സൊട്രോവിമാബുമായി ആദ്യ വിമാനമെത്തി
ഹെല്‍ത്ത് കെയര്‍ മേഖലയിലെ ലോകത്തിലെ മുന്‍നിര കമ്പനിയായ ജിഎസ്‌കെ (ഗ്ലാക്‌സോ സ്മിത്ത് ക്ലൈന്‍) വികസിപ്പിച്ചെടുത്ത സൊട്രോവിമാബ് മരുന്ന് ലഭ്യമാക്കുന്നതിന് അബൂദാബിയിലെ പര്‍ച്ചേസിംഗ് ഏജന്‍സിയായ റാഫിദ് കമ്പനിയുമായി കരാറില്‍ ഒപ്പ് വച്ചതിന്റെ അടിസ്ഥാനത്തിലാണ് മരുന്നിന്റെ ആദ്യ ബാച്ച് അബൂദാബിയിലെത്തിയത്. ഇന്നലെയാണ് മരുന്നിന്റെ ആദ്യ ഷിപ്‌മെന്റുമായി ഇത്തിഹാദ് എയര്‍ലൈന്‍സ് വിമനം അബൂദാബി വിമാനത്താവളത്തില്‍ എത്തിയത്. ഇതോടെ കൊവിഡ് ചികില്‍സയില്‍ നിര്‍ണായക വഴിത്തിരിവായേക്കാവുന്ന മരുന്ന് വിതരണത്തിനായി എത്തുന്ന ആദ്യ നഗരമായി അബൂദാബി മാറിയതായി അബൂദാബി ആരോഗ്യ വകുപ്പ് അണ്ടര്‍ സെക്രട്ടറി ഡോ. ജമാല്‍ മുഹമ്മദ് കഅബി പറഞ്ഞു. യുഎഇയുടെ കൊവിഡ് വിരുദ്ധ പോരാട്ടത്തില്‍ പുതിയൊരു അധ്യായം കൂടി ഇതോടെ കൂട്ടിച്ചേര്‍ക്കപ്പെട്ടിരിക്കുയാണെന്നും അദ്ദേഹം അഭിപ്രായപ്പെട്ടു.
കൊവിഡ് ചികില്‍സയില്‍ നിര്‍ണായകമാവും
കൊവിഡ് ബാധ ഗുരുതരമായ ആരോഗ്യ പ്രശ്നങ്ങള്‍ സൃഷ്ടിക്കാനിടയുള്ള രോഗികളില്‍ വൈറസ് ബാധയുടെ തുടക്കത്തില്‍ തന്നെ ഈ മരുന്ന് നല്‍കിയാല്‍ മികച്ച ഫലം പ്രതീക്ഷിക്കാമെന്നാണ് കമ്പനിയുടെ അവകാശവാദം. ഈ മരുന്ന് കഴിക്കുന്നതിലൂടെ 24 മണിക്കൂറിനുള്ളില്‍ രോഗികള്‍ക്ക് ആശുപത്രി വിടാന്‍ സാധിക്കും. കൊവിഡ് മൂലമുള്ള മരണവും ഐസിയു വാസവും കുറയ്ക്കുന്ന കാര്യത്തില്‍ ഈ പുതിയ ചികില്‍സാ രീതി 85 ശതമാനം ഫലപ്രദമാണെന്ന് പരിശോധനകളില്‍ കണ്ടെത്തിയിരുന്നു. പാര്‍ശ്വ ഫലങ്ങളൊന്നും ഉണ്ടാക്കാത്ത ഈ മരുന്ന് 12 വയസ്സിന് മുകളിലുള്ളവര്‍ക്കാണ് നല്‍കുന്നത്. നേരിയതോ ഇടത്തരമോ ആയ കൊവിഡ് രോഗ ലക്ഷണങ്ങള്‍ പ്രകടിപ്പിക്കുന്നവരും മറ്റ് ഗുരുതര ആരോഗ്യ പ്രശ്നങ്ങള്‍ കാരണം രോഗം മൂര്‍ഛിക്കാന്‍ ഇടയുള്ളവരുമായ ആളുകള്‍ക്കാണ് ഈ മരുന്ന് നല്‍കുക.
പുതിയ കൊവിഡ് വകഭേദങ്ങളെയും ചെറുക്കും
ശ്വേതരക്താണുക്കള്‍ ക്ലോണ്‍ ചെയ്ത് നിര്‍മിക്കുന്ന മോണോക്ലോണല്‍ ആന്റി ബോഡിയാണ് സൊട്രോവിമാബ്. ഇത് കോവിഡിന്റെ ഇന്ത്യയില്‍ കാണപ്പെട്ട ഡെല്‍റ്റ വൈറസ് ഉള്‍പ്പെടെ ഇന്ന് നിലവിലുള്ള എല്ലാ വകഭേദങ്ങളെയും ചെറുക്കാന്‍ പ്രാപ്തമാണെന്ന് ക്ലിനിക്കല്‍ ട്രയലുകളില്‍ കണ്ടെത്തിയതായി അധികൃതര്‍ പറഞ്ഞു. കൊവിഡിനെതിരായ പ്രതിരോധത്തില്‍ അബൂദാബി ഭരണാധികാരികള്‍ കാണിക്കുന്ന താല്‍പര്യവും ദീര്‍ഘവീക്ഷണവും ഇക്കാര്യത്തില്‍ നാടിനെ ലോകത്തിന്റെ മുന്‍നിരയിലെത്തിച്ചതായി ഡോ. കഅബി പറഞ്ഞു. മരുന്ന് ആര്‍ക്കൊക്കെ നല്‍കണമെന്ന കാര്യത്തില്‍ കൃത്യമായ ഗൈഡ്‌ലൈന്‍ തയ്യാറായി വരികയാണെന്നും അദ്ദേഹം പറഞ്ഞു. യുഎഇയിലെ പ്രധാന മരുന്ന് വിതരണ കമ്പനിയായ റാഫിദിനാണ് സൊട്രോവിമാബ് സംഭരിക്കാനും വിതരണം ചെയ്യാനുമുള്ള അവകാശം നല്‍കിയിരിക്കുന്നത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : abu dhabi became the first in the world to receive antiviral treatment drug for covid-19
Malayalam News from malayalam.samayam.com, TIL Network
