Sumayya P | Samayam Malayalam | Updated: 19 Jun 2021, 09:15:05 AM
ഇഖാമയുള്ളവരും സന്ദര്‍ശക വിസയില്‍ വരുന്നവരുമായ വാക്‌സിന്‍ എടുത്തവര്‍ക്കും എടുക്കാത്തവര്‍ക്കുമായി പ്രത്യേക ലിങ്ക് പോര്‍ട്ടലില്‍ നല്‍കിയിട്ടുണ്ട്.
വാക്‌സിന്‍ എടുത്തവര്‍ക്കും എടുക്കാത്തവര്‍ക്കും ബാധകം
സൗദിക്കകത്തു നിന്നോ പുറത്തുനിന്നോ വാക്‌സിനെടുത്തവരും പൂര്‍ണമായോ ഭാഗികമായോ വാക്‌സിന്‍ ലഭിച്ചവരും തീരെ എടുക്കാത്തവരും അക്കാര്യം സൗദിയിലേക്ക് പുറപ്പെടുന്നതിന് മുമ്പ് ഓണ്‍ലൈനായി നല്‍കണം. സൗദിയില്‍ ഇഖാമയുള്ളവര്‍ക്കും സന്ദര്‍ശന വിസയില്‍ വരുന്നവര്‍ക്കും മുഖീം രജിസ്‌ട്രേഷന്‍ ബാധകമാണെന്നും അധികൃതര്‍ ഇറിയിച്ചു. ഇഖാമയുള്ളവരും സന്ദര്‍ശക വിസയില്‍ വരുന്നവരുമായ വാക്‌സിന്‍ എടുത്തവര്‍ക്കും എടുക്കാത്തവര്‍ക്കുമായി പ്രത്യേക ലിങ്ക് പോര്‍ട്ടലില്‍ നല്‍കിയിട്ടുണ്ട്. വിമാനത്താവളങ്ങളിലെയും മറ്റ് പ്രവേശന കേന്ദ്രങ്ങളിലേയും തിരക്ക് കുറക്കുന്നതിനും എമിഗ്രേഷന്‍ നടപടിക്രമങ്ങള്‍ വേഗത്തിലാക്കുന്നതിനും ഇത് സഹായകരമാകുമെന്ന് സൗദി ഡയരക്ടറേറ്റ് ഓഫ് പാസ്‌പോര്‍ട്ട്‌സ് (ജവാസാത്ത്) വിഭാഗം പറഞ്ഞു. വാക്‌സിനെടുക്കാതെ വരുന്നവര്‍ക്കും സൗദിയിലേക്ക് പ്രവേശനം അനുവദിക്കും. എന്നാല്‍ ഇവര്‍ സൗദിയിലെത്തിയാലുടന്‍ സ്വന്തം ചെലവില്‍ ഏഴുദിവസം ഹോട്ടല്‍ ക്വാറന്റൈനില്‍ പ്രവേശിക്കണം. ഇതു സംബന്ധിച്ച വിവരങ്ങളും മുഖീം പോര്‍ട്ടലില്‍ രേഖപ്പെടുത്തണം.
വാക്‌സിന്‍ എടുക്കാത്തവര്‍ക്ക് ഹോട്ടല്‍ ക്വാറന്റൈന്‍
മുഖീം രജിസ്‌ട്രേഷന്‍ പൂര്‍ത്തിയായാല്‍ അതിന്റെ പ്രിന്റ് കോപ്പിയും വാക്‌സിനേഷന്‍ സര്‍ട്ടിഫിക്കറ്റിന്റെ കോപ്പിയും യാത്രക്കാര്‍ കൈവശം കരുതണമെന്നും ജവാസാത്ത് വ്യക്തമാക്കി. വാക്‌സിനേഷന്‍ സര്‍ട്ടിഫിക്കറ്റില്‍ പാസ്‌പോര്‍ട്ട് നമ്പര്‍, സൗദിയില്‍ അംഗീകാരമുള്ള വാക്‌സിന്റെ പേര്, വാക്‌സിന്‍ ഡോസുകള്‍ സ്വീകരിച്ച തീയതികള്‍, ബാച്ച് നമ്പറുകള്‍ എന്നിവ ഉണ്ടെന്ന് ഉറപ്പാക്കണം. സൗദിയിലേക്ക് നിലവില്‍ പ്രവേശന വിലക്കുള്ള ഇന്ത്യ ഉള്‍പ്പെടെയുള്ള രാജ്യങ്ങളില്‍നിന്ന് വരുന്ന വിദേശികളായ എല്ലാ ആരോഗ്യ പ്രവര്‍ത്തകരും 72 മണിക്കൂറിനുള്ളിലെടുത്ത കൊവിഡ് നെഗറ്റീവ് സര്‍ട്ടിഫിക്കറ്റ് വിമാനത്താവളത്തില്‍ കാണിക്കണം. ഇവര്‍ നേരത്തെ രണ്ട് ഡോസ് വാക്‌സിനും എടുത്ത് രോഗപ്രതിരോധശേഷി നേടിയവരാണങ്കില്‍ സൗദിയിലെത്തിയാല്‍ ക്വാറന്റൈന്‍ ആവശ്യമില്ല. എന്നാല്‍ പൂര്‍ണമായി വാക്‌സിനെടുത്തിട്ടില്ലെങ്കില്‍ സൗദിയില്‍ ഏഴു ദിവസത്തെ ഹോട്ടല്‍ ക്വാറന്റൈന്‍ നിര്‍ബന്ധമാണ്. കൂടാതെ ആദ്യ ദിവസവും ഏഴാമത്തെ ദിവസവും പിസിആര്‍ പരിശോധനയും നിര്‍ബന്ധമാണെന്ന് ആരോഗ്യ മന്ത്രാലയം വ്യക്തമാക്കി.
വിസ കാലാവധി ജൂലൈ 31 വരെ പുതുക്കിത്തുടങ്ങി
അതിനിടെ, യാത്രാ നിരോധനത്തെ തുടര്‍ന്ന് നാടുകളില്‍ കുടുങ്ങിയ വിദേശികളുടെ റീ എന്‍ട്രി വിസയും സൗജന്യമായി പുതുക്കുന്ന നടപടി സൗദി അധികൃതര്‍ തുടങ്ങി. യാത്രവിലക്ക് മൂലം സൗദിയിലേക്ക് തിരിച്ച് വരാന്‍ സാധിക്കാത്തവരുടെ ഇഖാമ, എക്‌സിറ്റ്-റീ എന്‍ട്രി, വിസിറ്റ് വിസ എന്നിവയുടെ കാലാവധി നീട്ടി നല്‍കാന്‍ മെയ് 24ന് സൗദി ഭരണാധികാരി സല്‍മാന്‍ രാജാവ് നിര്‍ദേശം നല്‍കിയിരുന്നു. ഇതിനെ തുടര്‍ന്നാണ് ജൂലൈ 31വരെ ഇഖാമ കാലാവധി ദീര്‍ഘിപ്പിക്കുന്നത്. ഇതിന് പിന്നാലെയാണ് റീ എന്‍ട്രി വിസയും ജൂലൈ 31വരെ ദീര്‍ഘിപ്പിച്ച് തുടങ്ങി. സന്ദര്‍ശന വിസ നേടിയവര്‍ക്കും വിസാ കാലാവധി സൗജന്യമായി ദീര്‍ഘിപ്പിച്ച് നല്‍കുമെന്ന് ജവാസാത്ത് വിഭാഗം അറിയിച്ചിട്ടുണ്ട്. വിസാകാലാവധി പുതുക്കിയിട്ടുണ്ടോ എന്ന് ഉറപ്പ് വരുത്തുന്നതിനായി മുഖീം പോര്‍ട്ടിലിലെ വിസ വാലിഡിറ്റി എന്ന ലിങ്കില്‍ ക്ലിക്ക് ചെയ്ത് ഇഖാമ നമ്പറും അനുബന്ധവിവരങ്ങളും നല്‍കിയാല്‍ മതി. അബ്ശിര്‍ പോര്‍ട്ടല്‍ വഴിയും കാലാവധി പരിശോധിക്കാവുന്നതാണ്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : foreigners must register covid-19 vaccination status online before arrival saudi arabia
Malayalam News from malayalam.samayam.com, TIL Network
