ദോഹ: ഇന്ത്യന്‍ വിദേശകാര്യ മന്ത്രി ഡോ. എസ് ജയ്ശങ്കര്‍ വിവിധ ഗള്‍ഫ് രാജ്യങ്ങള്‍ സന്ദര്‍ശിക്കുന്നതിന്റെ ഭാഗമായി ഖത്തര്‍ തലസ്ഥാനമായ ദോഹലെത്തി. കുവൈറ്റ്, കെനിയ എന്നീ രാജ്യങ്ങള്‍ സന്ദര്‍ശിച്ച ശേഷമാണ് അദ്ദേഹം ഖത്തറിലെത്തിയത്.

​വിദേശകാര്യ, ആഭ്യന്തര മന്ത്രിമാരുമായി കൂടിക്കാഴ്ച നടത്തി

ഖത്തര്‍ വിദേശകാര്യമന്ത്രിയും ഉപപ്രധാനമന്ത്രിയുമായി ശെയ്ഖ് മുഹമ്മദ് ബിന്‍ അബ്ദുല്‍ റഹ്മാന്‍ അല്‍താനിയുമായി അദ്ദേഹം കൂടിക്കാഴ്ച്ച നടത്തി. ഖത്തര്‍ വിദേശകാര്യ മന്ത്രിയുമായി കൂടിക്കാഴ്ച നടത്താനായതില്‍ സന്തോഷമുണ്ടെന്ന് അദ്ദേഹം പറഞ്ഞു. കൊവിഡിന്റെ രണ്ടാം തരംഗത്തില്‍ ഖത്തര്‍ ഇന്ത്യക്ക് നല്‍കിയ പിന്തുണയ്ക്ക് ഉപപ്രധാനമന്ത്രിയുമായി നടത്തിയ കൂടിക്കാഴ്ച്ചയില്‍ നന്ദി അറിയിച്ചതായി ഡോ. ജയശങ്കര്‍ പിന്നീട് ട്വീറ്റ് ചെയ്തു. ഉഭയകക്ഷി ബന്ധവും സഹകരണവും പ്രാദേശിക വിഷയങ്ങളും കൂടിക്കാഴ്ചയില്‍ ചര്‍ച്ചയായി. അതിനു ശേഷം ഖത്തര്‍ ഡെപ്യൂട്ടി പ്രധാനമന്ത്രിയും പ്രതിരോധ മന്ത്രിയുമായഡോ. ഖാലിദ് ബിന്‍ മുഹമ്മദ് അല്‍ അതിയ്യയുമായും അദ്ദേഹം കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള സഹകരണം മെച്ചപ്പെടുത്തുന്നത് ഉള്‍പ്പെടെയുള്ള കാര്യങ്ങളെ കുറിച്ച് അദ്ദേഹവുമായി ജയ്ശങ്കര്‍ ചര്‍ച്ച നടത്തി.

​ഒരാഴ്ചയ്ക്കിടെ രണ്ടാം തവണയും ഖത്തറില്‍

ഒരാഴ്ചയ്ക്കിടെ രണ്ടാം തവണയാണ് ഇന്ത്യന്‍ വിദേശകാര്യ മന്ത്രി ദോഹയിലെത്തുന്നത്. ജൂണ്‍ ഒന്‍പതിന് കുവൈറ്റില്‍ നിന്ന് കെനിയയിലേക്കുള്ള യാത്രാ മധ്യേ ദോഹയിലെത്തിയ അദ്ദേഹം, ഖത്തര്‍ ദേശീയ സുരക്ഷാ ഉപദേഷ്ടാവ് മുഹമ്മദ് ബിന്‍ അഹ്മദ് അല്‍ മിസ്‌നദുമായി കൂടിക്കാഴ്ച നടത്തിയിരുന്നു. കൊവിഡിനെതിരായ പോരാട്ടത്തില്‍ ഖത്തര്‍ നല്‍കുന്ന പിന്തുണയ്ക്ക് കൂടിക്കാഴ്ചയില്‍ നന്ദി അറിയിച്ച മന്ത്രി, പ്രാദേശിക സംഭവ വികാസങ്ങളെ കുറിച്ച് ദേശീയ സുരക്ഷാ ഉപദേഷ്ടാവിനുള്ള ഉള്‍ക്കാഴ്ച അപാരമാണെന്ന് അഭിപ്രായപ്പൈടുകയും ചെയ്തിരുന്നു. മൂന്ന് ദിവസം നീണ്ട കുവൈത്ത് സന്ദര്‍ശനത്തിനും കെനിയന്‍ സന്ദര്‍ശനത്തിനും ശേഷമാണ് വിദേശകാര്യമ മന്ത്രി ഖത്തറിലെത്തിയത്. കുവൈത്തില്‍ ഗള്‍ഫ് രാജ്യങ്ങളിലെയും ഇറാനിലെയും അംബാസഡര്‍മാരുമായും അദ്ദേഹം ചര്‍ച്ച നടത്തിയിരുന്നു. കൊവിഡ് നിയന്ത്രണങ്ങളുടെ ഭാഗമായി ഇവിടങ്ങളില്‍ താമസിക്കുന്ന ഇന്ത്യക്കാര്‍ നേരിടുന്ന യാത്രാ പ്രശ്നമാണ് പ്രധാനമായും ചര്‍ച്ചയായത്.

​ഖത്തര്‍ സന്ദര്‍ശനത്തിന് പ്രാധാന്യമേറെ

ഇന്ത്യന്‍ വിദേശകാര്യമന്ത്രിയുടെ ഖത്തര്‍ സന്ദര്‍ശനത്തിന് വലിയ പ്രാധാന്യമാണ് കല്‍പ്പിക്കപ്പെടുന്നത്. പ്രത്യേകിച്ച് താലിബാനുമായി സഹകരിക്കാന്‍ ഇന്ത്യ തയ്യാറായ സാഹചര്യത്തിലുള്ള ഖത്തര്‍ സന്ദര്‍ശനം അതിന്റെ ആദ്യപടിയായാണ് വിലയിരുത്തപ്പെടുന്നത്. താലിബാനുമായി നല്ല ബന്ധം സൂക്ഷിക്കുന്ന രാജ്യമാണ് ഖത്തര്‍. അമേരിക്കയും താലിബാനുമായുള്ള സമാധാന ചര്‍ച്ചകള്‍ക്ക് വഴിയൊരുക്കിയത് ഖത്തറായിരുന്നു. അതിനായി ദോഹയില്‍ താലിബാന് ഒരു ഔദ്യോഗിക കാര്യാലയം തന്നെ ഖത്തര്‍ അനുവദിച്ചിരുന്നു. ഖത്തര്‍ ദേശീയ സുരക്ഷാ ഉപദേഷ്ടാവുമായുള്ള ഇന്ത്യന്‍ വിദേശകാര്യ മന്ത്രിയുടെ കൂടിക്കാഴ്ചയ്ക്ക് ഈ സാഹചര്യത്തില്‍ കൂടുതല്‍ പ്രാധാന്യമുണ്ടെന്നാണ് നിരീക്ഷകരുടെ വിലയിരുത്തല്‍.