് അഭിപ്രായപ്പെട്ടത്.

സ്വയം വിഘടിച്ച് പുതിയ ജീവകോശങ്ങളെ ഉല്പാദിപ്പിക്കാൻ കഴിവുള്ള കോശങ്ങളെയാണ് സ്റ്റെം സെൽസ് അല്ലെങ്കിൽ വിത്ത് കോശങ്ങൾ എന്നു പറയുന്നത്. റോബോട്ട് എന്നാൽ ലോഹനിർമ്മിതമോ സെറാമിക്കോ ആയ യന്ത്രങ്ങളാണ് എന്നാണ് പൊതുധാരണ. പക്ഷേ മനുഷ്യരുടെ നിർദ്ദേശപ്രകാരം സ്വയം പ്രവർത്തിക്കാൻ കഴിയുന്ന ജീവനുള്ളതോ അല്ലാത്തതോ ആയ വസ്തുക്കളെ റോബോട്ടുകൾ എന്ന് വിളിക്കാം എന്നാണ് യൂണിവേഴ്സിറ്റി ഓഫ് വെർമോണ്ടിലെ റോബോട്ടിക്ക് വിദഗ്ദനും കമ്പ്യൂട്ടർ സയൻസ് പ്രൊഫസറുമായ ജോഷ് ബോംഗാർഡ് പറയുന്നത്.

“അങ്ങനെയെങ്കിൽ ഈ പുതിയ കണ്ടുപിടുത്തത്തെ റോബോട്ടായും അതേസമയം തവളയുടെ കോശത്തിൽ നിന്നും ജനിതകവ്യതിയാനം വരുത്തി വികസിപ്പിച്ചെടുത്ത പുതിയ ജീവി വർഗമായും കണക്കാക്കാനാകും.” എന്നും ജോഷ് ബോംഗാർഡ് പറഞ്ഞു.

ഒമിക്രോൺ: ആഫ്രിക്കയിലേക്ക് സഹായം അയച്ച് ഇന്ത്യയും ചൈനയും

മൂവായിരത്തോളം കോശങ്ങളാൽ നിർമ്മിതമായ ഗോളാകൃതിയിലുള്ള ഈ സെനോബോട്ടുകൾ കൈനറ്റിക്ക് റിപ്ലിക്കേഷൻ എന്ന പ്രക്രിയയിലൂടെയാണ് പ്രത്യുല്പാദനം നടത്തുന്നത്. ആർട്ടിഫിഷ്യൽ ഇന്റലിജൻസിന്റെ സഹായത്തോടെ സെനോബോട്ടുകൾക്ക് പ്രത്യുല്പാദനത്തിന് ഉതകുന്ന വിധത്തിലുള്ള ആകൃതി കണ്ടെത്തുന്നതിനുള്ള പരീക്ഷണം ഗവേഷകർ നടത്തിയിരുന്നു. 1980-ലെ വീഡിയോ ഗെയിമായ പാക്-മാനോട് സാദൃശ്യമുള്ള സി-ആകൃതിയാണ് സൂപ്പർ കമ്പ്യൂട്ടറുകൾ ജീവനുള്ള റോബോട്ടുകൾക്കായി നിർദ്ദേശിച്ചത്.

സെനോബോട്ടുകൾ ഏറ്റവും പുതിയ സാങ്കേതികവിദ്യയാണ്. യാതൊരു പ്രായോഗികതയുമില്ലാത്ത 1940-ലെ കമ്പ്യൂട്ടറുകളെക്കുറിച്ച് ചിന്തിച്ചുനോക്കൂ. മോളിക്യുലാർ ബയോളജിയും ആർട്ടിഫിഷ്യൽ ഇന്റലിജൻസും ഒന്നിച്ച് ഉപയോഗിക്കുകയാണെങ്കിൽ ശരീരത്തിലേയും പ്രകൃതിയിലേയും പലതരം പ്രശ്നങ്ങൾക്ക് പരിഹാരം കണ്ടെത്താനാകും. സമുദ്രങ്ങളിൽ നിന്നും മൈക്രോ പ്ലാസ്റ്റിക്ക് ശേഖരിക്കുക, വേരുകളുടെ ഘടന മനസിലാക്കുക തുടങ്ങിയ ഒട്ടനവധി കാര്യങ്ങൾക്ക് ഗുണകരമായിരിക്കും ഇത്. പ്രതിരോധ ആവശ്യങ്ങൾക്കായുള്ള സാങ്കേതികവിദ്യ വികസിപ്പിക്കുന്നതിന് മേൽനോട്ടം വഹിക്കുന്ന ഫെഡറൽ ഏജൻസിയായ ഡിഫൻസ് അഡ്വാൻസ്ഡ് റിസർച്ച് പ്രോജക്ട് ഏജൻസിയാണ് ഗവേഷണത്തിനുള്ള ഭാഗിക ധനസഹായം നൽകിയത്.