Mary T | Samayam Malayalam | Updated: Dec 23, 2021, 8:20 AM
ലോകോത്തര നിലവാരത്തിലുള്ള മുഴുനീള ഡിജെ പാര്‍ട്ടികള്‍, രണ്ട് വെടിക്കെട്ടുകള്‍, എക്സ്പോയുടെ പ്രധാന വേദിയായ അല്‍ വസല്‍ പ്ലാസയില്‍ അര്‍ധരാത്രിയുള്ള ബോള്‍ ഡ്രോപ്പ് എന്നിവയാണ് പുതുവത്സര ആഘോഷത്തിന്റെ ഭാഗമായി നടക്കുക
ഡിസംബര്‍ 31ന് വൈകിട്ട് മൂന്നിന് ആഘോഷം തുടങ്ങും
ലോകോത്തര നിലവാരത്തിലുള്ള മുഴുനീള ഡിജെ പാര്‍ട്ടികള്‍, രണ്ട് വെടിക്കെട്ടുകള്‍, എക്സ്പോയുടെ പ്രധാന വേദിയായ അല്‍ വസല്‍ പ്ലാസയില്‍ അര്‍ധരാത്രിയുള്ള ബോള്‍ ഡ്രോപ്പ് എന്നിവയാണ് പുതുവത്സര ആഘോഷത്തിന്റെ ഭാഗമായി നടക്കുക. കൊവിഡ് പെരുമാറ്റച്ചട്ടം പാലിച്ചുകൊണ്ടായിരിക്കും ന്യൂ ഇയര്‍ ആഘോഷങ്ങളെന്ന് സംഘാടകര്‍ അറിയിച്ചു. ആഗോള ടൈം സോണിന് അനുസൃതമായാണ് 13 മണിക്കൂര്‍ നീണ്ടു നില്‍ക്കുന്ന പരിപാടികള്‍ സംഘടിപ്പിക്കുന്നത്. ഡിസംബര്‍ 31ന് വൈകിട്ട് മൂന്നിന് ആഘോഷ പരിപാടികള്‍ക്ക് തുടക്കമാവും. അന്ന് രാത്രി 11.30ന് ദിമിത്രി വെഗാസിന്റെ നേതൃത്വത്തിലുള്ള ഡിജെ പാര്‍ട്ടിക്ക് എക്സ്പോയിലെ ജൂബിലി ഹാളില്‍ തുടക്കമാവും. രാത്രി 1.30 മുതല്‍ അര്‍മിന്‍ വാന്‍ ബുരന്റെ ഡിജെ പാര്‍ട്ടി സദസ്സിനെ പുളകമണിയിക്കും. അര്‍ധ രാത്രി 12 മണിക്കും പുലര്‍ച്ചെ മൂന്നു മണിക്കുമാണ് വെടിക്കെട്ടുകള്‍ അരങ്ങേറുക. 18 വയസ്സിന് മുകളിലുള്ള എല്ലാവരും വാക്സിനേഷന്‍ സര്‍ട്ടിഫിക്കറ്റോ 72 മണിക്കൂറിനിടയില്‍ നടത്തിയ പിസിആര്‍ പരിശോധനയിലെ നെഗറ്റീവ് സര്‍ട്ടിഫിക്കറ്റോ ഹാജരാക്കണം.
ദുബായ് മെട്രോ നിര്‍ത്താതെ സര്‍വീസ് നടത്തും
ന്യൂ ഇയര്‍ ദിനത്തിന്റെ തലേന്ന് ദുബായ് മെട്രോ വിശ്രമിക്കില്ല. മുഴുവന്‍ സമയത്തും മെട്രോ സര്‍വീസ് നടത്തുമെന്ന് അധികൃതര്‍ അറിയിച്ചു. കൊവിഡ് മഹാമാരി ദുരന്തം വിതച്ച രണ്ടു വര്‍ഷത്തിന് ശേഷം പൂര്‍വാധികം ശക്തിയോടെയാണ് ലോകം ഇത്തവണ പുതുവത്സരത്തെ വരവേല്‍ക്കുന്നതെന്ന് എക്സ്പോയുടെ ചീഫ് ഇവന്റ്സ് ആന്റ് എന്റര്‍ടെയിന്‍മെന്റ് ഓഫീസര്‍ താരീഖ് ഗോഷെ പറഞ്ഞു. എക്സ്പോയില്‍ 192 രാജ്യങ്ങള്‍ക്കാണ് 182 ദിവസത്തിലേറെ കാലം തങ്ങള്‍ ആതിഥ്യമരുളുന്നത്. അറബ് ലോകത്തു തന്നെ ഏറ്റവും വലിയ പരിപാടിയാണിത്. പുതിയ ശുഭാപ്തി വിശ്വാസത്തോടെയാണ് 2022നെ നാം വരവേല്‍ക്കുന്നത്. ഇതിന്റെ ഭാഗമായി ലോകോത്തര കലാകാരന്മാരെ പങ്കെടുപ്പിച്ച് വിനോദ പരിപാടികള്‍ സംഘടിപ്പിക്കാന്‍ സാധിച്ചതില്‍ സന്തോഷമുണ്ടെന്നും അദ്ദേഹം പറഞ്ഞു.
ആഘോഷങ്ങള്‍ കൊവിഡ് നിയന്ത്രണങ്ങള്‍ പാലിച്ച്
രാജ്യത്ത് കൊവിഡ് വ്യാപനത്തിന്റെ തോത് ചെറിയ തോതില്‍ വര്‍ധിച്ചു വരുന്ന സാഹചര്യത്തിലും ഒമിക്രോണ്‍ വ്യാപനം പ്രതിരോധിക്കുന്നതിനുമായി ദുബായ് എക്സ്പോയില്‍ മുന്‍കരുതല്‍ നടപടികള്‍ ശക്തമാക്കാന്‍ കഴിഞ്ഞ ദിവസം സംഘാടകര്‍ തീരുമാനിച്ചിരുന്നു. ഇതിന്റെ ഭാഗമായി എക്സ്പോ വേദിയിലെ പിസിആര്‍ ടെസ്റ്റിംഗ് കേന്ദ്രങ്ങളുടെ എണ്ണം നാലാക്കി വര്‍ധിപ്പിച്ചു. ഇവിടങ്ങളില്‍ എക്സ്പോയിലെ മുഴുവന്‍ ജീവനക്കാര്‍ക്കും വിവിധ രാജ്യങ്ങളിലെ പവലിയനിലെ ജീവനക്കാര്‍ക്കും സൗജന്യമായി പിസിആര്‍ ടെസ്റ്റ് നടത്തുന്നതിനുള്ള പരിശോധനാ സംവിധാനം ലഭ്യമാക്കും.
ഒമിക്രോണ്‍ വ്യാപനം തടയുന്നതിനായി എക്സ്പോയിലെ ഏതാനും പരിപാടികള്‍ താത്ക്കാലികമായി നിര്‍ത്തിവയ്ക്കാനും സംഘാടകര്‍ തീരുമാനിച്ചു. ജനങ്ങളുമായി കലാകാരന്മാര്‍ കൂടുതലായി ഇടപഴകാന്‍ സാധ്യതയുള്ള പരേഡുകള്‍, റോവിംഗ് എന്റര്‍ടെയിനര്‍മാരുടെ വിനോദ പരിപാടികള്‍ എന്നിവയാണ് താത്ക്കാലികമായി റദ്ദാക്കിയത്. ജനങ്ങളുമായി കൂടുതല്‍ ഇടപഴകുന്നത് മൂലമുള്ള കൊവിഡ് വ്യാപന സാധ്യത കുറയ്ക്കുകയെന്ന ലക്ഷ്യത്തോടെയാണിത്.
ദുബായില്‍ പുതുവത്സരത്തിന് മൂന്നു ദിവസം അവധി
പുതുവര്‍ഷപ്പിറവിയുമായി ബന്ധപ്പെട്ട് ദുബായില്‍ മൂന്ന് ദിവസത്തെ അവധി ലഭിക്കും. ജനുവരി ഒന്നിന് ഔദ്യോഗിക അവധിയായിരിക്കുമെന്ന് ദുബായ് ഗവണ്‍മെന്റ് ഹ്യൂമണ്‍ റിസോഴ്സസ് വകുപ്പ് അറിയിച്ചു. അടുത്ത വര്‍ഷം മുതല്‍ നിലവില്‍ വരുന്ന പുതിയ വാരാന്ത്യ അവധി ദിനങ്ങള്‍ പ്രകാരം ജനുവരി രണ്ട് ഞായറാഴ്ചയും അവധിയായിരിക്കും. ഡിസംബര്‍ 31 വെള്ളിയാഴ്ചയാണെങ്കിലും അവധി ദിനങ്ങളിലെ മാറ്റം ജനുവരി ഒന്ന് മുതല്‍ മാത്രമേ പ്രാബല്യത്തില്‍ വരൂ എന്നുള്ളതിനാല്‍ അന്നും പൊതു അവധിയായിരിക്കും. ശനി, ഞായര്‍ ദിവസങ്ങളില്‍ കൂടി അവധി ലഭിക്കുന്നതോടെ ആകെ മൂന്ന് ദിവസത്തെ അവധിയായിരിക്കും ദുബായില്‍ ലഭിക്കുക. ജനുവരി മൂന്ന് തിങ്കളാഴ്ചയായിരിക്കും അടുത്ത പ്രവൃത്തി ദിവസം. ജനുവരി ഒന്ന് മുതല്‍ രാജ്യത്തെ സര്‍ക്കാര്‍ മേഖലയിലെ വാരാന്ത്യ അവധി ദിനങ്ങളില്‍ മാറ്റം വരികയാണ്. ആഴ്ചയില്‍ നാലര ദിവസം പ്രവര്‍ത്തനവും മൂന്നര ദിവസം അവധിയുമാണ് പുതിയ രീതി. തിങ്കള്‍ മുതല്‍ വെള്ളിയാഴ്ച ഉച്ച വരെയായിരിക്കും പ്രവൃത്തി സമയം.
Video-‘നിലപാടുകളുടെ രാജകുമാരൻ’, വിട്ടുവീഴ്ചയില്ലാത്ത പോരാട്ടം അവസാനിക്കുന്നു; പിടി തോമസിനു വിട
‘നിലപാടുകളുടെ രാജകുമാരൻ’, വിട്ടുവീഴ്ചയില്ലാത്ത പോരാട്ടം അവസാനിക്കുന്നു; പിടി തോമസിനു വിട
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : new year celebration at dubai expo will last 13 hours
Malayalam News from Samayam Malayalam, TIL Network
