യുപിയിൽ എസ്പി സർക്കാർ രൂപീകരിക്കുമെന്ന് ഭഗവാൻ കൃഷ്ണൻ സ്വപ്നത്തിൽ വന്ന് പറയാറുണ്ട്; ബിജെപിയെ പരിഹസിച്ച് അഖിലേഷ്

ലഖ്നൗ: ഉത്തർപ്രദേശിൽ നിയമസഭ തെരഞ്ഞെടുപ്പ് അടുത്തതോടെ പ്രസ്താവനകളും വിമർശനങ്ങളുമായി നേതാക്കളെല്ലാം സജീവമായിക്കഴിഞ്ഞു. ഇപ്പോൾ ഭഗവാൻ ശ്രീകൃഷ്ണനെ മുൻനിർത്തിയാണ് സംസ്ഥാനത്തെ നേതാക്കളുടെയെല്ലാം പ്രസ്താവനകൾ. സംസ്ഥാനത്ത് സമാജ്‌വാദി പാർട്ടി അധികാരത്തിലെത്തുമെന്ന് ഭഗവാൻ കൃഷ്ണൻ സ്വപ്നത്തിൽ വന്നു പറയാറുണ്ടെന്നാണ് പാർട്ടി അധ്യക്ഷനും മുൻ മുഖ്യമന്ത്രിയുമായ അഖിലേഷ് യാദവ് കഴിഞ്ഞദിവസം പറഞ്ഞത്. ബിജെപി എംപി ഹർനാഥ് സിങ്ങിന്‍റെ പ്രസ്താവനയെ പരിഹസിച്ചുകൊണ്ട് എസ്പി നേതാവിന്‍റെ വാക്കുകൾ.



കഴിഞ്ഞദിവസം ബിജെപി രാജ്യസഭാ എംപിയായ ഹർനാഥ് സിങ് ദേശീയ അധ്യക്ഷൻ ജെപി നദ്ദയ്ക്ക് അയച്ച കത്തിലായിരുന്നു ഭഗവാൻ ശ്രീകൃഷ്ണന്‍റെ പേര് ഉൾപ്പെടുത്തിയുള്ള പരമാർശം ഉൾപ്പെട്ടത്. ഇതിനെക്കുറിച്ച് പ്രതികരിക്കവെയാണ് എല്ലാദിവസം തന്‍റെ സ്വപ്നത്തിലും ഭഗവാൻ പ്രത്യക്ഷപ്പെടാറുണ്ടെന്ന് അഖിലേഷ് പറഞ്ഞത്.

Also Read : പാലക്കാട്ടെ ഡിസിസി വൈസ് പ്രസിഡന്‍റ് തോക്കും തിരകളുമായി കോയമ്പത്തൂര്‍ വിമാനത്താവളത്തില്‍ പിടിയിൽ



മഥുര മണ്ഡലത്തിൽ ബിജെപി യുപി മുഖ്യമന്ത്രി യോഗി ആദിത്യനാഥിനെ മത്സരിപ്പിക്കണമെന്നായിരുന്നു ഹർനാഥ് ജെപി നദ്ദയ്ക്ക് അയച്ച കത്തിൽ ആവശ്യപ്പെട്ടത്. മഥുര മണ്ഡലത്തിൽ നിന്ന് യോഗി മത്സരിച്ചാൽ വിജയിക്കുമെന്ന് ശ്രീകൃഷ്ണൻ തന്‍റെ സ്വപ്നത്തിൽ വന്ന് പറഞ്ഞുവെന്നാണ് ഹർനാഥ് സിങ് പറയുന്നത്. ഇതേക്കുറിച്ച് പ്രതികരിച്ച അഖിലേഷാകട്ടെ യോഗി പരാജയപ്പെടുമെന്നും ആർക്കും അദ്ദേഹത്തെ രക്ഷിക്കാനാകില്ലെന്നും തിരിച്ചടിച്ചു.

“എല്ലാ ദിവസവും രാത്രി ഭഗവാൻ കൃഷ്ണൻ എന്‍റെ സ്വപ്നത്തിൽ പ്രത്യക്ഷപ്പെടാറുണ്ട്. നമ്മൾ യുപിയിൽ സർക്കാർ രൂപീകരിക്കുമെന്നും ഭഗവാൻ പറയാറുണ്ട്” എന്നാണ് അഖിലേഷ് പറഞ്ഞത്.

Also Read : ഐഎസ് ബന്ധം: യുവതിയെ എൻഐഎ അറസ്റ്റ് ചെയ്തു; പിടിയിലായത് മറിയം എന്ന ദീപ്തി മർള



നിയമസഭ തെരഞ്ഞെടുപ്പിന് മുന്നോടിയായി സമാജ് വാദി പാർട്ടിയും ബിജെപിയും സംസ്ഥാനത്ത് വാക് പോര് ആരംഭിച്ച് കഴിഞ്ഞു. ക്രമസമാധാനം, രാമക്ഷേത്രം, പിയൂഷ് ജെയിൻ കേസ്, മാഫിയ രാജ് തുടങ്ങി വിഷയങ്ങളാണ് ഇരു കക്ഷികളും ഉയർത്തുന്നത്.