ബഹ്‌റൈനില്‍ ക്വാറന്റൈന്‍ ലംഘിച്ചതിന് പ്രവാസി യുവാവ് അറസ്റ്റിലായി; സഹായം തേടി സഹോദരന്‍

മനാമ: കൊവിഡ് ബാധിതനായ ഇന്ത്യന്‍ പ്രവാസിയെ ക്വാറന്റൈന്‍ ലംഘിച്ചുവെന്നാരോപിച്ച് ബഹ്‌റൈന്‍ പോലിസ് അറസ്റ്റ് ചെയ്ത് ജയിലിലടച്ചു. കൊവിഡ് പോസിറ്റീവാണെന്ന് കണ്ടതിനെ തുടര്‍ന്ന് ഹോം ഐസൊലേഷന്‍ നിര്‍ദ്ദേശിക്കപ്പെട്ട ബിഹാര്‍ സ്വദേശി മുഹമ്മദ് ഖാലിദ് എന്ന 34കാരന്‍ പുറത്തിറങ്ങി നടന്നുവെന്ന് ആരോപിച്ചാണ് മൂന്ന് വര്‍ഷത്തേക്ക് ജയിലിലടയ്ക്കാനും 5000 ദിനാര്‍ (10 ലക്ഷത്തോളം രൂപ) പിഴയായി നല്‍കാനും ബഹ്‌റൈന്‍ കോടതി ഉത്തരവിട്ടത്.



എന്നാല്‍ മുഹമ്മദ് ഖാലിദ് ക്വാറന്റൈന്‍ ലംഘിച്ചിട്ടില്ലെന്നും സഹോദരന്റെ മോചനത്തിന് വേണ്ടി ഇടപെടണമെന്നും ആവശ്യപ്പെട്ട് ഇന്ത്യന്‍ വിദേശകാര്യ മന്ത്രാലയത്തെയും ബഹ്‌റൈനിലെ എംബസിയെയും സമീപിച്ചിരിക്കുകയാണ് നാട്ടിലുള്ള അദ്ദേഹത്തിന്റെ സഹോദരന്‍ ഹുസൈന്‍ അഹ്മദ്. കഴിഞ്ഞ ജൂണ്‍ ഏഴിനായിരുന്നു സംഭവം. 17 ദിവസത്തേക്ക് ക്വാറന്റൈന്‍ വിധിക്കപ്പെട്ട യുവാവ് പതിനഞ്ചാമത്തെ ദിവസം പുറത്തിറങ്ങിയെന്നതായിരുന്നു ഇയാള്‍ക്കെതിരായ കുറ്റം.

Also Read: ഒമാനില്‍ മൂന്ന് ബ്ലാക്ക് ഫംഗസ് കേസുകള്‍ കണ്ടെത്തി; കൊവിഡ് മരണ നിരക്കും കൂടി

താമസിക്കുന്ന വീട്ടില്‍ നിന്ന് ഭക്ഷണം വാങ്ങാനായി പുറത്തിറങ്ങി കഫേയിലേക്ക് പോയതിനെ തുടര്‍ന്നായിരുന്നു ഇയാള്‍ പിടിയിലായത്. ക്വാറന്റൈനില്‍ കഴിയുന്നവര്‍ക്ക് ധരിക്കാനായി നല്‍കുന്ന റിസ്റ്റ് ബാന്‍ഡുമായി യുവാവ് കഫേയിലെത്തിയത് കണ്ട സ്വദേശി ഇതിന്റെ വീഡിയോ എടുത്ത് സോഷ്യല്‍ മീഡിയയില്‍ പോസ്റ്റ് ചെയ്യുകയായിരുന്നു. കൊവിഡ് പോസിറ്റീവായ ഇയാള്‍ പുറത്തിറങ്ങി കറങ്ങി നടക്കുകയാണെന്ന രീതിയിലുള്ള അടിക്കുറിപ്പോടെയായിരുന്നു വീഡിയോ പോസ്റ്റ് ചെയ്തത്. സോഷ്യല്‍ മീഡിയയിലെ വീഡിയോ ശ്രദ്ധയില്‍പ്പെട്ട പോലിസ് താമസിയാതെ ഇയാള്‍ താമസിക്കുന്ന സ്ഥലം കണ്ടെത്തി അറസ്റ്റ് ചെയ്യുകയായിരുന്നു. ഇവിടെ നിന്ന് സിത്‌റ ക്യാംപിലേക്ക് യുവാവിനെ കൊണ്ടുപോയ പോലിസ് പിസിആര്‍ ടെസ്റ്റിന് വിധേയനാക്കുകയുമുണ്ടായി. നെഗറ്റീവായിരുന്നു ഫലം. ഇതേത്തുടര്‍ന്ന് അധികൃതര്‍ റിസ്റ്റ് ബാന്റ് കൈയില്‍ നിന്ന് നീക്കം ചെയ്യുകയുമുണ്ടായി.

എന്നാല്‍ തന്റെ സഹോദരനെ വിട്ടയക്കുന്നതിന് പകരം കോടതിയില്‍ ഹാജരാക്കി ശിക്ഷയ്ക്ക് വിധേയനാക്കുകയാണ് പോലിസ് ചെയ്തതെന്ന് സഹോദരന്‍ പറഞ്ഞു. കഴിഞ്ഞ എട്ടു വര്‍ഷമായി ഇലക്ട്രീഷ്യന്‍ ആയി ജോലി ചെയ്യുന്ന യുവാവ്, കമ്പനി നല്‍കിയ വീട്ടിലായിരുന്നു ക്വാറന്റൈനില്‍ കഴിഞ്ഞിരുന്നത്. ഭക്ഷണം വാങ്ങി നല്‍കാന്‍ മറ്റാരും കൂടെയില്ലാത്ത സാഹചര്യത്തിലാണ് യുവാവ് മുറിയില്‍ പുറത്തിറങ്ങി കഫേയിലേക്ക് പോയതെന്നും സഹോദരന്‍ പറഞ്ഞു. ഏതായാലും സംഭവം പുറത്തറിഞ്ഞതോടെ ബഹ്‌റൈനിലെ ഇന്ത്യന്‍ എംബസി സഹായവുമായി രംഗത്തെത്തിയിട്ടുണ്ട്. യുവാവിന്റെ കോണ്‍ടാക്റ്റ് നമ്പര്‍ ഉള്‍പ്പെടെയുള്ള എല്ലാ വിശദാംശങ്ങളും ലഭ്യമാക്കണമന്നും യുവാവിന്റെ മോചനത്തിന് വേണ്ടി ആവശ്യമായ ഇടപെടലുകള്‍ നടത്താമെന്നും എംബസി അറിയിച്ചു.