ഇന്ന് രാഹുൽ ഗാന്ധിയ്ക്ക് 51-ാം പിറന്നാൾ; മുൻ അധ്യക്ഷന് ആശംസകള്‍ അറിയിച്ച് നേതാക്കൾ

ന്യൂഡൽഹി: ഇന്ന് കോൺഗ്രസ് നേതാവ് രാഹുൽ ഗാന്ധിയ്ക്ക് 51 വയസ്സ്. 1970 ജൂൺ 19നാണ് രാഹുൽ ഗാന്ധി ജനിച്ചത്. മുൻ അധ്യക്ഷൻ്റെ ജന്മദിനം സേവാദിനമായി ആചരിച്ച് രാജ്യതലസ്ഥാനത്ത് ഭക്ഷ്യകിറ്റുകളും കൊവിഡ് 19 പ്രതിരോധ സാമഗ്രികളും വിതരണം ചെയ്യാനുള്ള ഒരുക്കത്തിലാണ് പാര്‍ട്ടി.



ഡൽഹി മുനിസിപ്പൽ കോര്‍പ്പറേഷനിലെ 272 വാര്‍ഡുകളിലും സൗജന്യമായി ഭക്ഷ്യധാന്യങ്ങളും അവശ്യവസ്തുക്കളും മരുന്നുകളും അടങ്ങുന്ന കിറ്റുകള്‍ വിതരണം ചെയ്യാനാണ് പദ്ധതിയെന്ന് ഡൽഹി പ്രദേശ് കോൺഗ്രസ് കമ്മിറ്റി അറിയിച്ചു. കൂടാതെ രാജ്യതലസ്ഥാനത്ത് ഭക്ഷണവിദരണവും നടത്തുമെന്നും പാര്‍ട്ടി അറിയിച്ചിട്ടുണ്ട്.

Also Read: രാജ്യത്ത് പ്രതിദിന കൊവിഡ് കേസുകളിൽ കുറവ് തുടരുന്നു; മരണനിരക്കിലും കുറവ്

നിലവിൽ വയനാട് എംപിയായ രാഹുൽ ഗാന്ധിയെ കോൺഗ്രസ് നേതാക്കളും മറ്റു ദേശീയ നേതാക്കളും പിറന്നാള്‍ ആശംസകള്‍ അറിയിച്ചു. മുൻ മുഖ്യമന്ത്രി ഉമ്മൻ ചാണ്ടി ഫേസ്ബുക്കിലൂടെയാണ് രാഹുലിന് ആശംസകള്‍ നേര്‍ന്നത്. മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാൻ, കേന്ദ്ര സഹമന്ത്രി ബാബുൽ സുപ്രിയോ, കേന്ദ്രമന്ത്രി നിതിൻ ഗഡ്കരി തുടങ്ങിയവരും പിറന്നാള്‍ മംഗളങ്ങള്‍ നേര്‍ന്നു. തിരുവനന്തപുരം എംപിയായ ശശി തരൂരും രാഹുലിന് ട്വിറ്ററിലൂടെ പിറന്നാളാശംസകള്‍ നേര്‍ന്നു. തേജസ്വി യാദവ് അടക്കമുള്ള നേതാക്കളും ആശംസകള്‍ അറിയിച്ചിട്ടുണ്ട്.

Also Read: ഈ രാഷ്ട്രീയം കോൺഗ്രസിനു ഗുണം ചെയ്യില്ല; കെ സുധാകരൻ പക്വത കാണിക്കണമെന്ന് മമ്പറം ദിവാകരൻ

ഡൽഹിയിൽ ജനിച്ച രാഹുൽ ഗാന്ധി രാജ്യതലസ്ഥാനത്തും ഡെറാഡൂണിലുമായാണ് സ്കൂള്‍ വിദ്യാഭ്യാസം പൂര്‍ത്തിയാക്കിയത്. തുടര്‍ന്ന് ഡൽഹി സെൻ്റ്. സ്റ്റീഫൻസ് കോളേജിലെ പഠനത്തിനു ശേഷം ഹാര്‍വാര്‍ഡ് സര്‍വകലാശാലയിലും ഫ്ലോറിഡയിലെ റോളിൻസ് കോളേജിലും ഉപരിപഠനം പൂര്‍ത്തിയാക്കി. കുറച്ചു കാലം വിദേശത്തു ജോലി ചെയ്ത ശേഷം തിരിച്ചെത്തിയ രാഹുൽ ഗാന്ധി 2004ൽ അമേഠിയിൽ നിന്ന് ലോക്സഭാ തെരഞ്ഞെടുപ്പിൽ മത്സരിച്ചു വിജയിച്ചു. 2009ലും 2014ലും അമേഠിയിൽ നിന്നു വിജയിച്ചു ലോക്സഭയിലെത്തിയ രാഹുൽ ഗാന്ധി 2019ൽ അമേഠിയ്ക്കു പുറമെ വയനാട് മണ്ഡലത്തിൽ നിന്നും മത്സരിച്ചു. അമേഠിയിൽ ബിജെപി സ്ഥാനാര്‍ഥി സ്മൃതി ഇറാനിയോടു പരാജയപ്പെട്ടെങ്കിലും വയനാട്ടിൽ വൻ ഭൂരിപക്ഷത്തിൽ വിജയിക്കുകയായിരുന്നു.