അക്കൗണ്ടുകള്‍ അടച്ചുപൂട്ടാന്‍ അധികാരം
നിയമ ലംഘനത്തിന് പിടികൂടപ്പെടുന്ന അക്കൗണ്ടുകള്‍ എന്തു ചെയ്യണമെന്ന കാര്യത്തെ കുറിച്ചും കൃത്യമായ വ്യവസ്ഥകള്‍ പുതിയ നിയമത്തിലുണ്ട്. കുറ്റാരോപിതന്റെ അക്കൗണ്ടുകള്‍ നിരീക്ഷിക്കാനും അയാള്‍ സാമൂഹിക മാധ്യമങ്ങളോ ഓണ്‍ലൈന്‍ പ്ലാറ്റ്ഫോമുകളോ ഉപയോഗിക്കുന്നില്ലെന്ന് ഉറപ്പുവരുത്തണമെന്നും നിയമത്തിലുണ്ട്. അതേസമയം, നിയമ ലംഘനത്തിന് ഉപയോഗിച്ച സോഷ്യല്‍ മീഡിയ, ഓണ്‍ലൈന്‍ അക്കൗണ്ടുകള്‍ താല്‍ക്കാലികമായോ എന്നത്തേക്കുമായോ അടച്ചുപൂട്ടാനും അധികൃതര്‍ക്ക് അവകാശമുണ്ടായിരിക്കും. അതോടൊപ്പം, സൈബര്‍ കുറ്റകൃത്യത്തിന് ഉപയോഗിച്ച ഉപകരണങ്ങള്‍, സോഫ്റ്റ് വെയറുകള്‍ തുടങ്ങിയ ഉപകരണങ്ങള്‍ പിടിച്ചെടുക്കാനും നിയമം അധികൃതര്‍ക്ക് അവകാശം നല്‍കുന്നു. യുഎഇക്കെതിരായ സൈബര്‍ കുറ്റകൃത്യങ്ങളില്‍ ഏര്‍പ്പെടുന്ന അക്കൗണ്ടുകളെ ബ്ലോക്ക് ചെയ്യാനുള്ള അധികാരവും സര്‍ക്കാരിനുണ്ട്.
കോടതി വിധിക്കെതിരേ അപ്പീല്‍ നല്‍കാന്‍ അനുമതി
സൈബര്‍ കുറ്റവുമായി ബന്ധപ്പെട്ട കേസുകളില്‍ കോടതി വിധിക്കുന്ന ശിക്ഷയ്ക്കെതിരെ അപ്പീല്‍ നല്‍കാന്‍ പ്രതിക്ക് അവകാശം നല്‍കുന്നതാണ് പുതിയ നിയമം. വിധി വന്ന് മൂന്നു ദിവസമാണ് ബന്ധപ്പെട്ട അതോറിറ്റിക്ക് പരാതി നല്‍കണമെന്നാണ് നിയമം. പരാതി ലഭിച്ച ഒരാഴ്ചയ്ക്കകം ഇക്കാര്യത്തില്‍ ബന്ധപ്പെട്ട അതോറിറ്റി തീരുമാനമെടുക്കും. ഈ അപേക്ഷ നിരസിക്കപ്പെടുകയാണെങ്കില്‍, നിരസിച്ചതായുള്ള അറിയിപ്പ് ലഭിച്ച് ഒരാഴ്ചയ്ക്കകം അബുദാബിയിലെ ഫെഡറല്‍ കോടതിയില്‍ അപ്പീലിന് പോകാന്‍ പ്രതിക്ക് അവകാശമുണ്ടായിരിക്കും. ഒരാഴ്ചയ്ക്കകം കോടതി ഇക്കാര്യത്തില്‍ തീരുമാനം എടുക്കണമെന്നും പുതിയ നിയമം അനുശാസിക്കുന്നു.
ഓണ്‍ലൈന്‍ വഴിയുള്ള യാചനയും ശിക്ഷാര്‍ഹം
ഓണ്‍ലൈനായും സാമൂഹിക മാധ്യമങ്ങള്‍ വഴിയും യാചനയും പണപ്പിരിവും നടത്തുന്നതിനും പുതിയ നിയമം കര്‍ശനമായ വിലക്കേര്‍പ്പെടുത്തിയിട്ടുണ്ട്. അതേപോലെ, സര്‍ക്കാര്‍ അധികൃതരില്‍ നിന്ന് നിയമവിരുദ്ധമായി സഹായം കൈപ്പറ്റലും വലിയ കുറ്റമാണ്. മൂന്നു മാസം വരെ തടവും 10,000 ദിര്‍ഹം വരെ പിഴയുമാണ് ഇവര്‍ക്കുള്ള ശിക്ഷ. ജനങ്ങളില്‍ നിന്ന് പണം പിരിക്കുന്നതിനായി വ്യാജ സ്ഥാപനം ഓണ്‍ലൈനായി ആരംഭിക്കുകയോ ലൈസന്‍സില്ലാതെ പൊതുജനങ്ങളില്‍ നിന്ന് സംഭാവന സ്വീകരിക്കുകയോ ചെയ്യുന്നതും കുറ്റകരമാണ്. അഞ്ചു വര്‍ഷം തടവും 10 ലക്ഷം ദിര്‍ഹം വരെ പിഴയും ശിക്ഷ ലഭിക്കാവുന്ന കുറ്റമാണിത്. ഓണ്‍ലൈന്‍ വഴി ഏതെങ്കിലും വിദേശ രാജ്യത്തെ അപകീര്‍ത്തിപ്പെടുത്തുന്ന രീതിയില്‍ എന്തെങ്കിലും വിവരങ്ങള്‍ പ്രസിദ്ധീകരിക്കുകയോ പോസ്റ്റുകള്‍ ഇടുകയോ ചെയ്യുന്നവര്‍ക്ക് ഒരു ലക്ഷം മുതല്‍ അഞ്ചു ലക്ഷം വരെ ദിര്‍ഹം പിഴയും ആറ് മാസത്തെ ജയിലുമാണ് ശിക്ഷ.
ലൈസന്‍സില്ലാതെ ഓണ്‍ലൈന്‍ വ്യാപാരം പാടില്ല
ബന്ധപ്പെട്ട അധികൃതരില്‍ നിന്നുള്ള ലൈസന്‍സ് ഇല്ലാതെ ക്രിപ്റ്റോകറന്‍സികള്‍ പോലുള്ള ഓണ്‍ലൈന്‍ വ്യാപാരത്തില്‍ ഏര്‍പ്പെടുന്നതും പുതിയ നിയമപ്രകാരം കുറ്റകരമാണ്. അതേപോലെ ഏതെങ്കിലും ഉല്‍പ്പന്നങ്ങള്‍, സേവനങ്ങള്‍ തുടങ്ങിയവയെ കുറിച്ച് തെറ്റിദ്ധരിപ്പിക്കുന്ന രീതിയിലുള്ള പരസ്യങ്ങള്‍ പോസ്റ്റ് ചെയ്യുന്നതും നിയമവിരുദ്ധമാണ്. 20,000 ദിര്‍ഹം മുതല്‍ അഞ്ചു ലക്ഷം വരെയാണ് ഇതിനുള്ള പിഴ. അതോടൊപ്പം ജയില്‍ ശിക്ഷയും ഇത്തരക്കാര്‍ക്ക് ലഭിക്കും. ലൈസന്‍സില്ലാതെ മെഡിക്കല്‍ ഉപകരണങ്ങളും ഉല്‍പ്പന്നങ്ങളും വില്‍പ്പന നടത്തുന്നതും തടവും പിഴയും ശിക്ഷയായി ലഭിക്കാവുന്ന കുറ്റമാണെന്നും അധികൃതര്‍ അറിയിച്ചു. അതേപോലെ, ബന്ധപ്പെട്ട സര്‍ക്കാര്‍ ഏജന്‍സികളില്‍ നിന്നുള്ള മുന്‍കൂര്‍ അനുമതി വാങ്ങാതെ ഓണ്‍ലൈന്‍ സര്‍വേകളും ഓണ്‍ലൈന്‍ വോട്ടെടുപ്പുകളും സംഘടിപ്പിക്കുന്നതും കുറ്റകരമാണ്. ഒരു ലക്ഷം മുതല്‍ അഞ്ചു ലക്ഷം വരെ ദിര്‍ഹമാണ് ഇവര്‍ക്കുള്ള ശിക്ഷ.
വ്യാജ അക്കൗണ്ടുകള്‍, ഇ മെയിലുകള്‍, വെബ്സൈറ്റുകള്‍
മറ്റൊരാളുടെയോ സ്ഥാപനത്തിന്റെയോ പേരില്‍ വ്യാജ ഇമെയിലോ വ്യാജ സാമൂഹിക മാധ്യമ അക്കൗണ്ടുകളോ വ്യാജ വെബ്സൈറ്റുകളോ നിര്‍മിക്കുന്നതും കുറ്റകരമാണെന്ന് പുതിയ നിയമം വ്യക്തമാക്കുന്നുണ്ട്. ഇത്തരം പ്രവര്‍ത്തനങ്ങളില്‍ ഏര്‍പ്പെടുന്നവര്‍ക്ക് അര ലക്ഷം മുതല്‍ രണ്ടു ലക്ഷം വരെ പിഴയും തടവുമാണ് ശിക്ഷ. ഒരു വ്യക്തിയെയോ സ്ഥാപനത്തെയോ അപകീര്‍ത്തിപ്പെടുത്താനാണ് ഇത്തരം പ്രവര്‍ത്തനം നടത്തിയതെങ്കില്‍ ശിക്ഷ കൂടുതല്‍ കടുത്തതാവും. രണ്ടു വര്‍ഷം ജയില്‍ ശിക്ഷ വരെ ഇവര്‍ക്ക് ലഭിച്ചേക്കാം.
വ്യാജ വാര്‍ത്തകള്‍ ഷെയര്‍ ചെയ്യുന്നതും കുറ്റകരം
പുതിയ നിയമ ഭേദഗതി പ്രകാരം, വ്യാജ വാര്‍ത്തകളും മറ്റും പ്രസിദ്ധീകരിക്കുന്നതു മാത്രമല്ല, അവ മറ്റുള്ളവര്‍ക്ക് ഷെയര്‍ ചെയ്തു നല്‍കുന്നവരും കുറ്റകൃത്യത്തില്‍ പങ്കാളികളാണ്. തനിക്കു ലഭിച്ച ഒരു ഓണ്‍ലൈന്‍ സന്ദേശം മറ്റുള്ളവര്‍ക്ക് ഷെയര്‍ ചെയ്യുന്നതിന് മുമ്പ് അതിന്റെ ആധികാരികത അന്വേഷിക്കുകയെന്നത് ഓണ്‍ലൈന്‍ ഉപയോക്താക്കളുടെ ബാധ്യതയായി ഇതോടെ മാറിയിരിക്കുകയാണ്. ഇല്ലെങ്കില്‍ ജയിലിലടയ്ക്കപ്പെടാന്‍ പോലുമുള്ള സാധ്യതയുണ്ട്. വ്യാജ വാര്‍ത്തകളും ഊഹാപോഹങ്ങളും എത്രയും വേഗം മറ്റുള്ളവര്‍ക്ക് ഷെയര്‍ ചെയ്തു കൊടുക്കുന്ന പ്രവണത സമൂഹത്തില്‍ വ്യാപകമാണ്. എന്നാല്‍ അതിന്റെ ആധികാരികത ഉറപ്പാക്കാതെ ഇവ മറ്റുള്ളവരുമായി പങ്കുവയ്ക്കുന്നത് സമൂഹത്തില്‍ തെറ്റിദ്ധാരണയും ഭീതിയും സൃഷ്ടിക്കാന്‍ കാരണമാവുമെന്നാണ് ഇതിന് കാരണമായി ചൂണ്ടിക്കാണിക്കപ്പെടുന്നത്. വ്യാജ വാര്‍ത്തകള്‍ ഇലക്ട്രോണിക് റോബോട്ടുകളുടെ സഹായത്തോടെ പങ്കുവയ്ക്കുന്നതും രണ്ടു വര്‍ഷം വരെ തടവും ഒരു ലക്ഷം ദിര്‍ഹം മുതല്‍ 10 ലക്ഷം ദിര്‍ഹം വരെ പിഴയും ലഭിക്കാവുന്ന കുറ്റമാണ്.
വ്യാജ വാര്‍ത്തകള്‍ പ്രചരിപ്പിച്ചാല്‍ കുടുങ്ങും
ജനങ്ങളില്‍ പരിഭ്രാന്തി പടര്‍ത്തുന്ന രീതിയില്‍ വ്യാജ വാര്‍ത്തകള്‍, അഭ്യൂഹങ്ങള്‍, തെറ്റിദ്ധരിപ്പിക്കുന്നതും ശരിയല്ലാത്തതുമായ വിവരങ്ങള്‍ തുടങ്ങിയവ ഓണ്‍ലൈന്‍ പ്ലാറ്റ്ഫോമുകളില്‍ പ്രസിദ്ധീകരിക്കുന്നതും അവ പങ്കുവയ്ക്കുന്നതും ക്രിമിനല്‍ കുറ്റമായാണ് യുഎഇ നിയമവ്യവസ്ഥ കാണുന്നത്. ഈ നിയമം ലംഘിക്കുന്നവര്‍ക്ക് ചുരുങ്ങിയത് ഒരു വര്‍ഷത്തെ ജയില്‍ ശിക്ഷയും ഒരു ലക്ഷം ദിര്‍ഹം പിഴയുമാണ് ശിക്ഷ. അതേസമയം, ഇത്തരം വ്യാജ സന്ദേശങ്ങള്‍ പ്രചരിപ്പിക്കുന്നത് പകര്‍ച്ചവ്യാധികുടെയും ദുരന്തങ്ങളുടെയും കാലഘട്ടങ്ങളിലും മറ്റ് അടിയന്തര സന്ദര്‍ഭങ്ങളിലുമാണെങ്കില്‍ ജയില്‍ ശിക്ഷ രണ്ടു വര്‍ഷവും പിഴ രണ്ടു ലക്ഷവുമായി വര്‍ധിക്കും.
ഡിജിറ്റല്‍ യുഗത്തില്‍ സൈബര്‍ സുരക്ഷ പ്രധാനം
എല്ലാ കാര്യങ്ങളും ഓണ്‍ലൈനിലേക്ക് മാറിയ സാഹചര്യത്തില്‍ സൈബര്‍ സുരക്ഷ സുപ്രധാനമാണെന്ന തത്വത്തിന്റെ അടിസ്ഥാനത്തിലാണ് പുതിയ നിയമ നിര്‍മാണം. യുഎഇയിലെ പൗരന്‍മാരുടെയും പ്രവാസികളുടെയും ഓണ്‍ലൈന്‍ അവകാശങ്ങളും സുരക്ഷിതത്വവും ശക്തിപ്പെടുത്താനുതകുന്നതാണ് പുതിയ നിയമനിര്‍മാണമെന്ന് സൈബര്‍ മേഖലയിലെ നിയമവിദഗ്ധരിലൊരാളായ ഗസ്സാന്‍ അല്‍ ദായ് അഭിപ്രായപ്പെട്ടു. ഇന്റര്‍നെറ്റിന്റെ എല്ലാ വശങ്ങളെയും ഉള്‍ക്കൊള്ളുന്നതും ഈ മേഖലയില്‍ രാജ്യം കൈവരിക്കാനിരിക്കുന്ന ഉയര്‍ച്ചകളിലേക്ക് വിരല്‍ ചൂണ്ടുന്നതുമാണ് നിയമം. സര്‍ക്കാര്‍, സ്വകാര്യ സ്ഥാപനങ്ങള്‍, സംരംഭകര്‍, സ്റ്റാര്‍ട്ടപ്പുകള്‍, വ്യക്തികള്‍ തുടങ്ങി എല്ലാവര്‍ക്കും ഏറ്റവും മികച്ച ഡിജിറ്റല്‍ സൗകര്യങ്ങള്‍ ഒരുക്കുന്നതോടൊപ്പം ഇന്റര്‍നെറ്റ് ഉപയോഗത്തിന് കൃത്യമായ മാര്‍ഗ നിര്‍ദ്ദേശങ്ങള്‍ മുന്നോട്ടുവയ്ക്കുകയാണ് അധികൃതര്‍ ചെയ്തിരിക്കുന്നതെന്നും അദ്ദേഹം കൂട്ടിച്ചേര്‍ത്തു.
Video-സെക്രട്ടറി ഗോഷ്ടി കാണിച്ചു? കട്ടപ്പന നഗരസഭയില്‍ വാക്കേറ്റം പരിഹാസം
സെക്രട്ടറി ഗോഷ്ടി കാണിച്ചു? കട്ടപ്പന നഗരസഭയില്‍ വാക്കേറ്റം പരിഹാസം
Web Title : penalties for fake news misleading ads online begging uae cybercrime
Malayalam News from Samayam Malayalam, TIL Network
