കോൺഗ്രസിനുള്ളിലെ ഇടതുപക്ഷ മുഖം; പി ടി തോമസിനെ അനുസ്മരിച്ച് ഷിബു ബേബി ജോൺ

കൊച്ചി: കോൺഗ്രസ് പാർട്ടിയ്ക്കുള്ളിലെ ഇടതുപക്ഷ മുഖമായിരുന്നു പി ടി തോമസെന്ന് മുൻ മന്ത്രിയും ആർഎസ്പി നേതാവുമായ ഷിബു ബേബി ജോൺ. ഒരു വലിയവന്‍റെ മുന്നിലും നിലപാടിൽ വെള്ളം ചേർക്കാൻ തയ്യാറാകാത്ത ആർജവത്തിന്‍റെ പേരായിരുന്നു പി ടിയെന്നും അദ്ദേഹം അനുശോചന കുറിപ്പിൽ പറഞ്ഞു. പി ടി തോമസിനെ പരിചയപ്പെട്ടതും ഒരുമിച്ച് പ്രവർത്തിച്ചതുമായ അനുഭവം പങ്കുവെച്ചുകൊണ്ടാണ് ഷിബു ബേബി ജോണിന്‍റെ കുറിപ്പ്.



പി ടി തോമസിനെ ആദ്യമായി പരിചയപ്പെടുന്നത് 1980 – 81 കാലയളവിൽ മാർ ഇവാനിയോസ് കോളേജിൽ പ്രീഡിഗ്രിയ്ക്ക് പഠിയ്ക്കുമ്പോഴാണ്. അന്ന് അദ്ദേഹം കെ എസ് യു സംസ്ഥാന പ്രസിഡന്‍റായിരുന്നു. 2001 ൽ ഞാൻ എംഎൽഎ ആയ ശേഷമാണ് അദ്ദേഹവുമായി കൂടുതൽ അടുത്തത്. ഒരു നവാഗതനെന്ന നിലയിൽ തനിയ്ക്ക് വേണ്ട ഉപദേശങ്ങൾ നൽകിയിരുന്നത് അദ്ദേഹമായിരുന്നെന്നും ആർഎസ്പി നേതാവ് ഓർത്തെടുക്കുന്നു.

Also Read : അന്നു മുതലേ ശക്തനായ എതിരാളി; പി ടിയുടെ വിയോഗം കോൺഗ്രസിനും നാടിനും വലിയ നഷ്ടമെന്ന് തോമസ് ഐസക്



“നിയമസഭയിൽ ധരിയ്ക്കുന്ന വേഷത്തിലടക്കം അദ്ദേഹം എന്നെ ഉപദേശിച്ചിരുന്നു. ഒരിയ്ക്കൽ ഞാൻ സഭയിൽ കളർഫുൾ വസ്ത്രങ്ങൾ അണിഞ്ഞ് പോയപ്പോൾ അത് പാടില്ലെന്ന് നിർദ്ദേശിച്ചതും, സഭയിലെ പ്രസംഗങ്ങൾ സസൂക്ഷ്മം കേട്ട് അതിലെ തെറ്റുകുറ്റങ്ങൾ ചൂണ്ടിക്കാണിച്ചതും ചിലപ്പോഴൊക്കെ ‘ പ്രസംഗം നന്നായി’ എന്ന് പറഞ്ഞ് കയ്യിൽ തട്ടി അഭിനന്ദിച്ചതുമൊക്കെ ഓർക്കുന്നു.”

“അസാധാരണമായ കാഴ്ച്ചപ്പാടും പാണ്ഡിത്യവുമുള്ള വ്യക്തിത്വത്തിനുടമയായിരുന്നു പി ടി. ഇന്ന് പലപ്പോഴും ജനപ്രതിനിധിയാകാനുള്ള യോഗ്യത മൈതാന പ്രസംഗങ്ങൾ നടത്താനുള്ള കഴിവ് മാത്രമായി അധ:പതിയ്ക്കുമ്പോൾ അതിൽ നിന്നും തികച്ചും വ്യത്യസ്തമായിരുന്നു പി ടിയുടെ ശൈലി. വിഷയങ്ങൾ ആഴത്തിൽ പഠിക്കുകയും അതിൽ സ്വന്തമായി നിലപാട് രൂപീകരിയ്ക്കുകയും ചെയ്തിരുന്ന വ്യക്തിയായിരുന്നു അദ്ദേഹം.” ഷിബു ബേബി ജോൺ പറയുന്നു.

Also Read : ‘നിങ്ങളൊരു കോൺഗ്രസുകാരനാണോ?’ പി ടിയുടെ മരണവാർത്തയ്ക്ക് പിന്നാലെ, സഞ്ജുവിന് ആശംസ; തരൂരിനെതിരെ പ്രവർത്തകർ



ലോകസഭാ സീറ്റ് നിലപാടുകളുടെ പേരിൽ നിഷേധിക്കപ്പെട്ടപ്പോഴും നഷ്ടപ്പെട്ടതിനെ ഓർത്ത് അദ്ദേഹം ഒരിയ്ക്കലും ഖേദിച്ചിരുന്നില്ലെന്നും ഷിബു ബേബി ജോൺ ചൂണ്ടിക്കാട്ടി. “ഒരു വലിയവന്‍റെ മുന്നിലും നിലപാടിൽ വെള്ളം ചേർക്കാൻ തയ്യാറാകാത്ത ആർജവത്തിന്‍റെ പേരായിരുന്നു പി ടി. ആ കാർക്കശ്യത്തിൽ നിന്നും അദ്ദേഹത്തെ പിന്തിരിപ്പിക്കാൻ ലോകസഭാ സീറ്റ് എന്ന പ്രലോഭനത്തിന് പോലും സാധിച്ചില്ല.” അദ്ദേഹം പറഞ്ഞു.

പി ടി തോമസിന്‍റെ സംഘടനാപാടവം അരൂർ ഉപതെരഞ്ഞെടുപ്പ് വേളയിലാണ് തനിക്ക് മനസിലായത്. പി ടിയുടെ പഴുതടച്ചുള്ള തെരഞ്ഞെടുപ്പ് പ്രവർത്തനമായിരുന്നു അരൂർ പിടിച്ചെടുക്കുന്നതിന് യുഡിഎഫിന് നെടുംതൂണായത്. എന്‍റെ ഏറ്റവും നല്ല സുഹൃത്തും, കേരള രാഷ്ട്രീയത്തിൽ പരിസ്ഥിതി അടക്കമുള്ള വിഷയങ്ങളിൽ കർക്കശമായ നിലപാടുകൾ സ്വീകരിയ്ക്കുന്ന അപൂർവ വ്യക്തിത്വങ്ങളിലൊരാളുമായ പ്രിയപ്പെട്ട പി ടി തോമസിന്‍റെ അകാലത്തിലുള്ള നിര്യാണം അദ്ദേഹത്തിന്‍റെ പാർട്ടിയ്ക്ക് മാത്രമല്ല, കേരള രാഷ്ട്രീയ ഭൂമികയ്ക്കും കേരള സമൂഹത്തിനാകെയും ഒരിയ്ക്കലും നികത്താനാകാത്ത നഷ്ടമാണെന്നും ഷിബു ബേബി ജോൺ അനുസ്മരിച്ചു.