Sumayya P | Samayam Malayalam | Updated: Dec 2, 2021, 8:37 AM
അഫ്ഗാന് ജനതയ്ക്ക് എല്ലാ കോണ്‍സുലര്‍ സേവനങ്ങളും നല്‍കാനുള്ള സൗദിയുടെ താല്‍പര്യത്തിന്റെ അടിസ്ഥാനത്തില്‍ സൗദിയില്‍ നിന്നുള്ള 14 അംഗ നയതന്ത്ര സംഘം ഇതിനകം കാബൂളിലെത്തിയതായും സൗദി വിദേശകാര്യ മന്ത്രാലയം അറിയിച്ചു.
എംബസി പുനരാരംഭിച്ചത് ചൊവ്വാഴ്ച
ആഗസ്തില്‍ താലിബാന്‍ രാജ്യംപിടിച്ചടക്കിയതിനെ തുടര്‍ന്ന് കാബൂളിലെ എംബസിയില്‍ നിന്ന് സൗദി എല്ലാ നയതന്ത്ര ഉദ്യോഗസ്ഥരെയും ഒഴിപ്പിച്ചിരുന്നു. എന്നാല്‍ പുതിയ ഭരണകൂടവുമായി യോജിച്ചു പ്രവര്‍ത്തിക്കാനുള്ള തീരുമാനമാണ് പുതിയ നയം മാറ്റത്തിനു പിന്നിലെന്നാണ് വിലയിരുത്തപ്പെടുന്നത്. അഫ്ഗാന് ജനതയ്ക്ക് എല്ലാ കോണ്‍സുലര്‍ സേവനങ്ങളും നല്‍കാനുള്ള സൗദിയുടെ താല്‍പര്യത്തിന്റെ അടിസ്ഥാനത്തില്‍ സൗദിയില്‍ നിന്നുള്ള 14 അംഗ നയതന്ത്ര സംഘം ഇതിനകം കാബൂളിലെത്തിയതായും സൗദി വിദേശകാര്യ മന്ത്രാലയം അറിയിച്ചു. കഴിഞ്ഞ ചൊവ്വാഴ്ച മുതല്‍ എംബസി പ്രവര്‍ത്തനം പുനരാരംഭിച്ചതായാണ് റിപ്പോര്‍ട്ട്.
ഒഐസി രാജ്യങ്ങളുടെ യോഗം വിളിക്കും
താലിബാന്‍ ഭരണകൂടം അധികാരത്തില്‍ എത്തിയ ശേഷമുണ്ടായ സാമ്പത്തിക പ്രതിസന്ധി കാരണം രാജ്യത്തെ സാധാരണ ജനങ്ങള്‍ വലിയ ദുരിതത്തിലേക്ക് നീങ്ങിക്കൊണ്ടിരിക്കുകയാണെന്നാണ് റിപ്പോര്‍ട്ട്. ഇവര്‍ക്ക് അടിയന്ത്ര സഹായമെത്തിക്കുന്നതിന് ഓര്‍ഗനൈസേഷന്‍ ഓഫ് ഇസ്ലാമിക് കോ-ഓപ്പറേഷന്റെ നേതൃത്വത്തില്‍ വിവിധ രാജ്യങ്ങളുടെ യോഗം വിളിച്ചുചേര്‍ക്കണമെന്ന് സൗദി അറേബ്യ കഴിഞ്ഞ ദിവസം ആവശ്യപ്പെട്ടിരുന്നു. നിലവില്‍ സൗദി അറേബ്യയാണ് ഒഐസിയുടെ അധ്യക്ഷന്‍. ഈ മാസം 18ന് പാകിസ്താനിലാണ് പ്രത്യേക അടിയന്തര യോഗം ചേരുക.
അഫ്ഗാനിസ്താനില്‍ സഹായമെത്തിക്കുക ലക്ഷ്യം
അഫ്ഗാനിസ്താനില്‍ അനുദിനം വഷളായിക്കൊണ്ടിരിക്കുന്ന ജീവിത സാഹചര്യം കുട്ടികളും സ്ത്രീകളും പ്രായമായവരും ഉള്‍പ്പെടെയുള്ള ജനങ്ങളെ വലിയ തോതില്‍ ദുരിതതത്തിലാഴ്ത്തിയ സാഹചര്യത്തിലാണ് അടിയന്തര യോഗം വിളിച്ചു ചേര്‍ക്കുന്നത്. രാജ്യത്തെ നിലവിലെ സ്ഥിതി കൂടുതല്‍ അസ്ഥിരതയ്ക്കും കുഴപ്പങ്ങള്‍ക്കും കാരണമാവുമെന്നുമുള്ള വിലയിരുത്തലും സൗദി അധികൃതര്‍ക്കുണ്ട്. അഫ്ഗാന് പ്രശ്നത്തില്‍ മറ്റ് അറബ്, ഇസ്ലാമിക രാജ്യങ്ങള്‍ക്ക് എന്തൊക്കെ സഹായങ്ങള്‍ ചെയ്യാനാവും എന്നതിനെ കുറിച്ച് യോഗം ചര്‍ച്ച ചെയ്യും. അഫ്ഗാന് ജനതയുടെ ദുരിതമകറ്റാന്‍ ആവശ്യമായ പദ്ധതികളും പ്രവര്‍ത്തനങ്ങളും യോഗം ആവിഷ്‌ക്കരിക്കും. നിലവില്‍ പല ഗള്‍ഫ് രാജ്യങ്ങളും ഭക്ഷണവും മരുന്നും ഉള്‍പ്പെടെയുള്ള അവശ്യ സാധനങ്ങള്‍ അഫ്ഗാനിസ്താനില്‍ എത്തിക്കുന്നുണ്ട്.
ഖത്തറും യുഎഇയും എംബസികള്‍ തുടങ്ങി
Image Credit: New York Times
ഗള്‍ഫ് രാജ്യങ്ങളായ ഖത്തര്‍ നേരത്തേ തന്നെ അഫ്ഗാന് സര്‍ക്കാരുമായി ബന്ധപ്പെട്ടാണ് പ്രവര്‍ത്തിക്കുന്നത്. അമേരിക്കയുമായുള്ള താലിബാന്‍ നേതാക്കളുടെ ചര്‍ച്ചകള്‍ക്ക് വഴിയൊരുക്കിയതും ഖത്തറായിരുന്നു. അഫ്ഗാന് സഹായമെത്തിക്കുന്നതില്‍ മുന്‍പന്തിയിലുള്ള രാജ്യങ്ങളിലൊന്നാണ് ഖത്തര്‍. കഴിഞ്ഞ മാസമാണ് യുഎഇ കാബൂളില്‍ കോണ്‍സുലാര്‍ പ്രവര്‍ത്തനം പുനരാരംഭിച്ചത്. റഷ്യ, ചൈന, ഇറാന്‍, പാകിസ്താന്‍, തുര്‍ക്കി, തുര്‍ക്ക്മെനിസ്താന്‍, ഉസ്ബെക്കിസ്താന്‍ എന്നീ രാജ്യങ്ങളും ഇതിനകം അഫ്ഗാനിസ്താനില്‍ എംബസി തുറന്നിട്ടുണ്ട്. അമേരിക്കന്‍ എംബസിയുടെ പ്രവര്‍ത്തനം കാബൂളിലെ ഖത്തര്‍ എംബസി വഴി നടത്താനും നേരത്തേ ധാരണയായിയിരുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : saudi arabia embassy to resume operations in kabul
Malayalam News from Samayam Malayalam, TIL Network
