ഇന്ന് ഫാദേഴ്സ് ഡേ: അച്ഛൻ കരുതലിന്റെ പര്യായമാകുമ്പോൾ…

കുട്ടികളെ സംബന്ധിച്ചിടത്തോളം അച്ഛൻ കുടുംബത്തിനുള്ളിലെ പ്രധാന സ്ഥാനമാണ്, നിർബന്ധമായും ഉത്തരവാദിത്തത്തോടെ പെരുമാറണമെന്ന് നിഷ്കർഷയുള്ള സ്ഥാനം. അതുകൊണ്ടു തന്നെ ഒരു പിതാവിന്റെ പെരുമാറ്റവും സ്വഭാവ രീതികളും കുട്ടികളെ വളരെയധികം സ്വാധീനിക്കുന്നു. അതിനാൽ പിതാക്കന്മാർ ഉത്തരവാദിത്തത്തോടെ പ്രവർത്തിക്കണം. ഉത്തരവാദിത്തമുള്ള ഒരു പിതാവ് എല്ലായ്പ്പോഴും തന്റെ കുട്ടികൾക്ക് ശാരീരികമായും മാനസികമായും വളരുന്നതിന് ആരോഗ്യകരമായ അന്തരീക്ഷം ലഭിക്കുമെന്ന് ഉറപ്പാക്കും.



1. പിതാവ് എല്ലായ്പ്പോഴും ഒരു സംരക്ഷകനാണ്



കുട്ടികൾക്ക് ഏറ്റവും കൂടുതൽ സുരക്ഷിതത്വം അനുഭവപ്പെടുന്നത് അച്ഛനിൽ നിന്നാകും. കുട്ടികൾക്ക് സുരക്ഷിതത്വം അനുഭവപ്പെടുമ്പോൾ അവരുടെ ജോലിയിലും പ്രവർത്തനങ്ങളിലും കൂടുതൽ ശ്രദ്ധ കേന്ദ്രീകരിക്കാൻ കഴിയും, അതിനാൽ ഏത് പ്രശ്നങ്ങളിൽ നിന്നും അവരെ സംരക്ഷിക്കാൻ താൻ അവിടെ ഉണ്ടെന്ന് കുട്ടികളെ ബോധ്യപ്പെടുത്താനുള്ള ഉത്തരവാദിത്തം പിതാവിനുണ്ട്.

2. കുട്ടികൾക്കായി ലോകം തുറക്കുന്നു:



ലോകത്തെ മുഴുവൻ കുട്ടികൾക്കുമുന്നിൽ തുറക്കുന്ന ഒരു വലിയ ജാലകം തന്നെയാണ് അച്ഛൻ. കുട്ടികൾ പിതാവിന്റെ കണ്ണുകളിലൂടെ ലോകത്തെ മുഴുവൻ പരിചയപ്പെടാൻ തുടങ്ങുന്നു. കുട്ടികളെ സംബന്ധിച്ചിടത്തോളം, ഈ ലോകത്ത് എന്താണുള്ളതെന്ന് അവരെ പഠിപ്പിക്കുന്നതിനുള്ള മികച്ച വഴികാട്ടിയാണ് അവരുടെ പിതാവ്, അതുകൊണ്ട് ഇക്കാര്യത്തിൽ മികച്ച രീതിയിൽ അറിവ് നൽകാൻ ഓരോ അച്ഛൻമാർക്കും കഴിയണം.

3. നിരുപാധികമായ സ്നേഹം നൽകുക:



അച്ഛൻ കുട്ടികളെ എത്രമാത്രം സ്നേഹിക്കുന്നുവെന്നു കുട്ടികളെ ബോധ്യപ്പെടുത്തേണ്ട ഉത്തരവാദിത്തവും ഓരോ അച്ഛനുമുണ്ട്. തെറ്റായ കാര്യങ്ങൾ ചെയ്യുന്നതിന് മക്കളെ പ്രോത്സാഹിപ്പിക്കരുത്, എന്നാൽ ഏത് തരത്തിലുള്ള ഉപേദശവും സ്നേഹത്തോടെ അവർക്ക് പകരണം.

4. പങ്കാളിയോട് സ്നേഹവും ബഹുമാനവും കാണിക്കുക:



അച്ഛൻ കുട്ടിയോട് മാത്രമല്ല, പങ്കാളിയോടും സ്നേഹവും ആദരവും പ്രകടിപ്പിക്കണം.ഇങ്ങനെ ചെയ്താൽ മാത്രമേ കുട്ടികൾ അമ്മമാരെയും മറ്റ് മുതിർന്നവരെയും ബഹുമാനിക്കാൻ പഠിക്കൂ. പിതാക്കന്മാർ ഒരിക്കലും കുട്ടികളുടെ അമ്മമാരോട് ഒരു അപമാനവും കാണിക്കരുത്.

Also read: നമ്മുടെയൊക്കെ ജീവിതത്തിൽ അച്ഛൻ എന്ന വ്യക്തി ആരാണ്?



5. കൂടെയിരിക്കാം അൽപനേരം:



അച്ഛൻ കുട്ടികളുടെ കൂടെ നല്ല സമയം ചെലവഴിക്കുന്നത് കുട്ടികൾ എല്ലായ്പ്പോഴും വിലമതിക്കുന്ന കാര്യമാണ്. കുട്ടിയ്ക്ക് വേണ്ട സൗകര്യങ്ങൾ ഒരുക്കുന്നതിനായി നിങ്ങൾ എത്ര സമയം വിനിയോഗിക്കുന്നുവോ അത്ര തന്നെ പ്രധാനമാണ് അവരുടെ കൂടെ അവരിൽ ഒരാളായി സമയം ചെലവഴിക്കുന്നതും.

6. അച്ചടക്കം പഠിപ്പിക്കാം:



കുട്ടികൾക്ക് അച്ചടക്കം പഠിപ്പിക്കാനുള്ള ഉത്തരവാദിത്തം അച്ഛൻ തന്നെ ഏറ്റെടുക്കണം,അമ്മയേക്കാൾ അല്പം ഗൗരവത്തിൽ ശാസിക്കാൻ അച്ഛന് കഴിയും. കുട്ടികൾക്ക് ആവശ്യത്തിന് സ്വാതന്ത്ര്യം നൽകുകയും എന്നാൽ ശരിയല്ലാത്ത കാര്യങ്ങൾ കാണുമ്പോൾ കൃത്യമായ അതിർവരമ്പുകൾ സൃഷ്ടിക്കാനും അച്ഛന് കഴിയണം.

7. ഉത്തരവാദിത്തം പഠിപ്പിക്കുക:



കുട്ടികളിൽ അതാത് പ്രായത്തിനു അനുസരിച്ചുള്ള ഉത്തരവാദിത്തബോധം വളർത്തിയെടുക്കാൻ അച്ഛൻമാർക്ക് കഴിയണം. കുട്ടികൾക്ക് സ്വയം ചെയ്യാവുന്ന കാര്യങ്ങൾ ചെയ്തു ശീലിപ്പിയ്ക്കാൻ ശ്രദ്ധിക്കണം. ഇങ്ങനെ ചെയ്യുന്നത് കുട്ടികൾ അവരുടെ ജീവിതത്തിൽ ഉത്തരവാദിത്തമുള്ളവരായി മാറാൻ വഴിയൊരുക്കും. ചെറുപ്രായത്തിൽ തന്നെ ഈ ശീലം ഉണ്ടാക്കിയെടുക്കാൻ കുട്ടികളെ പഠിപ്പിക്കുന്നതാണ് നല്ലത്.

8. പഠനങ്ങളിൽ ഏർപ്പെടുക:



കുട്ടികൾ എന്താണ് പഠിക്കുന്നതെന്ന് പോലും അറിയാതെ അവരുടെ പരീക്ഷകളിൽ മികച്ച പ്രകടനം കാഴ്ചവെക്കുമെന്ന് പ്രതീക്ഷിക്കുന്നത് ശരിയായ രീതിയല്ല. കുട്ടികളുടെ പഠന കാര്യങ്ങൾ അന്വേഷിക്കുകയും അവർക്ക് കഴിയുന്ന മാഗനിർദേശങ്ങൾ നൽകുകയും ചെയ്യേണ്ടത് അച്ഛന്റെ കടമയാണ്.

9. ഉത്തരവാദിത്തങ്ങൾ ഏറ്റെടുക്കാൻ ശീലിപ്പിക്കുക:



അച്ഛൻ ഉത്തരവാദിത്തങ്ങൾ ഏറ്റെടുക്കുന്നത് കാണുമ്പോൾ മാത്രമേ, ജീവിതത്തിന്റെ വിവിധ ഘട്ടങ്ങളിൽ ഉത്തരവാദിത്തങ്ങൾ ഏറ്റെടുക്കാൻ കുട്ടികളും പഠിക്കൂ. വീട്ടു ജോലികളിലും ജീവിതവുമായി ബന്ധപ്പെട്ട മറ്റേത് കാര്യങ്ങളിലും അച്ഛൻ തികഞ്ഞ ഉത്തരവാദിത്ത ബോധം കാണിക്കുന്നുവെങ്കിൽ കുട്ടികളും ആ രീതി പിന്തുടരും.

10. നല്ല ആവശ്യങ്ങൾ സാധിച്ചു നൽകുക:



കുട്ടികൾക്ക് അവരുടെ പഠന ആവശ്യങ്ങൾക്കായുള്ള വസ്തുക്കളും അവരുടെ പ്രായത്തിൽ താല്പര്യം തോന്നുന്നതുമായ ആവശ്യങ്ങൾ സാധിച്ചു കൊടുക്കാൻ കഴിയണം. അതിനർത്ഥം എല്ലാ ആവശ്യങ്ങളും സാധിച്ചു നല്കുകയെന്നല്ല,പിന്നീട്ട് ദോഷകരമാകാൻ സാധ്യതയില്ലാത്ത എല്ലാ ആവശ്യങ്ങളും കഴിയുമെങ്കിൽ സാധിച്ചു നൽകാം.ഇതിനു ഓരോരുത്തരുടെയും സാമ്പത്തിക സ്ഥിതി കൂടി പരിഗണിക്കണം. ആവശ്യങ്ങൾ പരിഗണിക്കുന്നതോടൊപ്പം പണത്തിന്റെ മൂല്യം കൂടി കുട്ടികൾക്ക് മനസിലാക്കി നൽകാം.