ഹജ്ജ് തീര്‍ത്ഥാടനത്തിന് ഇത്തവണ സ്മാര്‍ട്ട് കാര്‍ഡ് നിര്‍ബന്ധം. കാര്‍ഡില്ലാത്തവര്‍ക്ക് മക്കയില്‍ പ്രവശനം ഉണ്ടായിരിക്കില്ല. സ്മാര്‍ട്ട് കാര്‍ഡിനൊപ്പം ഔദ്യോഗിക ഹജ്ജ് പെര്‍മിറ്റിന്റെ രേഖയും ഹാജരാക്കണം.
സ്മാര്‍ട്ട് കാര്‍ഡ് നിര്‍ബന്ധം
ഹൈലൈറ്റ്:
- ഹജ്ജ് തീര്‍ത്ഥാടനത്തിന് സ്മാര്‍ട്ട് കാര്‍ഡ് നിര്‍ബന്ധം
- കാര്‍ഡില്ലാത്തവര്‍ക്ക് മക്കയില്‍ പ്രവശനം ഉണ്ടാകില്ല
- നടപടി കൊവിഡ് പ്രതിരോധത്തിന്റെ ഭാഗമായി
മക്ക: കൊവിഡ് പ്രതിരോധത്തിന്റെ ഭാഗമായി ഇത്തവണത്തെ ഹജ്ജ് തീര്‍ഥാടനത്തിന് ഹജ്ജ് സ്മാര്‍ട്ട് കാര്‍ഡ് നിര്‍ബന്ധമാക്കിയതായി ഹജ്ജ് ഉംറ മന്ത്രാലയം വ്യക്തമാക്കി. ഈ ഡിജിറ്റല്‍ കാര്‍ഡ് ഇല്ലാതെ മക്കയില്‍ പ്രവേശിക്കാന്‍ കഴിയില്ല. സ്മാര്‍ട്ട് കാര്‍ഡിനൊപ്പം ഔദ്യോഗിക ഹജ്ജ് പെര്‍മിറ്റിന്റെ രേഖയും വേണമെന്ന് മന്ത്രാലയം അറിയിച്ചു. കൊവിഡിന്റെ പശ്ചാത്തലത്തില്‍ ഹജ്ജ് കര്‍മം കൂടുതല്‍ സുരക്ഷിതമാക്കുന്നതിന്റെ ഭാഗമായാണ് നടപടിയെന്ന് ഹജ്ജ് ഉംറ കാര്യങ്ങള്‍ക്കായുള്ള ഡെപ്യൂട്ടി മന്ത്രി ഡോ. അബ്ദുല്‍ ഫത്താഹ് അല്‍ മശാത്ത് അറിയിച്ചു. ഹജ്ജ് പെര്‍മിറ്റ് സ്മാര്‍ട്ട് കാര്‍ഡുമായും തിരിച്ചറിയല്‍ കാര്‍ഡുമായും ഒത്തുനോക്കിയ ശേഷം മാത്രമേ തീര്‍ഥാടനത്തിന് പ്രവേശനം അനുവദിക്കൂ എന്നും അദ്ദേഹം പറഞ്ഞു.
അപേക്ഷ ഓണ്‍ലൈനിലൂടെ മാത്രം
അതേസമയം, ഹജ്ജിനുള്ള അപേക്ഷ ഹജ്ജ് ഉംറ മന്ത്രാലയത്തിന്റെ ഔദ്യോഗിക പോര്‍ട്ടല്‍ വഴി ഓണ്‍ലൈനായി മാത്രമേ സ്വീകരിക്കൂ എന്നും അദ്ദേഹം വ്യക്തമാക്കി. ഈ ഔദ്യോഗിക പോര്‍ട്ടല്‍ വഴിയല്ലാതെ ഹജ്ജിന് രജിസ്റ്റര്‍ ചെയ്യാന്‍ കഴിയില്ല. ഇതിന് പുറത്ത് ഏതെങ്കിലും ഏജന്‍സികളോ സ്ഥാപനങ്ങളോ ഈ സേവനം വാഗ്ദാനം ചെയ്യുന്നുണ്ടെങ്കില്‍ അത് തട്ടിപ്പാണെന്നും വിശ്വാസികള്‍ അതില്‍ വഞ്ചിതരാവരുതെന്നും അദ്ദേഹം അറിയിച്ചു. ചില സ്ഥാപനങ്ങള്‍ ഫീസ് വാങ്ങി സ്വന്തം നിലയ്ക്ക് ഹജ്ജ് രജിസ്‌ട്രേഷന്‍ നടത്തുന്നതായുള്ള റിപ്പോര്‍ട്ടുകളുടെ അടിസ്ഥാനത്തിലാണ് അദ്ദേഹത്തിന്റെ പ്രതികരണം. അബ്ശിര്‍ പ്ലാറ്റ്‌ഫോമിലെ ഹജ്ജ് പെര്‍മിറ്റ് മാത്രമേ ഇത്തവണ പരിഗണിക്കുകയുള്ളൂ. മന്ത്രാലയത്തിന്റെ പോര്‍ട്ടല്‍ വഴി ഹജ്ജ് പാക്കേജിന് ബുക്ക് ചെയ്ത് പണം അടച്ച ആളുകളുടെ വിവരങ്ങള്‍ സ്വമേധയാ അബ്ശിര്‍ പ്ലാറ്റ്‌ഫോമുമായും തിരിച്ചറിയല്‍ കാര്‍ഡുമായും ബന്ധിപ്പിക്കുമെന്നും അദ്ദേഹം അറിയിച്ചു.
സ്മാര്‍ട്ട് കാര്‍ഡ് തീര്‍ഥാടനം എളുപ്പമാക്കും
ഹജ്-ഉംറ തീര്‍ഥാടനം കൂടുതല്‍ എളുപ്പവും സൗകര്യപ്രദവുമാക്കുന്നതിന്റെ ഭാഗമായാണ് പുതിയ സ്മാര്‍ട്ട് കാര്‍ഡ് സംവിധാനം സൗദി ഭരണകൂടം ഒരുക്കിയിരിക്കുന്നത്. ഓരോ തീര്‍ഥാടകന്റെയും വ്യക്തിഗത വിവരങ്ങള്‍ അടങ്ങിയ സ്മാര്‍ട്ട് ചിപ്പുകള്‍ അടങ്ങിയതാണ് കാര്‍ഡുകള്‍. മെഡിക്കല്‍ റിപ്പോര്‍ട്ട്, താമസിക്കുന്ന സ്ഥലത്തെ കുറിച്ചുള്ള വിവരങ്ങള്‍ എന്നിവ ഉള്‍പ്പെടെയുള്ള ഡാറ്റ ഉള്‍ക്കൊള്ളുന്ന കാര്‍ഡുകള്‍ തീര്‍ഥാടകരെ താമസ സ്ഥലത്തു എത്തിക്കുന്നതിനും അവിടേക്കുള്ള പ്രവേശനങ്ങള്‍ നിയന്ത്രിക്കുന്നതിനും ഉപയോഗിക്കുമെന്ന് അധികൃതര്‍ വ്യക്തമാക്കി. നിശ്ചിത ഇടങ്ങളില്‍ സ്ഥാപിച്ച സ്വയം സേവന ഉപകരണങ്ങള്‍ (കിയോസ്‌ക്) വഴി തീര്‍ഥാടകര്‍ക്ക് ആവശ്യമായ വിവരങ്ങള്‍ സ്വയം കണ്ടെത്താനാവും. നിയര്‍ ഫീല്‍ഡ് കമ്മ്യൂണികേഷന്‍ സാങ്കേതിക വിദ്യയുടെ അടിസ്ഥാനത്തില്‍ പ്രവര്‍ത്തിക്കുന്ന സ്മാര്‍ട്ട് കാര്‍ഡിന്റെ സഹായത്തോടെ തിരക്കില്‍ പെട്ട് കാണാതാവുന്നവരെ കണ്ടെത്താനും സാധിക്കും. തീര്‍ഥാടകര്‍ക്ക് സ്വയം വിവരങ്ങള്‍ അറിയാന്‍ കാര്‍ഡില്‍ ബാര്‍കോഡും ഉള്‍ക്കൊള്ളിച്ചിട്ടുണ്ട്. ഏകീകൃത കണ്‍ട്രോള്‍ സെന്റര്‍ വഴിയാണ് സ്മാര്‍ട്ട് കാര്‍ഡിന്റെ പ്രവര്‍ത്തനം ഏകോപിപ്പിക്കുക. 2019ല്‍ 50,000 തീര്‍ഥാടകര്‍ക്ക് സ്മാര്‍ട്ട് കാര്‍ഡ് ലഭ്യമാക്കി നടത്തിയ പരീക്ഷണം വന്‍ വിജയമാണെന്ന് കണ്ടെത്തിയതിനെ തുടര്‍ന്നാണ് ഇത്തവണ ഇത് നിര്‍ബന്ധമാക്കാന്‍ ഹജ്ജ് ഉംറ മന്ത്രാലയം തീരുമാനിച്ചത്.
അല്‍ ഹുസ്ന്‍ ആപ്പ് പണിമുടക്കി; ഗ്രീന്‍ പാസ് പരിശോധന അബൂദാബി താല്‍ക്കാലികമായി നിര്‍ത്തി
കൊവിഡ് നിയന്ത്രണങ്ങള്‍ പാലിക്കണം
കഴിഞ്ഞ ദിവസം വരെ ഹജ്ജിന് രജിസ്റ്റര്‍ ചെയ്ത അഞ്ച് ലക്ഷത്തോളം ആളുകളില്‍ എല്ലാവരും ഒരു ഡോസ് എങ്കിലും വാക്‌സിന്‍ എടുത്തവരും ഇതിനു മുമ്പ് ഹജ്ജ് ചെയ്തിട്ടില്ലാത്തവരുമാണെന്നും ഡെപ്യൂട്ടി മന്ത്രി അറിയിച്ചു. അതേസമയം, തീര്‍ഥാടനത്തില്‍ ഉടനീളം സാമൂഹ്യ അകലം പാലിക്കുന്നത് ഉള്‍പ്പെടെയുള്ള കൊവിഡ് നിയന്ത്രണങ്ങള്‍ പാലിക്കാന്‍ തീര്‍ഥാടകരും അവര്‍ക്ക് സൗകര്യങ്ങളൊരുക്കുന്ന വിവിധ ഏജന്‍സികളും തയ്യാറാവണം. ഹോട്ടലുകള്‍, റസ്‌റ്റൊറന്റുകള്‍, ഗതാഗത സംവിധാനങ്ങള്‍, തീര്‍ഥാടന കേന്ദ്രങ്ങള്‍ തുടങ്ങി എല്ലാ ഇടങ്ങളിലും പെരുമാറ്റച്ചട്ടങ്ങള്‍ പാലിക്കണം. ഇത് ഉറപ്പുവരുത്തുന്നതിന് എല്ലാ സ്ഥലങ്ങളിലും ഉദ്യോഗസ്ഥരെ നിയോഗിച്ചിട്ടുണ്ട്. തീര്‍ഥാടകര്‍ക്ക് ആവശ്യമായ ആരോഗ്യ നിര്‍ദ്ദേശങ്ങള്‍ നല്‍കുന്നതിന് ഹെല്‍ത്ത് ഗൈഡുമാരെ നിയോഗിച്ചതായും അദ്ദേഹം അറിയിച്ചു. കൊവിഡ് വ്യാപനത്തിന്റെ പശ്ചാത്തലത്തില്‍ സൗദിയില്‍ താമസിക്കുന്ന സ്വദേശികളും പ്രവാസികളും ഉള്‍പ്പെടെ 60,000 പേര്‍ക്ക് മാത്രമാണ് ഇത്തവണ ഹജ്ജിന് അവസരം.
സുരക്ഷാകവചമില്ല, ഒരു ഈച്ച പോലും ആക്രമിക്കില്ല! ഇത് തേന്‍ ശേഖരണ കാലം
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : smart card must to perform haj
Malayalam News from malayalam.samayam.com, TIL Network
