സ്വദേശി- വിദേശി വിവേചനമുണ്ടാവില്ല
അപേക്ഷകരില്‍ സൗദിയിലുള്ള സ്വദേശികളും വിദേശികളും ഉള്‍പ്പെടുമെന്ന് സൗദി ഹജ്ജ്, ഉംറ മന്ത്രാലയം അറിയിച്ചു. രാജ്യത്ത് താമസിക്കുന്ന എല്ലാ രാജ്യങ്ങളിലെ പൗരന്‍മാര്‍ക്കും അപേക്ഷിക്കാന്‍ അവസരമുണ്ടെന്നും രാജ്യക്കാര്‍ക്കിടയില്‍ ഇക്കാര്യത്തില്‍ വിവേചനമൊന്നും ഇല്ലെന്നും ആര്‍ക്കും പ്രത്യേക മുന്‍ഗണന നല്‍കുന്നില്ലെന്നും ഹജ്ജ്-ഉംറ കാര്യ ഉപമന്ത്രി ഡോ. അബ്ദുല്‍ ഫത്താഹ് മുശാത്ത് പറഞ്ഞു. അര്‍ഹതയുടെ അടിസ്ഥാനത്തില്‍ മാത്രമായിരിക്കും തെരഞ്ഞെടുപ്പ്. നിശ്ചിത യോഗ്യതയുള്ളവരില്‍ നിന്ന് നറുക്കെടുപ്പിലൂടെയായിരിക്കും അര്‍ഹരായവരെ തെരഞ്ഞെടുക്കുക. വാക്‌സിന്‍ എടുത്തവരും 18നും 65നും ഇടയില്‍ പ്രായമുള്ളവരുമായ ആരോഗ്യവാന്‍മാര്‍ക്കായിരിക്കും ഇത്തവണ ഹജ്ജിന് അവസരം. ജീവിതത്തില്‍ ആദ്യമായി ഹജ്ജിന് അപേക്ഷ നല്‍കുന്നവര്‍ക്ക് മുന്‍ഗണന നല്‍കും. കഴിഞ്ഞ അഞ്ച് വര്‍ഷത്തിനിടയില്‍ ഹജ്ജ് ചെയ്തവര്‍ക്ക് അവസരം നല്‍കില്ലെന്ന് നേരത്തേ അധികൃതര്‍ വ്യക്തമാക്കിയിരുന്നു.
അപേക്ഷകരില്‍ 60% പുരുഷന്മാരും 40% സ്ത്രീകളും
ഇത്തവണ ആദ്യ ദിവസം അപേക്ഷ നല്‍കിയവരില്‍ 60 ശതമാനം പുരുഷന്മാരും 40 ശതമാനം സ്ത്രീകളുമാണെന്നും മന്ത്രാലയം അറിയിച്ചു. ഇത്തവണ സ്ത്രീകള്‍ക്കൊപ്പം വിവാഹ ബന്ധം അനുവദിനീയമല്ലാത്തെ പുരുഷന്‍ (മഹ്‌റം) കൂടെ വേണമെന്ന നിബന്ധന ഉണ്ടായിരിക്കില്ലെന്ന് അധികൃതര്‍ നേരത്തേ അറിയിച്ചിരുന്നു. ഇതേത്തുടര്‍ന്നാണ് സ്ത്രീകളുടെ എണ്ണം പതിവിനേക്കാള്‍ കൂടിയതെന്ന് വിലയിരുത്തപ്പൈടുന്നു.
https://localhaj.haj.gov.sa/LHB എന്ന വെബ് പോര്‍ട്ടല്‍ വഴി തിങ്കളാഴ്ച ഉച്ചക്ക് ഒരു മണി മുതലാണ് രജിസ്ട്രേഷന് ആരംഭിച്ചത്. രജിസ്ട്രേഷന് ഈ മാസം 23 വരെ ദിവസം നീളും.
മൂന്നു മണിക്കൂറിനകം പണം അടക്കണം
അതേസമയം, ഹജ്ജിന് തിരഞ്ഞെടുക്കപ്പട്ടവര്‍ മൂന്ന് മണിക്കൂറിനകം പണമടച്ച് ബുക്കിംഗ് പൂര്‍ത്തിയാക്കണമെന്ന് ഹജ്ജ്-ഉംറ കാര്യ മന്ത്രാലയം അറിയിച്ചു. ഈ വര്‍ഷത്തെ ഹജ്ജിനായി സൗദിക്കകത്തുനിന്നുള്ള 20 ലക്ഷത്തിലേറെ പേരുടെ അപേക്ഷകള്‍ പ്രതീക്ഷിക്കുന്നതായും ഹജ്ജ്-ഉംറ കാര്യ ഉപമന്ത്രി ഡോ. അബ്ദുല്‍ ഫത്താഹ് മുശാത്ത് പറഞ്ഞു. ഇവരില്‍ നിന്ന് കോവിഡ് മാനദണ്ഡങ്ങളും മറ്റു വ്യവസ്ഥകളും പൂര്‍ത്തിയാക്കിയ 60,000 പേര്‍ക്കാണ് അവസരം നല്‍കുക. ഇതിനാല്‍ പ്രാഥമിക രജിസ്ട്രേഷന് പൂര്‍ത്തിയാക്കിയവരില്‍നിന്ന് തിരഞ്ഞെടുക്കപ്പെടുന്നവര്‍ക്ക് പണമടച്ച് അന്തിമ തീരുമാനത്തിലെത്താന്‍ മണിക്കൂറുകള്‍ മാത്രമാണ് അനുവദിക്കുകയെന്നും മന്ത്രി പറഞ്ഞു. നിശ്ചിത മണിക്കൂറിനകം പണമടക്കാത്തവരുടെ രജിസ്ട്രേഷന് മാറ്റിനിര്‍ത്തി ക്രമപ്രകാരമുള്ള അടുത്ത ആളുകള്‍ക്ക് അവസരം നല്‍കും. പണമടച്ച് രജിസ്ട്രേഷന് പൂര്‍ത്തിയാക്കിയവരുടെ ഹജ്ജ് അനുമതിപത്രം വ്യക്തിഗത പോര്‍ട്ടലായ അബ്ഷിറില്‍ ലഭ്യമാക്കും.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : hajj opportunity for 60000; four and a half lakh applications were received on the first day
Malayalam News from malayalam.samayam.com, TIL Network
