ആൾക്കൂട്ട ആക്രമണം തടയൽ നിയമം ബി.ജെ.പി എതിർത്തത് എന്തിന്?

മതം, വംശം, ജാതി, ലിംഗം, ജൻമസ്ഥലം, ഭാഷ, ഭക്ഷണശീലം, ലൈംഗിക ചായ്‌വ്, രാഷ്ട്രീയ നിലപാട് തുടങ്ങിവയുടെ അടിസ്ഥാനത്തിൽ ആൾക്കൂട്ട ആക്രമണങ്ങൾ നടത്തുന്നവരെയും കൊലപാതകങ്ങൾ നടത്തുന്നവരെയും ഗൂഡാലോചന നടത്തുന്നവരെയും അക്രമങ്ങൾക്ക് പ്രേരിപ്പിക്കുന്നവരെയും സഹായിക്കുന്നവരെയും നേരിടാനാണ് സർക്കാർ ബിൽ കൊണ്ടുവന്നിരിക്കുന്നത്. കുറ്റവാളികളെ മൂന്ന് വർഷം മുതൽ ജീവപര്യന്തം വരെ തടവിന് ശിക്ഷിക്കാമെന്ന് ബിൽ വ്യവസ്ഥ ചെയ്യുന്നു. പ്രതികളിൽ നിന്ന് 25 ലക്ഷം രൂപ വരെ പിഴയായി ഈടാക്കാനും അവരുടെ സ്വത്ത് കണ്ടുകെട്ടാനും കഴിയും.

അക്രമാന്തരീക്ഷം സൃഷ്ടിക്കാനും ആൾക്കൂട്ട അക്രമം സൃഷ്ടിക്കാനും സോഷ്യൽ മീഡിയ ഉപയോഗിക്കുന്നവരെ കണ്ടെത്തി നടപടി സ്വീകരിക്കാനും ബിൽ ശുപാർശ ചെയ്യുന്നു. ‘ശത്രുതാപരമായ അന്തരീക്ഷം’ ഉണ്ടാക്കുന്നവർക്കെതിരെ കടുത്ത നടപടി വേണമെന്നാണ് ശുപാർശ. ആൾക്കൂട്ട ആക്രമണത്തിന് ഇരയാവുന്നവരെയും കുടുംബങ്ങളെയും സാക്ഷികളെയും അവരെ സഹായിക്കുന്നവരെയും ഭീഷണിപ്പെടുത്തുന്നതും അവർക്കെതിരെ ബലം പ്രയോഗിക്കുന്നതും ഇതോടെ കുറ്റകരമാവുന്നു. ആക്രമണങ്ങളിൽ കൊല്ലപ്പെടുന്നവരുടെ കുടുംബത്തിന് സാമ്പത്തിക സഹായം നൽകാനും പരുക്കേൽക്കുന്നവർക്ക് സൗജന്യ ചികിൽസ നൽകാനും ബിൽ ശുപാർശ ചെയ്യുന്നുണ്ട്.

പുതിയ നിയമം നടപ്പാക്കാൻ ഐ.ജി റാങ്കിൽ കുറയാത്ത ഉദ്യോഗസ്ഥരെ നോഡൽ ഓഫീസറാക്കി നിയമിക്കണമെന്നാണ് ബിൽ പറയുന്നത്. ഓരോ മാസവും രഹസ്യാന്വേഷണ ഉദ്യോഗസ്ഥരുമായി കൂടിക്കാഴ്ച്ച നടത്തൽ, സോഷ്യൽ മീഡിയയിലെ അക്രമത്തിന് പ്രേരിപ്പിക്കുന്ന പോസ്റ്റുകൾ കണ്ടെത്തൽ, പോസ്റ്റുകളുടെ ഉടമകൾക്കെതിരെ നടപടി സ്വീകരിക്കൽ എന്നിവയും നോഡൽ ഓഫീസറുടെ കടമയാണ്. നിയമം നടപ്പാക്കാൻ എല്ലാ പൊലീസ് ഉദ്യോഗസ്ഥർക്കും ബാധ്യതയുണ്ടെന്നും ബിൽ പറയുന്നു. അധികാരപരിധിയിൽ ‘ശത്രുതാപരമായ അന്തരീക്ഷം’ ഉണ്ടാവാതിരിക്കാൻ വേണ്ട നടപടികൾ സ്വീകരിക്കാൻ ജില്ലാ മജിസേ്ട്ര്റ്റുമാർക്കും ഉത്തരവാദിത്തമുണ്ട്.

ബി.ജെ.പിയുടെ എതിർപ്പ്

ജാർഖണ്ഡ് പാർലമെന്ററി കാര്യമന്ത്രി ബിൽ നിയമസഭയിൽ അവതരിപ്പിച്ചപ്പോൾ തന്നെ ബി.ജെ.പി അംഗങ്ങൾ കടുത്ത വിമർശനമാണ് ഉയർത്തിയത്. ബി.ജെ.പി അംഗങ്ങൾ പത്ത് ഭേദഗതി കൊണ്ടുവന്നെങ്കിലും ഒരെണ്ണം മാത്രമാണ് സർക്കാർ അംഗീകരിച്ചത്. ബാക്കിയെല്ലാം തള്ളിക്കളഞ്ഞു.

‘ദുർബല’ വിഭാഗങ്ങളുടെ ഭരണഘടനാപരമായ അവകാശങ്ങൾ സംരക്ഷിക്കാനാണ് ബിൽ എന്നാണ് ആദ്യം രേഖപ്പെടുത്തിയിരുന്നത്. ബി.ജെ.പി എം.എൽ.എ അമിത്കുമാറിന്റെ ആവശ്യം പരിഗണിച്ച് ഇത് ‘സാധാരണ പൗരൻമാരുടെ’ എന്ന് മാറ്റി. ജാർഖണ്ഡ് സർക്കാരിന്റെ പ്രീണന നയത്തിന്റെ ഭാഗമായാണ് ബിൽ ധൃതിയിൽ അവതരിപ്പിച്ചതെന്ന് ബി.ജെ.പി എം.എൽ.എ അമർ ബൗരി ആരോപിച്ചു.

”ഗ്രാമങ്ങളിലെ പല പ്രശ്‌നങ്ങളും ഊരുകൂട്ടങ്ങളിൽ ചർച്ച ചെയ്താണ് ആദിവാസികൾ പരിഹരിക്കാറ്. നാളെ ആദിവാസി ഊരുകളിൽ എന്തെങ്കിലും തർക്കങ്ങളുണ്ടായാൽ ഈ നിയമം അവരെ വേട്ടയാടും. അതിനാൽ ബിൽ ജാർഖണ്ഡ് വിരുദ്ധമാണ്”–അമർ ബൗരി ആരോപിച്ചു. ന്യൂനപക്ഷങ്ങളെ പ്രീണിപ്പിക്കാനാണ് സർക്കാർ ബിൽകൊണ്ടുവന്നതെന്നാണ് ബി.ജെ.പി നേതാവായ സി.പി സിങും ആരോപിച്ചു.

ഒരു പ്രത്യേക സമുദായത്തെ പ്രീണിപ്പിക്കാനാണ് സർക്കാർ ബിൽ കൊണ്ടുവന്നതെന്ന് ബി.ജെ.പി സംസ്ഥാന പ്രസിഡന്റും രാജ്യസഭാ എം.പിയുമായ ദീപക് പ്രകാശ് വാർത്താ ഏജൻസിയായ എ.എൻ.ഐയോട് പറഞ്ഞു. ”ഹേമന്ദ് സോറൻ സർക്കാർ അധികാരത്തിൽ വന്ന ശേഷം ഒരു പ്രത്യേക വിഭാഗത്തെയും വർഗത്തെയും പ്രീണിപ്പിക്കുകയാണ്. ബില്ലിലെ നിരവധി വ്യവസ്ഥകൾ ജനവിരുദ്ധമാണ്. സംസ്ഥാനത്തെ മതസൗഹാർദ്ദത്തെ പ്രതികൂലമായി ബാധിക്കുന്ന നടപടിയാണ് സർക്കാരിന്റെ ഭാഗത്ത് നിന്നുണ്ടായിരിക്കുന്നത്. ജനങ്ങൾ ഇതെല്ലാം കാണുന്നു. ഉചിതമായ സമയത്ത് അവർ തിരിച്ചടി നൽകും.”–ദീപക് പ്രകാശ് പറഞ്ഞു.

അൻസാരിയുടെ കൊലപാതകും ബില്ലും

ആൾക്കൂട്ട ആക്രമണങ്ങളും കൊലപാതകങ്ങളും തടയാനുള്ള നിയമങ്ങൾ പശ്ചിമബംഗാളും രാജസ്ഥാനും മണിപ്പൂരും നേരത്തെ പാസാക്കിയിരുന്നു. ജാർഖണ്ഡ് ബി.ജെ.പി ഭരിച്ചിരുന്ന 2014-19 കാലത്ത് 12ഓളം പേരാണ് ആൾക്കൂട്ട ആക്രമണങ്ങളിൽ കൊല്ലപ്പെട്ടത്. തബ്‌റാസ് അൻസാരി എന്ന മുസ്ലീം യുവാവിനെ ആൾക്കൂട്ടം കെട്ടിയിട്ട് ആക്രമിച്ച സംഭവം 2019ൽ ഏറെ ചർച്ച ചെയ്യപ്പെട്ടിരുന്നു. അൻസാരിയോട് ‘ജയ് ശ്രീരാം’ എന്നു പറയാൻ ആവശ്യപ്പെട്ടാണ് ആൾക്കൂട്ടം ആക്രമിച്ചത്. ആക്രമണത്തിന്റെ വീഡിയോ അക്രമികൾ തന്നെ പ്രചരിപ്പിക്കുകയും ചെയ്തു.

പൊലീസ് എത്തി രക്ഷിച്ചെങ്കിലും അഞ്ച് ദിവസത്തിന് ശേഷം അൻസാരി മരിച്ചു. ഇതേ തുടർന്നാണ് ആൾക്കൂട്ട ആക്രമണങ്ങൾ തടയാൻ വേണ്ട നിയമം കൊണ്ടുവരുമെന്ന് നിയമസഭാ തിരഞ്ഞെടുപ്പിന് മുമ്പ് ഹേമന്ദ് സോറൻ പ്രഖ്യാപിച്ചത്. ദുർമന്ത്രവാദം ആരോപിച്ച് ജാർഖണ്ഡിലെ ആദിവാസി ഊരുകളിൽ നടക്കുന്ന ആൾക്കൂട്ട അക്രമങ്ങൾ തടയലും നിയമത്തിന്റെ ലക്ഷ്യമാണ്.

ഹേമന്ദ് സോറൻ മുഖ്യമന്ത്രിയായി രണ്ടു വർഷമായിട്ടും ബിൽ കൊണ്ടുവരാത്തതിൽ പ്രതിഷേധിച്ച് അൻസാരിയുടെ ഭാര്യ സെപ്റ്റംബറിൽ രാജ്ഭവനു മുന്നിൽ ധർണ്ണ നടത്തിയിരുന്നു. ഇതാണ് സർക്കാരിനെ പെട്ടെന്ന് നടപടിക്ക് പ്രേരിപ്പിച്ചത്. അൻസാരിയെ മർദ്ദിച്ചു കൊന്ന കേസിലെ 13 പ്രതികളിൽ ഭൂരിഭാഗത്തിനും ജാമ്യം ലഭിച്ചിരുന്നു. മനപൂർവ്വമല്ലാത്ത നരഹത്യ എന്ന വകുപ്പിൽ പൊലീസ് ഊന്നിയതാണ് പ്രതികൾക്ക് ജാമ്യം ലഭിക്കാൻ കാരണം. പുതിയ നിയമം വരുന്നതോടെ പ്രതികൾക്ക് ഇത്തരത്തിൽ രക്ഷപ്പെടാനാവില്ല.

****

Source: Agencies | Compiled by Aneeb P.A