Sumayya P | Samayam Malayalam | Updated: 17 Jun 2021, 06:16:48 PM
ജൂണ്‍ 20 മുതല്‍ രാജ്യത്തെ പ്രധാന വാക്‌സിനേഷന്‍ കേന്ദ്രം ഇവിടെയായിരിക്കുമെന്ന് ആരോഗ്യ മന്ത്രാലയം അറിയിച്ചു
മാസ് ഡ്രൈവിന് കണ്‍വെന്‍ഷന്‍ സെന്റര്‍ ഒരുങ്ങി
45 വയസ്സിന് മുകളിലുള്ളവര്‍ക്കും വാക്സിന് വിതരണം ചെയ്യുന്നതിനായി ഖുരിയാത്തിലെ വിശാലമായ ഒമാന്‍ കണ്‍വെന്‍ഷന്‍ ആന്റ് എക്‌സിബിഷന്‍ സെന്റര്‍ ഒരുങ്ങിക്കഴിഞ്ഞതായി അധികൃതര്‍ അറിയിച്ചു. രാവിലെ എട്ട് മണി മുതല്‍ ഉച്ചയ്ക്ക് രണ്ടു മണി വരെയും വൈകിട്ട് മൂന്ന് മണി മുതല്‍ രാത്രി ഒന്‍പത് മണി വരെയുമായിരിക്കും വാക്സിന് വിതരണം. അവധി ദിവസമായ വെള്ളിയും ശനിയും രാവിലെ ഒന്‍പതിനും വൈകിട്ട് നാലിനും ഇടയിലുള്ള സമയത്ത് വാക്സിന് നല്‍കും. ജൂണ്‍ 20 മുതല്‍ രാജ്യത്തെ പ്രധാന വാക്‌സിനേഷന്‍ കേന്ദ്രം ഇവിടെയായിരിക്കുമെന്ന് ആരോഗ്യ മന്ത്രാലയം അറിയിച്ചു. കണ്‍വെന്‍ഷന്‍ സെന്റര്‍ വാക്‌സിനേഷന്‍ കേന്ദ്രമാക്കി മാറ്റുന്നതിനുള്ള പ്രവര്‍ത്തനങ്ങള്‍ അന്തിമഘട്ടത്തിലാണ്. വാക്സിന് വിതരണത്തിന് ആവശ്യമായ ഉപകരണങ്ങളും മറ്റ് സജ്ജീകരണങ്ങളും ഒരുക്കുന്നതിലെ പുരോഗതി വിലയിരുത്തുന്നതിനായി ആരോഗ്യ മന്ത്രാലയം അണ്ടര്‍ സെക്രട്ടറി ഡോ. മുഹമ്മദ് ബിന്‍ സയ്ഫ് അല്‍ ഹുസ്‌നി, പൈതൃക-ടൂറിസം വകുപ്പ് മന്ത്രി മൈസ ബിന്‍ത് സയ്ഫ് അല്‍ മഹ്‌റൂഖി എന്നിവരുടെ നേതൃത്വത്തിലുള്ള സംഘം കണ്‍വെന്‍ഷന്‍ സെന്റര്‍ സന്ദര്‍ശിച്ചു.
മാസ് ഡ്രൈവിന്റെ രണ്ടാം ഘട്ടം
കൊവിഡ് വാക്‌സിനേഷന്‍ ക്യാംപയിന്‍ ശക്തിപ്പെടുത്തുന്നതിന്റെ ഭാഗമായി മൂന്ന് ഘട്ടങ്ങളിലായി നടത്തുന്ന മാസ് വാക്‌സിനേഷന്‍ ഡ്രൈവിന്റെ രണ്ടാം ഘട്ടത്തില്‍ ഉള്‍പ്പെടുത്തിയാണ് 45നു മുകളിലുള്ളവര്‍ക്ക് കൂടി വാക്സിന് നല്‍കുന്നത്. ഒമാന്‍ കണ്‍വെന്‍ഷന്‍ സെന്ററിനു പുറമെ, ഖുരിയാത്തിലെ അല്‍ സഹല്‍ ഹെല്‍ത്ത് സെന്ററില്‍ ഞായര്‍ മുതല്‍ വ്യാഴം വരെയുള്ള പ്രവൃത്തി ദിനങ്ങളില്‍ രാവിലെ എട്ട് മണി മുതല്‍ ഉച്ചയ്ക്ക് രണ്ട് മണി വരെ വാക്സിന് നല്‍കും. സീബിലുള്ള ഒമാന്‍ ഓട്ടോമൊബൈല്‍ അസോസിയേഷനില്‍ ഒരുക്കിയിട്ടുള്ള ഡ്രൈവ് ത്രൂ കേന്ദ്രത്തില്‍ വൈകിട്ട് നാലിനും രാത്രി ഒന്‍പതിനും ഇടയിലുള്ള സമയത്തായിരിക്കും വാക്സിന് നല്‍കുക.
ഓഫീസുകളില്‍ പ്രവേശിക്കാന്‍ വാക്സിന് നിര്‍ബന്ധമാക്കും
45നു മുകളില്‍ പ്രായമുള്ളവര്‍ക്ക് വാക്സിന് വിതരണം ആരംഭിക്കുന്ന പശ്ചാത്തലത്തില്‍ ഇനിയും രജിസ്റ്റര്‍ ചെയ്തിട്ടില്ലാത്ത സ്വദേശികളും പ്രവാസികളും ഉള്‍പ്പെടെയുള്ളവര്‍ എത്രയും വേഗം രജിസ്‌ട്രേഷന്‍ നടപടികള്‍ പൂര്‍ത്തിയാക്കണമെന്ന് ആരോഗ്യ മന്ത്രാലയത്തിന്റെ പകര്‍ച്ചവ്യാധി പ്രതിരോധ വിഭാഗം ഡയരക്ടര്‍ ബദര്‍ ബിന്‍ സയ്ഫ് അല്‍ റവാഹി ഓര്‍മപ്പെടുത്തി. സമീപ ഭാവിയില്‍ വാക്സിന് എടുത്തവര്‍ക്കു മാത്രമേ സര്‍ക്കാര്‍ ഓഫീസുകളും വിദ്യാഭ്യാസ സ്ഥാപനങ്ങളും ഉള്‍പ്പെടെയുള്ളവയില്‍ പ്രവേശനം അനുവദിക്കൂ. അതുമായി ബന്ധപ്പെട്ട ചര്‍ച്ചകള്‍ പുരോഗമിക്കുകയാണെന്നും അദ്ദേഹം പറഞ്ഞു. നിലവിലെ വാക്സിന് വിതരണത്തിന്റെ വേഗത തുടരുകയാണെങ്കില്‍ ജൂലൈക്കു മുമ്പായി രാജ്യത്തെ 30 ശതമാനം പേര്‍ക്കും കൊവിഡ് വാക്സിന് ലഭിക്കുമെന്നാണ് പ്രതീക്ഷയെന്നും അദ്ദേഹം പറഞ്ഞു.
70,000ത്തോളം ഡിപ്ലോമ വിദ്യാര്‍ഥികള്‍ക്ക് വാക്സിന് നല്‍കി
ജൂലൈ പകുതിയോടെ ആരംഭിക്കുന്ന മൂന്നാം ഘട്ട മാസ് ഡ്രൈവില്‍ ഉന്നത വിദ്യാഭ്യാസ മേഖലയിലെ വിദ്യാര്‍ഥികള്‍ക്കും അധ്യാപകര്‍ക്കും വിദ്യാഭ്യാസ രംഗത്തെ മറ്റ് ജീവനക്കാര്‍ക്കും വാക്സിന് നല്‍കും. മെയ് 25ന് ആരംഭിച്ച മാസ് ഡ്രൈവിന്റെ ഒന്നാം ഘട്ടത്തില്‍ ജനറല്‍ ഡിപ്ലോമ വിദ്യാര്‍ഥികള്‍ക്കും അവരുടെ അധ്യാപകര്‍ക്കും വാക്സിന് നല്‍കിയിരുന്നു. ജൂണ്‍ അവസാനത്തില്‍ പരീക്ഷയെഴുതുന്ന 70,000ത്തോളം ജനറല്‍ ഡിപ്ലോമ വിദ്യാര്‍ഥികള്‍ക്കാണ് വാക്സിന് നല്‍കിയത്. നേരത്തേ ആദ്യ ഡോസ് എടുത്തവര്‍ക്കുള്ള രണ്ടാം ഡോസും ആദ്യ ഘട്ടത്തില്‍ വിതരണം ചെയ്യുന്നുണ്ട്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : free vaccine for all those 45 years and above in oman
Malayalam News from malayalam.samayam.com, TIL Network
