കുനൂർ ഹെലികോപ്റ്റർ ദുരന്തം: അട്ടിമറിയോ തകരാറോ ഇല്ല, കാരണം വ്യക്തമാക്കി അന്വേഷണ റിപ്പോർട്ട്

ന്യൂഡൽഹി: സംയുക്തസേനാ മേധാവി ജനറൽ ബിപിൻ റാവത്ത് അടക്കമുള്ള ഉന്നത ഉദ്യോഗസ്ഥര്‍ കൊല്ലപ്പെട്ട ഹെലികോപ്റ്റര്‍ അപകടത്തിൻ്റെ കാരണം സംബന്ധിച്ച കാരണം കണ്ടെത്തി അന്വേഷണ കോടതി. അപകടത്തിൽ അട്ടിമറിയുണ്ടായിട്ടില്ലെന്നും ഹെലികോപ്റ്ററിന് യന്ത്രത്തകരാറുണ്ടായിരുന്നില്ലെന്നുമാണ് അന്വേഷണ കോടതിയുടെ കണ്ടെത്തൽ എന്ന് വാര്‍ത്താ ഏജൻസിയായ എഎൻഐ റിപ്പോര്‍ട്ട് ചെയ്തു.



ഹെലികോപ്റ്ററിൻ്റെ യന്ത്രത്തകരാറ്, അട്ടിമറി, അനാസ്ഥ എന്നിവ അപകടത്തിനു കാരണമായിട്ടില്ലെന്നാണ് റിപ്പോ‍‍ര്‍ട്ടിൽ പറയുന്നത്. ഏതെങ്കിലും തരത്തിലുള്ള സാങ്കേതികത്തകരാറോ അനാസ്ഥയോ പ്രാഥമിക അന്വേഷണത്തിൽ കണ്ടെത്താൻ കഴിഞ്ഞില്ലെന്നും വ്യോമസേനാ വൃത്തങ്ങള്‍ വ്യക്തമാക്കി. ഡിസംബർ എട്ടിനായിരുന്നു അന്വേഷണ സമിതി അപകടം സംബന്ധിച്ച റിപ്പോർട്ട് സമർപ്പിച്ചത്.

പെട്ടെന്നുണ്ടായ കാലാവസ്ഥാ മാറ്റമാണ് അപകടത്തിനു കാരണമായതെന്നാണ് പ്രാഥമിക കണ്ടെത്തൽ. മേഘത്തിനുള്ളിലേയ്ക്ക് പെട്ടെന്നു ഹെലികോപ്റ്റർ കടന്നതോടെ പൈലറ്റിനു കാഴ്ച മറയുകയും തുടർന്ന് മലഞ്ചെരിവിലേയ്ക്ക് പൈലറ്റ് ഹെലികോപ്റ്റർ ഇടിച്ചിറക്കുന്ന സാഹചര്യം ഉണ്ടാകുകയുമായിരുന്നു എന്ന് റിപ്പോർട്ടിൽ പറയുന്നു.

Also Read: കുറ്റവിമുക്തനായ ബിഷപ്പ് ഫ്രാങ്കോയ്ക്ക് ജന്മനാട്ടിൽ സ്വീകരണം നൽകി

ജനറൽ ബിപിൻ റാവത്തും പത്നി മധുലിക റാവത്തും അടക്കം പതിനാലു പേര്‍ക്കാണ് ഊട്ടിയ്ക്ക് സമീപം കൂനൂരിൽ വെച്ചുണ്ടായ അപടകത്തിൽ ജീവൻ നഷ്ടമായത്. ഇന്ത്യൻ വ്യോമസേനയുടെ എംഐ 15വി5 ഹെലികോപ്റ്ററായിരുന്നു ഡിസംബര്‍ എട്ടിന് അപകടത്തിൽപ്പെട്ടത്. ബിപിൻ റാവത്ത് അടക്കം 13 ഉദ്യോഗസ്ഥരും അപകടം നടന്ന ദിവസം തന്നെ കൊല്ലപ്പെട്ടിരുന്നു.

സുലൂരിലെ വ്യോമത്താവളത്തിൽ നിന്ന് വില്ലിങ്ടണിലെ സ്ഥാപനത്തിലേയ്ക്ക് ഒരു പ്രഭാഷഷണത്തിൽ പങ്കെടുക്കാനായി പോകുകയായിരുന്നു സംയുക്തസേനാ മേധാവി. രാജ്യത്തെ ഏറ്റവും മുതിര്‍ന്ന സൈനികോദ്യോഗസ്ഥൻ്റെ മരണം ആഗോളതലത്തിൽ വലിയ വാര്‍ത്തയായിരുന്നു. അപകടം നടന്ന വിവരം വൈകി സ്ഥിരീകരിച്ച വ്യോമസേന ഉടൻ തന്നെ അന്വേഷണം പ്രഖ്യാപിക്കുകയായിരുന്നു.

Also Read: ‘ചാൻസലറായി തുടരണം’; ഒടുവിൽ വെള്ളക്കൊടി? ഗവർണർക്ക് കത്തെഴുതി മുഖ്യമന്ത്രി

സുലൂര്‍ എയര്‍ബേസിൽ നിന്ന് രാവിലെ 11.48നാണ് ഹെലികോപ്റ്റര്‍ പുറപ്പെട്ടത്. 12.15ന് വില്ലിങ്ടണിലെത്തും എന്നായിരുന്നു കണക്കുകൂട്ടൽ. എന്നാൽ സുലൂരിലെ എയര്‍ ബേസുമായുള്ള എയര്‍ ട്രാഫിക് കൺട്രോള്‍ ബന്ധം ഏകദേശം 12.08ഓടു കൂടി നഷ്ടപ്പെടുകയായിരുന്നു. വലിയ സ്ഫോടനശബ്ദത്തോടെ ഹെലികോപ്റ്റര്‍ തകര്‍ന്നു വീഴുകയായിരുന്നു എന്നാണ് പ്രദേശവാസികള്‍ പറയുന്നത്. അപകടത്തിൽ ചോപ്പര്‍ പൂര്‍ണമായും തകര്‍ന്നു. ആദ്യഘട്ടത്തിൽ പ്രദേശവാസികളുടെ നേതൃത്വത്തിൽ നടത്തിയ രക്ഷാപ്രവര്‍ത്തനം പിന്നീട് സൈന്യം ഏറ്റെടുക്കുകയായിരുന്നു.