ദോഹ: ഖത്തറിലെ കൊവിഡ് നിയന്ത്രണങ്ങളില്‍ നാളെ വെള്ളിയാഴ്ച്ച മുതല്‍ കൂടുതല്‍ ഇളവുകള്‍ പ്രഖ്യാപിച്ച് ഖത്തര്‍ മന്ത്രിസഭാ യോഗം. നിയന്ത്രണങ്ങള്‍ നീക്കുന്നതിന്റെ രണ്ടാം ഘട്ടത്തിന്റെ ഭാഗമായാണ് പ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് ഖാലിദ് ബിന്‍ ഖലീഫ ബിന്‍ അബ്ദുല്‍ അസീസ് അല്‍ താനിയുടെ അധ്യക്ഷതയില്‍ ചേര്‍ന്ന യോഗം കൂടുതല്‍ ഉളവുകള്‍ പ്രഖ്യാപിച്ചിരിക്കുന്നത്. മെയ് 28നായിരുന്നു ഇളവുകളുടെ ആദ്യഘട്ടം പ്രഖ്യാപിച്ചത്.
വാക്സിനെടുക്കാത്ത ജീവനക്കാര്‍ ആഴ്ച്ച തോറും ആന്റിജന്‍ പരിശോധന നടത്തണമെന്നാണ് ഇളവുകള്‍ പ്രഖ്യാപിക്കുന്നതിന്റെ ഭാഗമായി മുന്നോട്ടുവച്ചിരിക്കുന്ന പ്രധാന നിബന്ധന. കുട്ടികള്‍ക്ക് മാളുകളിലും സൂഖുകളിലും പ്രവേശനം, വിവാഹ ചടങ്ങുകളില്‍ കൂടുതല്‍ പേര്‍ക്ക് അനുമതി തുടങ്ങിയവയാണ് പ്രധാന ഇളവുകള്‍. രാജ്യത്തെ കൊവിഡ് വ്യാപനത്തോത് ഗണ്യമായി കുറഞ്ഞുവന്ന പശ്ചാത്തലത്തിലാണ് പുതിയ ഇളവുകളെന്ന് ഇവ പ്രഖ്യാപിച്ചുകൊണ്ട് കാബിനറ്റ് കാര്യ സഹമന്ത്രി ഡോ. ഇസ്സ ബിന്‍ സഅദ് അല്‍ ജാഫലി അല്‍ നുഐമി അറിയിച്ചു.
രണ്ടാംഘട്ടത്തിലെ പ്രധാന ഇളവുകള്‍
– സര്‍ക്കാര്‍ ഓഫിസുകളില്‍ 80 ശതമാനം ജീവനക്കാര്‍ക്ക് ഹാജരാവാം. ബാക്കിയുള്ളവര്‍ വീടുകളില്‍ നിന്ന് ജോലി ചെയ്യണം. അടിയന്തര സര്‍വീസുകള്‍ക്ക് നിബന്ധന ബാധകമല്ല.
– സ്വകാര്യ, സര്‍ക്കാര്‍ മേഖലകളില്‍ ജോലി ചെയ്യുന്ന രണ്ട് ഡോസ് വാക്സിനെടുക്കാത്ത എല്ലാ ജീവനക്കാരും ആഴ്ച്ച തോറും കൊവിഡ് റാപിഡ് ടെസ്റ്റിന് (ആന്റിജന്‍ ടെസ്റ്റ്) വിധേയരാവണം. കൊവിഡ് വന്ന് ഭേദയമാവര്‍ക്കും ആരോഗ്യ കാരണങ്ങളാല്‍ വാക്‌സിന്‍ എടുക്കുന്നതില്‍ നിന്ന് ഇളവ് നല്‍കപ്പെട്ടവര്‍ക്കും ഇക്കാര്യത്തില്‍ ഇളവുണ്ട്.
– ഓഫീസുകളിലും മറ്റും നടക്കുന്ന മീറ്റിംഗുകളില്‍ 15 പേര്‍ക്ക് പങ്കെടുക്കാം. വാക്സിനെടുക്കാത്തവര്‍ ഓണ്‍ലൈന്‍ വഴി മാത്രം.
ഇന്‍ഡോറില്‍ 10 പേര്‍, ഔട്ട്ഡോറില് 20 പേര്‍
– വാക്‌സിന്റെ രണ്ടു ഡോസും എടുത്തവരാണെങ്കില്‍ ഇന്‍ഡോറിലും മജ്ലിസിലും 10 പേര്‍ക്കും ഔട്ട്ഡോറില് 20 പേര്‍ക്കും ഒത്തുകൂടാം. അതേസമയം വാക്സിനെടുക്കാത്ത ആരെങ്കിലും കൂട്ടത്തിലുണ്ടെങ്കില്‍ ഇന്‍ഡോറില്‍ പരമാവധി അഞ്ചും പേര്‍ക്കും ഔട്ട്ഡോറില് 10 പേര്‍ക്കും മാത്രമേ ഒത്തുചേരാന്‍ അനുമതിയുള്ളൂ.
– വിവാഹ ചടങ്ങുകള്‍ നടക്കുന്ന വേദിയുടെ 40 ശതമാനം ശേഷിയില്‍ ആളുകളെ പങ്കെടുപ്പിക്കാം. എന്നാല്‍ അതിഥികളില്‍ 75 ശതമാനം പേരെങ്കിലും വാക്സിനെടുത്തവര് ആയിരിക്കണമെന്ന് നിബന്ധനയുണ്ട്
റസ്റ്റൊറന്റുകളിലും കഫേകളിലും ഇരുന്ന് കഴിക്കാം
ക്ലീന്‍ ഖത്തര്‍ സര്‍ട്ടിഫിക്കറ്റ് ഉള്ള റസ്റ്റൊറന്റുകളിലും കഫേകളിലും ഔട്ട്ഡോറില് 50 ശതമാനം പേര്‍ക്കും ഇന്‍ഡോറില്‍ 30 ശതമാനം പേര്‍ക്കും ഇരുന്ന ഭക്ഷണം കഴിക്കാം. വാണിജ്യ വ്യവസായ മന്ത്രാലയത്തിന്റെ നിബന്ധനകള്‍ പാലിക്കുന്ന മറ്റ് റസ്റ്റൊറന്റുകളിലും കഫേകളിലും ഔട്ട്ഡോറില് 30 ശതമാനം പേര്‍ക്കും ഇന്‍ഡോറില്‍ 15 ശതമാനം പേര്‍ക്കും ഇരുന്ന് ഭക്ഷണം കഴിക്കാം. എന്നാല്‍ എല്ലാ ഉപഭോക്താക്കളും രണ്ട് ഡോസ് വാക്‌സിന്‍ എടുത്തവരായിരിക്കണമെന്ന നിബന്ധനയുണ്ട്.
വ്യാപാര സ്ഥാപനങ്ങളില്‍ കുട്ടികള്‍ക്കും പ്രവേശനം
ഷോപ്പിംഗ് സെന്ററുകള്‍ ഉള്‍പ്പെടെയുള്ള വ്യാപാര സ്ഥാപനങ്ങളില്‍ 12 വയസ്സില്‍ താഴെയുള്ള കുട്ടികള്‍ക്കുള്ള പ്രവേശന വിലക്ക് നീക്കി. അവയ്ക്ക് 50 ശതമാനം ശേഷിയില്‍ പ്രവര്‍ത്തിക്കാം. ഇവിടങ്ങളിലെ ഫുഡ് കോര്‍ട്ടുകള്‍, മസ്ജിദുകള്‍, ടോയ്ലറ്റുകള്‍ എന്നിവ 30 ശതമാനം ശേഷിയില്‍ പ്രവര്‍ത്തിക്കാം. ഹോള്‍സെയില്‍ മാര്‍ക്കറ്റുകള്‍ള്‍ക്കും പരമ്പരാഗത സൂഖുകള്‍ക്കും 50 ശതമാനം ശേഷിയില്‍ പ്രവര്‍ത്തിക്കാം. ഇവിടങ്ങളിലും കുട്ടികള്‍ക്ക് പ്രവേശനം അനുവദിക്കും.
– ബ്യൂട്ടി സലൂണുകളും ബാര്‍ബര്‍ ഷോപ്പുകളും 30 ശതമാനം ശേഷിയില്‍ പ്രവര്‍ത്തനം തുടരും. ജീവനക്കാരും ഉപഭോക്താക്കളും വാക്സിനെടുത്തരിക്കണം.
– സിനിമാ തിയേറ്ററുകള്‍ക്ക് 30 ശതമാനം ശേഷിയില്‍ 12 വയസ്സിന് മുകളിലുള്ളവരെ പ്രവേശിപ്പിക്കാം. ചുരുങ്ങിയത് 75 ശതമാനം പേര്‍ വാക്സിനെടുത്തവരായിരിക്കണം.
– ഹെല്‍ത്ത്, ഫിറ്റ്‌നസ് ക്ലബ്ബുകള്‍, സ്പാ, മസാജ് സെന്ററുകള്‍ എന്നിവയ്ക്ക് 40 ശതമാനം ശേഷിയില്‍ പ്രവര്‍ത്തിക്കാം. ജീവനക്കാരും ഉപഭോക്താക്കളും വാക്സിനെടുത്തവര് ആയിരിക്കണം.
വിദ്യാഭ്യാസ സ്ഥാപനങ്ങള്‍ 30% ശേഷിയില്‍
സ്‌കൂളുകള്‍, നഴ്‌സറികള്‍, ചൈല്‍ഡ് കെയര്‍ സെന്ററുകള്‍, മറ്റ് വിദ്യാഭ്യാസ സ്ഥാപനങ്ങള്‍, പരിശീലന കേന്ദ്രങ്ങള്‍ എന്നിവയ്ക്ക് 30 ശതമാനം ശേഷിയില്‍ പ്രവര്‍ത്തിക്കാം. അധ്യാപകര്‍ ഉള്‍പ്പെടെയുള്ളവര്‍ വാക്‌സിന്‍ എടുത്തവരായിരിക്കണം. സ്‌കൂളുകളില്‍ ഓണ്‍ലൈന്‍ പഠനവും തുടരും. ലൈബ്രറികളിലും മ്യൂസിയങ്ങളിലും 50 ശതമാനം പേരെ പ്രവേശിപ്പിക്കാം. വാക്സിനെടുത്ത ജീവനക്കാരെ വച്ച് ഡ്രൈവിംഗ് സ്‌കൂളുകള്‍ 30 ശതമാനം ശേഷിയില്‍ പ്രവര്‍ത്തിക്കാം. ഭിന്നശേഷിക്കാര്‍ക്ക് ഒരു അധ്യാപകന് അഞ്ച് കുട്ടികള്‍ എന്ന തോതില്‍ പ്രവര്‍ത്തിക്കാം. അധ്യാപകന് വാക്‌സിന്‍ എടുത്തിരിക്കണം.
– ഇന്‍ഡോര്‍, ഔട്ട്ഡോര് പ്രൊഫഷനല്‍ പരിശീലന കേന്ദ്രങ്ങള്‍ക്ക് അനുമതിയുണ്ട്. അമേച്ചര്‍ പരിശീലനങ്ങള്‍ക്ക് ഔട്ട്ഡോറില് വാക്സിനെടുത്ത 20 പേര്‍ക്കും ഇന്‍ഡോറില്‍ വാക്സിനെടുത്ത 10 പേര്‍ക്കും മാത്രം അനുമതി.
കായിക മല്‍സരങ്ങള്‍ക്ക് കാണികളാവാം
അന്താരാഷ്ട്ര, പ്രാദേശിക കായിക മല്‍സരങ്ങള്‍ 30 ശതമാനം കാണികളുമായി നടത്താന്‍ അനുമതി. ഇതിന് ആരോഗ്യ മന്ത്രാലയത്തില്‍ നിന്ന് മുന്‍കൂര്‍ അനുമതി നേടണം. കാണികളില്‍ 75 ശതമാനം പേര്‍ വാക്സിനെടുത്തിരിക്കണം. അടച്ചിട്ട സ്ഥലങ്ങളില്‍ പൂര്‍ണമായും വാക്സിനെടുത്ത 20 ശതമാനം കാണികള്‍ മാത്രമേ പാടുള്ളൂ.
– ഖത്തര്‍ ആരോഗ്യ മന്ത്രാലയം അംഗീകരിച്ച പ്രാദേശിക, അന്താരാഷ്ട്ര സ്‌പോര്‍ട് മല്‍സരങ്ങള്‍ക്കുള്ള പരിശീലനത്തിന് അനുമതിയുണ്ട്.
– കളി സ്ഥലങ്ങള്‍, എന്റര്‍ടെയിന്‍മെന്റ് സോണുകള്‍ എന്നിവിടങ്ങളില്‍ ഓട്ട്‌ഡോറില്‍ 30 ശതമാനം പേര്‍ക്കും ഇന്‍ഡോറില്‍ വാക്സിനെടുത്ത 20 ശതമാനം പേര്‍ക്കും അനുമതി.
– ഔട്ട്ഡോര് സ്വിമ്മിംഗ് പൂളുകള്‍ 40 ശതമാനം ശേഷിയില്‍. ഇന്‍ഡോര്‍ സ്വിമ്മിംഗ് പൂളുകളില്‍ വാക്സിനെടുത്ത 20 ശതമാനം പേര്‍ മാത്രം.
– ഇവന്റുകള്‍, കോണ്‍ഫറന്‍സുകള്‍, എക്‌സിബിഷനുകള്‍ എന്നിവ 30 ശതമാനം ശേഷിയില്‍ നടത്താം. ആരോഗ്യ മന്ത്രാലയത്തിന്റെ അനുമതിക്ക് വിധേയം.
പൊതുഗതാഗതം 30% ശേഷിയില്‍
മെട്രോ സര്‍വീസ്, മറ്റ് പൊതുഗതാഗത സംവിധാനങ്ങള്‍ എന്നിവ വെള്ളി, ശനി ദിവസങ്ങളില്‍ ഉള്‍പ്പെടെ 30 ശതമാനം ശേഷിയില്‍ പ്രവര്‍ത്തിക്കും. ചെറു വാഹനങ്ങളില്‍ ഡ്രൈവര്‍ ഉള്‍പ്പടെ പരമാവധി നാലുപേര്‍ മാത്രമേ പാടുള്ളൂ. ഒരേ കുടുംബത്തില്‍ പെട്ടവരാണെങ്കില്‍ ഇത് ബാധകമല്ല. എന്നാല്‍ ബസ്സുകളില്‍ പരമാവധി ശേഷിയുടെ പകുതി പേര്‍ക്ക് യാത്ര ചെയ്യാം.
സ്വകാര്യ ആശുപത്രികള്‍ 80% ശേഷിയില്‍
രാജ്യത്തെ സ്വകാര്യ ആശുപത്രികള്‍ക്കും ക്ലിനിക്കുകള്‍ക്കും മറ്റ് ആരോഗ്യ സ്ഥാപനങ്ങള്‍ക്കും 80 ശതമാനം ശേഷിയില്‍ പ്രവര്‍ത്തിക്കാം. അതേസമയം, കൊവിഡ് മാനദണ്ഡങ്ങള്‍ കൃത്യമായി പാലിക്കുന്നുവെന്ന് ഉറപ്പുവരുത്തണം.
– ആളുകള്‍ വീടുകളില്‍ നിന്ന് പുറത്തിറങ്ങുമ്പോള്‍ മാസ്‌ക്ക് ധരിക്കുകയും ഇഹ്തിറാസ് ആപ്പ് ആക്ടിവേറ്റ് ചെയ്യുകയും വേണം.
– ഹോസ്പിറ്റാലിറ്റി, ക്ലീനിംഗ് സര്‍വീസുകളില്‍ വാക്സിനെടുത്ത ജീവനക്കാര്‍ക്കുള്ള അനുമതി തുടരും.
പാര്‍ക്കുകളിലും ബീച്ചുകളിലും 40% പേര്‍
പാര്‍ക്കുകള്‍, കോര്‍ണിഷ്, ബീച്ചുകള്‍ എന്നിവിടങ്ങളില്‍ 10 പേരടങ്ങുന്ന സംഘങ്ങള്‍ക്ക് അനുമതി. ഒരേ കൂടുംബത്തില്‍പ്പെട്ടവര്‍ക്ക് എണ്ണം ബാധകമല്ല. പക്ഷെ, ആകെ ശേഷിയുടെ 40 ശതമാനം പേര്‍ക്ക് മാത്രം പ്രവേശനം. ബോട്ടുകളും ടൂറിസ്റ്റ് യാനങ്ങളും 50 ശതമാനം ശേഷിയില്‍ പ്രവര്‍ത്തിക്കും. വാക്സിനെടുത്ത പരമാവധി 15 പേര്‍ വരെ ആവാം. വാക്സിനെടുക്കാത്തവര്‍ പരമാവധി മൂന്നു പേര്‍ മാത്രം. പള്ളികളില്‍ ഏഴ് വയസ്സിന് മുകളിലുള്ള കുട്ടികള്‍ക്കും പ്രവേശനം അനുവദിക്കും.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : qatar announced in second phase lifting of covid-19 restrictions weekly rapid antigen test entry for kids in mall
Malayalam News from malayalam.samayam.com, TIL Network
