Sumayya P | Samayam Malayalam | Updated: Dec 30, 2021, 8:24 AM
മൂക്കും വായയും അടക്കം മറയുന്ന തരത്തില്‍ മാസ്‌ക് ധരിക്കാത്തവരില്‍ നിന്ന് 1000 റിയാല്‍ പിഴയീടാക്കുമെന്നും അധികൃതര്‍ അറിയിച്ചു.
മാസ്‌ക്ക് ധരിച്ചില്ലെങ്കില്‍ 1000 റിയാല്‍ പിഴ
രാജ്യത്ത് കൊവിഡ് വ്യാപനം വര്‍ധിച്ചു വരുന്ന സാഹചര്യത്തിലാണ് നേരത്തേ നിര്‍ത്തലാക്കിയ നിയന്ത്രണങ്ങള്‍ ചിലത് വീണ്ടും തിരികെ കൊണ്ടുവരുന്നതെന്ന് ആഭ്യന്തര മന്ത്രാലയം അറിയിച്ചു. ഇതിന്റെ അടിസ്ഥാനത്തില്‍ തുറസ്സായ പ്രദേശങ്ങളിലും അടച്ചിട്ട സ്ഥലങ്ങളിലും മാസ്‌ക്ക് ധരിക്കല്‍ നിര്‍ബന്ധമാക്കിയിട്ടുണ്ട്. മൂക്കും വായയും അടക്കം മറയുന്ന തരത്തില്‍ മാസ്‌ക് ധരിക്കാത്തവരില്‍ നിന്ന് 1000 റിയാല്‍ പിഴയീടാക്കുമെന്നും അധികൃതര്‍ അറിയിച്ചു. നിയമം കര്‍ശനമായി നടപ്പില്‍ വരുത്തുന്നതിന്റെ ഭാഗമായി പൊതു ഇടങ്ങളിലും വ്യാപാര സ്ഥാപനങ്ങളിലും പരിശോധന നടത്തുമെന്നും ആഭ്യന്തര മന്ത്രാലയം വ്യക്തമാക്കി.
വ്യാപാര സ്ഥാപനങ്ങളില്‍ സാമൂഹിക അകലം വേണം
വ്യാപാര സ്ഥാപനങ്ങളിലും മാളുകളിലും ഉള്‍പ്പെടെ ആളുകള്‍ ഒരുമിച്ചു കൂടുന്ന പ്രദേശങ്ങളില്‍ മാസ്‌ക്ക് ധാരണത്തിന് പുറമെ, ഒന്നര മീറ്റര്‍ അകലം പാലിക്കലും നിര്‍ബന്ധമാക്കി. ഇതും വെള്ളിയാഴ്ച രാവിലെ ഏഴു മണി മുതലാണ് നിലവില്‍ വരുന്നത്. വാഹനങ്ങളിലും ഇവ ധരിച്ചിരിക്കണം. സ്ഥാപനങ്ങളില്‍ എത്തുന്ന ഉപഭോക്താക്കള്‍ മാസ്‌ക് ധരിക്കുന്നുണ്ടെന്ന് ഉറപ്പു വരുത്തേണ്ടത് സ്ഥാപന ഉടമകളണ്. കടകളില്‍ കയറുമ്പോള്‍ ക്യു ആര്‍ കോഡ് സ്‌കാന്‍ ചെയ്യല്‍ നിര്‍ബന്ധമാക്കിയിട്ടുണ്ട്. ഇമ്മ്യൂണിറ്റി സ്റ്റാറ്റസ് ഉറപ്പുവരുത്തി മാത്രമേ ആളുകളെ പ്രവേശിപ്പിക്കാവൂ. ആളുകള്‍ തമ്മില്‍ ഒന്നര മീറ്റര്‍ അകലം പാലിക്കാവുന്ന രീതിയില്‍ മാത്രമേ ആളുകളെ അകത്തേക്ക് പ്രവേശിപ്പിക്കാവൂ. നിയമങ്ങള്‍ ലംഘിക്കുന്ന സ്ഥാപനങ്ങള്‍ക്കെതിരേ 10,000 റിയാലാണ് പിഴ ചമുത്തുകയെന്നും അധികൃതര്‍ മുന്നറിയിപ്പ് നല്‍കി.
തിയറ്ററില്‍ ശേഷിയുടെ പകുതി ആളുകള്‍ മാത്രം
പുതിയ നിയന്ത്രണങ്ങളുടെ പശ്ചാത്തലത്തില്‍ സിനിമാ തിയറ്ററുകളില്‍ ശേഷിയുടെ 50 ശതമാനം പേരെ മാത്രമേ പ്രവേശിപ്പിക്കാവൂ. ആളുകള്‍ക്കിടയില്‍ ഒരു സീറ്റ് ഒഴിച്ചിട്ട് സാമൂഹിക അകലം പാലിക്കുന്നതിന് വേണ്ടിയാണിത്. എന്നാല്‍ ഒരു കുടുംബത്തിലെ അംഗങ്ങളാണെങ്കില്‍ അഞ്ചു പേര്‍ക്ക് വരെ ഒന്നിച്ചിരിക്കാം. അവര്‍ ഇരുന്നതിന് ശേഷമുള്ള സീറ്റ് ഒഴിച്ചിട്ടാല്‍ മതി. ആരാധനാലയങ്ങളിലും മാസ്‌കും ശാരീരിക അകലവും ഉറപ്പ് വരുത്തണം. പ്രാര്‍ഥനയ്ക്കായി വരി നില്‍ക്കുമ്പോഴും കൃത്യമായ അകലം പാലിക്കണം. സ്‌പോര്‍ട്‌സ് പരിപാടികള്‍ക്കും കൊവിഡ് നിയന്ത്രണങ്ങള്‍ ബാധകമായിരിക്കുമെന്നും അധികൃതര്‍ അറിയിച്ചു.
മക്ക, മദീന പള്ളികളിലും നിയന്ത്രണങ്ങള്‍ ബാധകം
അതിനിടെ, മുസ്ലിംകളുടെ തീര്‍ഥാടന കേന്ദ്രങ്ങളായി മക്കയിലെയും മദീനയിലെയും പുണ്യ ഗേഹങ്ങളില്‍ കൂടുതല്‍ കൊവിഡ് നിയന്ത്രണങ്ങള്‍ ഏര്‍പ്പെടുത്തിയതായും അധികൃതര്‍ അറിയിച്ചു. ഉംറ തീര്‍ഥാടനത്തിനായി എത്തുന്നവരും പള്ളികളില്‍ പ്രാര്‍ത്ഥനക്കെത്തുന്നവരും മാസ്‌ക്ക് ധരിക്കുകയും സാമൂഹിക അകലം പാലിക്കുകയും ചെയ്യണം. നിയന്ത്രണങ്ങള്‍ വ്യാഴാഴ്ച രാവിലെ ഏഴ് മണി മുതല്‍ പ്രാബല്യത്തില്‍ വരുമെന്നും അധികൃതര്‍ അറിയിച്ചു. നമസ്‌ക്കരിക്കാനുള്ള പടം വിരിക്കുമ്പോഴും വിശുദ്ധ കഅബ പ്രദക്ഷിണം ചെയ്യുമ്പോഴും സാമൂഹിക അകലം പാലിക്കാന്‍ ശ്രദ്ധിക്കണം. മറ്റു കര്‍മങ്ങള്‍ ചെയ്യുമ്പോഴും കൊവിഡ് നിയന്ത്രണങ്ങള്‍ പാലിക്കണം. മക്കയിലും മദീനയിലും എത്തുന്നവര്‍ തവക്കല്‍നാ, ഇഅ്തമര്‍നാ ആപ്പുകളില്‍ പെര്‍മിറ്റില്‍ നല്‍കിയിട്ടുള്ള സമയക്രമം കൃത്യമായി പാലിക്കണമെന്നും അധികൃതര്‍ അറിയിച്ചു. തിരക്ക് ഒഴിവാക്കുന്നതിന് വേണ്ടിയാണിത്. ഹറമുകളിലെ നിയന്ത്രണം ജീവനക്കാര്‍ക്കും ബാധകമാണെന്നും അധികൃതര്‍ വ്യക്തമാക്കി. അതിനിടെ, ഇരു ഹറമുകളിലും സാനിസൈറ്റേഷന്‍ അടക്കമുള്ള പ്രതിരോധ പ്രവര്‍ത്തനങ്ങള്‍ കൂടുതല്‍ കാര്യക്ഷമമാക്കാനും അധികൃതര്‍ നിര്‍ദ്ദേശം നല്‍കിയിട്ടുണ്ട്.
പ്രതിദിന കേസുകള്‍ 700 കടന്നു
അതിനിടെ, രാജ്യത്തെ പ്രതിദിന കൊവിഡ് കേസുകള്‍ വര്‍ധിച്ചുവരുന്നതായി ആരോഗ്യ മന്ത്രാലയം അറിയിച്ചു. ഓരോ ദിവസവും അമ്പതോളം കേസുകളാണ് വര്‍ധിക്കുന്നത്. ഇന്നലെ ബുധനാഴ്ച മാസങ്ങള്‍ക്കു ശേഷം കേസുകളുടെ എണ്ണം 700 കടന്നു. 744 പുതിയ കേസുകളാണ് ബുധനാഴ്ച റിപ്പോര്‍ട്ട് ചെയ്തത്. കഴിഞ്ഞ ദിവസം ഒരാള്‍ കൂടി കോവിഡ് ബാധിച്ച് മരിച്ചതായും ആരോഗ്യ മന്ത്രാലയം അറിയിച്ചു. ഇതോടെ രാജ്യത്ത് കൊവിഡ് ബാധിച്ചവരുടെ എണ്ണം 554,665 ആയി ഉയര്‍ന്നു. മരണ സംഖ്യ 8,874 ആയി. കൊവിഡ് ബാധിച്ച് ചികിത്സയില്‍ കഴിയുന്ന അമ്പതോളം പേരുടെ നില ഗുരുതരമാണെന്നും അധികൃതര്‍ അറിയിച്ചു. പ്രതിരോധം ശക്തിപ്പെടുത്തുന്നതിന്റെ ഭാഗമായി ബൂസ്റ്റര്‍ ഡോസ് എടുക്കാന്‍ അര്‍ഹതയുള്ള മുഴുവന്‍ പേരും ഉടന്‍ തന്നെ കുത്തിവയ്‌പ്പെടുക്കണമെന്നും ആരോഗ്യ മന്ത്രാലയം നിര്‍ദ്ദേശിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : saudi arabia has reintroduced mandatory wearing of face masks and maintaining social distancing
Malayalam News from Samayam Malayalam, TIL Network
