ട്വിറ്ററിന് എന്താ കൊമ്പുണ്ടോ? നരേന്ദ്ര മോദി സര്‍ക്കാര്‍ പറയാതെ പറയുന്നത് ഈ ചോദ്യമാണ്. അഭിപ്രായ സ്വാതന്ത്ര്യവും പ്രാദേശിക നിയമങ്ങളും ഒരു ആഗോള സോഷ്യല്‍ മീഡിയ കമ്പനി എങ്ങനെയാണ് ഒരുപോലെ അഭിമുഖീകരിക്കുക?
ട്വിറ്റർ ലോഗോ. Photo: AP
2020 ഡിസംബറില്‍ ആണ് കേന്ദ്ര സര്‍ക്കാര്‍ ഐ.ടി നിയമത്തില്‍ മാറ്റം കൊണ്ടുവന്നത്. ട്വിറ്റര്‍ ഉള്‍പ്പെടെയുള്ള സോഷ്യല്‍ മീഡിയ കമ്പനികളെ മാധ്യമം (Intermediary) എന്നാണ് നിയമം വിവക്ഷിക്കുന്നത്. അതായത് ഈ പ്ലാറ്റ്‍ഫോമുകളില്‍ ആളുകള്‍ പോസ്റ്റ് ചെയ്യുന്ന ഉള്ളടക്കത്തില്‍ കമ്പനികള്‍ ഉത്തരവാദിത്തം പറയേണ്ടതില്ല.
പക്ഷേ, ഉള്ളടക്കങ്ങളില്‍ ഉണ്ടാകുന്ന പരാതികള്‍ കൈകാര്യം ചെയ്യാന്‍ മൂന്ന് തലങ്ങളിലായി ഉദ്യോഗസ്ഥരെ സോഷ്യല്‍ മീഡിയ കമ്പനികള്‍ നിയമിക്കണം. ഈ സംവിധാനം 24 മണിക്കൂറിനുള്ളില്‍ പരാതികള്‍ സ്വീകരിക്കുകയും 15 ദിവസത്തിനുള്ളില്‍ പരിഹാരം കണ്ടെത്തുകയും വേണം.
ഫേസ്ബുക്ക്, യൂട്യൂബ്, വാട്ട്‍സാപ്പ് തുടങ്ങിയ യു.എസ് സോഷ്യല്‍ മീഡിയ കമ്പനികള്‍ ഈ നിയമങ്ങള്‍ പാലിച്ചു. പക്ഷേ, ട്വിറ്റര്‍ മെല്ലെപ്പോക്ക് തുടര്‍ന്നു. 2021 മെയ് മാസം അവസാനമായി ട്വിറ്ററിന് നിയമങ്ങള്‍ക്ക് വഴങ്ങാന്‍ കേന്ദ്ര സര്‍ക്കാര്‍ നിര്‍ദേശം നല്‍കി. ഇതും ട്വിറ്റര്‍ തള്ളിയതോടെ കമ്പനിയുടെ പരിരക്ഷ ഒഴിവാക്കിയെന്ന് സര്‍ക്കാര്‍ അറിയിച്ചു.
—
ട്വിറ്റര്‍ ഉപയോക്താക്കളില്‍ ലോകത്ത് മൂന്നാമതാണ് ഇന്ത്യ. 1.75 കോടി ആളുകളാണ് സോഷ്യല്‍ മീഡിയ പ്ലാറ്റ്‍ഫോം ഉപയോഗിക്കുന്നത്. അതിനെക്കാള്‍ ഉപരി ലോകത്തിലെ ഏറ്റവും സ്വാധീനമുള്ള രാഷ്ട്രീയ, നയതന്ത്ര ടൂൾ കൂടെയാണ് ട്വിറ്റര്‍. ട്വിറ്റര്‍ ഉള്‍പ്പെടെയുള്ള വമ്പന്‍ യു.എസ് ടെക് കമ്പനികള്‍ സ്വന്തമായി ഒരു രാജ്യമാണെന്ന് കരുതിയാല്‍ പോലും തെറ്റില്ല. ഇതേ കാരണങ്ങള്‍ തന്നെയാണ് ഇന്ത്യയിലെ ഭരണകൂടത്തെയും നടപടി എടുക്കാന്‍ പ്രേരിപ്പിക്കുന്നത്.
ആദ്യമായല്ല ട്വിറ്റര്‍, ബി.ജെ.പി സര്‍ക്കാരുമായി ഏറ്റുമുട്ടുന്നത്. വര്‍ഷങ്ങളായി ട്വിറ്ററിലെ ഉള്ളടക്കങ്ങള്‍ നിയന്ത്രിക്കുന്നതില്‍ ലോകം മുഴുവന്‍ സര്‍ക്കാരുകളുടെ സമ്മര്‍ദ്ദം ട്വിറ്റര്‍ നേരിടുന്നുണ്ട്. ട്വിറ്ററും കേന്ദ്ര സര്‍ക്കാരും തമ്മിലുള്ള പോരിന്‍റെ മുൻ ഉദാഹരണങ്ങള്‍ ചുവടെ.
—
സമ്പിത് പത്ര ടൂൾകിറ്റ്
നരേന്ദ്ര മോദി സര്‍ക്കാരും ട്വിറ്ററും തമ്മിലുള്ള പോര് രൂക്ഷമാകുന്നതിന് പ്രധാനപ്പെട്ട കാരണം വിവാദമായ ടൂൾകിറ്റ് കേസ് ആണ്. നരേന്ദ്ര മോദി സര്‍ക്കാരിന്‍റെയും ഇന്ത്യയുടെയും സല്‍പ്പേര് കളങ്കപ്പെടുത്താന്‍ കോൺഗ്രസ് ടൂൾകിറ്റ് ഉണ്ടാക്കിയെന്ന് ആണ് ബി.ജെ.പി ആരോപണം.
മെയ് 18ന് ബി.ജെ.പി വക്താവ് സമ്പിത് പത്ര, ട്വിറ്ററില്‍ ഈ ടൂൾകിറ്റിന്‍റെ സ്ക്രീൻഷോട്ട് ഷെയര്‍ ചെയ്തു. പിന്നാലെ ബി.ജെ.പി നേതാക്കള്‍ കൂട്ടമായി ഈ ആരോപണം ആവര്‍ത്തിച്ചു. രേഖകള്‍ വ്യാജമാണെന്ന് കോൺഗ്രസും പ്രതികരിച്ചു.
ഇതിന് പിന്നാലെ സമ്പിത് പത്രയുടെ ട്വീറ്റ്, കൃത്രിമമായ ഉള്ളടക്കം (manipulated media) എന്ന് ട്വിറ്റര്‍ രേഖപ്പെടുത്തി. വിശ്വാസ്യതയില്ലാത്ത, കൃത്രിമമാണെന്ന് തെളിഞ്ഞ ഫോട്ടോകള്‍, വീഡിയോകള്‍ എന്നിവയ്‍ക്ക് ട്വിറ്റര്‍ നല്‍കുന്ന പൊതു മുന്നറിയിപ്പാണ് മാനിപുലേറ്റഡ് മീഡിയ എന്ന രേഖപ്പെടുത്തല്‍.
യു.എസ് പ്രസിഡന്‍റ് ഡോണള്‍ഡ് ട്രംപിന്‍റെ ചില ട്വീറ്റുകള്‍ സമാനമായി ട്വിറ്റര്‍ കൃത്രിമമാണെന്ന് രേഖപ്പെടുത്തിയിരുന്നു. തെറ്റ് വീണ്ടും ആവര്‍ത്തിച്ചതോടെ ട്രംപിനെ ആജീവനാന്തം വിലക്കുകയും ചെയ്തു.
ബി.ജെ.പി ദേശീയ വക്താവായ സമ്പിത് പത്രയ്ക്ക് മുന്നറിയിപ്പ് നല്‍കിയതോടെ ബി.ജെ.പി സര്‍ക്കാര്‍ പ്രതിരോധത്തിലായി. എന്തുകൊണ്ടാണ് ട്വീറ്റ് കൃത്രിമമാണെന്ന് രേഖപ്പെടുത്തിയത് എന്ന് വിശദീകരിക്കാനും പിന്നീട് ഈ രേഖപ്പെടുത്തല്‍ ഒഴിവാക്കാനും കേന്ദ്ര സര്‍ക്കാര്‍ ട്വിറ്ററിനോട് ആവശ്യപ്പെട്ടു.
പുതിയ ഐ.ടി നിയമഭേദഗതി ട്വിറ്റര്‍ അംഗീകരിക്കാന്‍ വൈകിയതോടെ കേന്ദ്ര ഐ.ടി വകുപ്പ് മന്ത്രി നടത്തിയ പ്രതികരണത്തില്‍ ഈ പോര് വ്യക്തവുമായിരുന്നു “…കൃത്രിമമായ മീഡിയ എന്ന് രേഖപ്പെടുത്തുന്നത് സ്വന്തം അവരുടെ ഇഷ്‍ടത്തിന് മാത്രമായി മാറ്റി”- കേന്ദ്ര മന്ത്രി രവിശങ്കര്‍ പ്രസാദ് ട്വീറ്റ് ചെയ്തു.
കേന്ദ്ര സര്‍ക്കാര്‍ നിര്‍ബന്ധങ്ങള്‍ കൂടുന്നു
കഴിഞ്ഞ ഏതാനും വര്‍ഷങ്ങളായി കേന്ദ്രസര്‍ക്കാര്‍ നടപടി ആവശ്യപ്പെടുന്ന ട്വിറ്റര്‍ അക്കൗണ്ടുകളുടെ എണ്ണം കൂടുകയാണെന്നാണ് ട്വിറ്റര്‍ കണക്കുകള്‍ വ്യക്തമാക്കുന്നത്. ഇത് ഇന്ത്യയില്‍ മാത്രം ഒതുങ്ങുന്നതല്ല. വിവിധ രാജ്യങ്ങള്‍ പ്രാദേശിക നിയമങ്ങളിലൂടെ എതിരാളികളെയും അഭിപ്രായ പ്രകടന സ്വാതന്ത്ര്യത്തെയും തടസ്സപ്പെടുത്തുന്നുണ്ടെന്നാണ് ട്വിറ്റര്‍ വിലയിരുത്തുന്നത്.
2020 ജനുവരി മുതല്‍ ജൂൺ വരെയുള്ള കണക്കുകള്‍ അനുസരിച്ച് വിവരം ആവശ്യപ്പെട്ടുള്ള 2613 അപേക്ഷകളാണ് ട്വിറ്ററിന് ലഭിച്ചത്. 2012 മുതല്‍ 2020 വരെ ആകെ ലഭിച്ച അപേക്ഷകള്‍ 5877 ആണ്. ഇതില്‍ പകുതിയിലധികും 2020ൽ മാത്രമാണ് ലഭിച്ചതെന്ന് ചുരുക്കം.
2017ല്‍ കശ്‍മീരില്‍ സംഘര്‍ഷം രൂക്ഷമായപ്പോള്‍ 248 അക്കൗണ്ടുകള്‍ റദ്ദ് ചെയ്യണം എന്ന് കേന്ദ്ര സര്‍ക്കാര്‍ ട്വിറ്ററിനോട് ആവശ്യപ്പെട്ടു. ഇതില്‍ മാധ്യമ പ്രവര്‍ത്തകരുടെത് ഉള്‍പ്പെടെയുള്ള അക്കൗണ്ടുകള്‍ ഉണ്ടായിരുന്നു. അക്കൗണ്ടുകള്‍ ട്വിറ്റര്‍ മരവിപ്പിച്ചതിനെ തുടര്‍ന്ന് ഐക്യരാഷ്ട്ര സംഘടന വക്താവ് ട്വിറ്ററിനോട് വിശദീകരണം ചോദിച്ചിരുന്നു.
കേന്ദ്ര സര്‍ക്കാരിന് എതിരെ കാര്‍ഷിക സമരം ശക്തമായപ്പോള്‍ സമാനമായ രീതിയില്‍ അക്കൗണ്ടുകള്‍ മരവിപ്പിക്കാന്‍ ട്വിറ്റര്‍ തുനിഞ്ഞു. കര്‍ഷകരുടെ സംഘടന, കിസാൻ ഏകത മോര്‍ച്ച, ഇന്ത്യയിലെ പ്രശസ്‍ത ഇംഗ്ലീഷ് മാസിക, ദ് കാരവൻ എന്നിവരുടെ ഉള്‍പ്പെടെ 200 അക്കൗണ്ടുകളാണ് ട്വിറ്റര്‍ തടഞ്ഞുവെച്ചത്.
ജാക്ക് ഡോര്സി എവിടെ?
2019ല്‍ ട്വിറ്റര്‍ സ്ഥാപകന്‍ ജാക്ക് ഡോര്സി ഇന്ത്യയിലെ പാര്‍ലമെന്‍ററി സമിതിക്ക് മുന്നില്‍ ഹാജരാകണം എന്ന് കേന്ദ്ര സര്‍ക്കാര്‍ ആവശ്യപ്പെട്ടു. ബി.ജെ.പി വിരുദ്ധ ഉള്ളടക്കങ്ങളെ ട്വിറ്റര്‍ പ്രോത്സാഹിപ്പിക്കുന്നതായും വലതുപക്ഷ അഭിപ്രായങ്ങളെ സെൻസര്‍ ചെയ്യുന്നതായും ആരോപണങ്ങള്‍ ശക്തമായതിന് ശേഷമാണ് ഡോര്സി ഹാജരാകണം എന്ന് സമിതി ആവശ്യപ്പെട്ടത്.
ആവശ്യം ട്വിറ്റര്‍ നിരാകരിച്ചു. സമിതിക്ക് മുൻപിൽ ഹാജരായത് ട്വിറ്റര്‍ ഇന്ത്യയിലെ ഉദ്യോഗസ്ഥരായിരുന്നു. ഇവരെ കാണാന്‍ വിസമ്മതിച്ച സമിതി, പിന്നാലെ ജാക്ക് നേരിട്ട് എത്തണമെന്ന് ആവശ്യപ്പെട്ടു. ജാക്ക് വരില്ലെന്ന് കമ്പനി അറിയിച്ചതോടെ ഇന്ത്യ അയഞ്ഞു. നടപടികളിലേക്ക് തിരിഞ്ഞു.
***
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : twitter fails to comply with new it rules in india loses safe harbour shield in fight with bjp government
Malayalam News from malayalam.samayam.com, TIL Network
