കുട്ടികളിൽ ഏതൊക്കെ പ്രായക്കാർക്ക് ഇനി മാസ്ക് വേണ്ട, ധരിക്കേണ്ടത് ഏത് പ്രായക്കാർ? പുതുക്കിയ നിർദേശങ്ങൾ ഇങ്ങനെ

ന്യൂഡൽഹി: കുട്ടികളുടെ മാസ്ക് ഉപയോഗത്തിൽ പുതിയ നിർദേശങ്ങളുമായി കേന്ദ്രം. അഞ്ച് വയസോ അതിൽ താഴെ പ്രായമുള്ള കുട്ടികൾക്കോ മാസ്ക് ശുപാർശ നിർബന്ധമാക്കില്ലെന്ന് കേന്ദ്ര ആരോഗ്യ മന്ത്രാലയം. ആറ് മുതൽ 11 വയസുവരെ പ്രായമുള്ള കുട്ടികൾക്ക് മാതാപിതാക്കളുടെ നിർദേശമനുസരിച്ച് സുരക്ഷിതമായി മാസ്ക് ധരിക്കാമെന്ന് കേന്ദ്ര ആരോഗ്യ മന്ത്രാലയം പുതുക്കിയ കൊവിഡ് മാർഗനിർദേശത്തിൽ വ്യക്തമാക്കി.



രാജ്യത്ത് കൊവിഡിൻ്റെ കുതിപ്പ്; 3,47,254 പുതിയ കേസുകൾ; 703 മരണം, 9,692 ഒമിക്രോൺ ബാധിതർ

12 വയസും അതിന് മുകളിൽ പ്രായമുള്ള കുട്ടികൾക്കും പുതുക്കിയ നിർദേശത്തിൽ ഇളവില്ല. 12 വയസും അതിന് മുകളിൽ പ്രായമുള്ളവർ മുതിർന്നവരെ പോലെ തന്നെ മാസ്ക് നിർബന്ധമായും ധരിക്കണം. മോണോക്ലോണൽ ആൻ്റിബോഡികളുടെ ഉപയോഗവും ആൻ്റി വൈറലുകളും 18 വയസിൽ താഴെയുള്ള കുട്ടികൾക്ക് മാസ്ക് ശുപാർശ ചെയ്യുന്നില്ലെന്നും അധികൃതർ അറിയിച്ചു. മാസ്ക്കുകൾ കൈകാര്യം ചെയ്യുമ്പോൾ കൈകൾ സോപ്പും വെള്ളവും അല്ലെങ്കിൽ ആൽക്കഹോൾ അടങ്ങിയ സാനിറ്റൈസർ ഉപയോഗിച്ച് വൃത്തിയായി സൂക്ഷിക്കുന്നുവെന്ന് ഉറപ്പാക്കണം.

കൊവിഡ് രോഗികളിലെ സ്റ്റിറോയിഡ് ഉപയോഗത്തിലും കേന്ദ്രം വ്യക്തമായ നിർദേശം നൽകി. കൊവിഡ് ഗുരുതരമല്ലാത്ത രോഗികളിലെ സ്റ്റിറോയിഡ് ഉപയോഗം ദോഷം ചെയ്യും. ഗുരുതരമായ അവസ്ഥയിൽ കഴിയുന്നവർക്ക് മാത്രമേ സ്റ്റിറോയിഡ് നൽകാവൂ എന്നും പുതിയ മാർഗനിർദേശത്തിൽ കേന്ദ്രം വ്യക്തമാക്കുന്നുണ്ട്.

അഖിലേഷ് എന്തുകൊണ്ട് കർഹാൽ തെരഞ്ഞെടുത്തു; എന്താണ് ഈ മണ്ഡലത്തിൻ്റെ പ്രത്യേകത?

കൊവിഡ് പ്രതിരോധ വാക്സിനേഷന് അർഹരായിട്ടുള്ള കുട്ടികൾക്ക് വാക്സിൻ നൽകണം. കൂടിയ രീതിയിലുള്ള രോഗലക്ഷണങ്ങൾ ഇല്ലാതെയും നേരിയ ലക്ഷണങ്ങൾ മാത്രം അനുഭവപ്പെടുകയും തുടർന്ന് കൊവിഡ് സ്ഥിരീകരിക്കുകയും ചെയ്യുന്ന കുട്ടികൾക്ക് സാധാരണ രീതിയിലുള്ള പരിചരണം നൽകണം. പോഷകാഹാരം ഉറപ്പാക്കുന്നതിനൊപ്പം മാനസിക പിന്തുണയും കുട്ടികൾക്ക് നൽകണം. ഗുരുതരമായ അവസ്ഥയിൽ ആശുപത്രിയിൽ പ്രവേശിക്കപ്പെടുകയും രോഗമുക്തി നേടി ഡിസ്ചാർജ് ആകുകയും ചെയ്യുന്ന കുട്ടികളുടെ മാതാപിതാക്കൾക്ക് വ്യക്തമായ നിർദേശങ്ങൾ നൽകണം. ആരോഗ്യപ്രവർത്തകർ വേണം മാതാപിതാക്കൾക്ക് നിർദേശങ്ങൾ നൽകാൻ. ശ്വാസ തടസം പോലെയുള്ള സാഹചര്യങ്ങൾ അനുഭവപ്പെട്ടാൽ ആശുപത്രിയിലെത്തിച്ച് ചികിത്സ നല്‍കണമെന്നും കേന്ദ്ര ആരോഗ്യ മന്ത്രാലയം പുതുക്കിയ കൊവിഡ് മാർഗനിർദേശത്തിൽ പറയുന്നുണ്ട്.

ആശുപത്രിയിൽ കഴിയുന്നതിനിടെയൊ അതിനുശേഷമോ ഏതെങ്കിലും അവയവങ്ങളുടെ പ്രത്യേക പ്രവർത്തനം തകരാറിലാകുന്ന കുട്ടികൾക്ക് ഉചിതമായ പരിചരണം നൽകണമെന്നും കേന്ദ്രം വ്യക്തമാക്കുന്നുണ്ട്. രാജ്യത്ത് പ്രതിദിന കൊവിഡ് കേസുകളും ഒമിക്രോൺ കേസുകളും ഉയർന്ന സാഹചര്യത്തിലാണ് കേന്ദ്ര ആരോഗ്യ മന്ത്രാലയം വ്യാഴാഴ്ച പുതിയ മാർഗനിർദേശങ്ങൾ പുറത്തിറക്കിയത്. കൊവിഡ് വ്യാപനം രൂക്ഷമായതിനാൽ എല്ലാവരും ജാഗ്രത പാലിക്കണമെന്ന് നിർദേശത്തിൽ വ്യക്തമാക്കുന്നുണ്ട്.

കവർച്ചാ സംഘം പാഞ്ഞെത്തി; ലൈബീരിയയിലെ ക്രിസ്ത്യന്‍ പള്ളിയിൽ 29 മരണം, അപകടം തിക്കിലും തിരക്കിലും പെട്ട്

അതേസമയം, രാജ്യത്ത് കഴിഞ്ഞ 24 മണിക്കൂറിനിടെ 3,47,254 പേർക്ക് പുതിയതായി കൊവിഡ് ബാധയുണ്ടായി. 703 മരണങ്ങളാണ് റിപ്പോർട്ട് ചെയ്തത്. കേന്ദ്ര ആരോഗ്യ മന്ത്രാലയം ഇന്ന് രാവിലെ പുറത്തുവിട്ട റിപ്പോർട്ടിലാണ് രാജ്യത്തെ കൊവിഡ് വിവരങ്ങൾ വ്യക്തമാക്കുന്നത്. മുൻ ദിവസത്തേക്കാൾ 29,722 അധികം കൊവിഡ് കേസുകളാണ് കഴിഞ്ഞ 24 മണിക്കൂറിൽ രാജ്യത്ത് റിപ്പോർട്ട് ചെയ്തത്. 3,47,254 പേർക്ക് കൊവിഡ് സ്ഥിരീകരിച്ചപ്പോൾ ചികിത്സയിൽ കഴിഞ്ഞിരുന്ന 2,51,777 പേർ രോഗമുക്തി നേടി. വിവിധ സംസ്ഥാനങ്ങളിലായി 20,18,825 സജീവ കേസുകളാണ് നിലവിലുള്ളത്. രാജ്യത്തെ പ്രതിദിന പോസിറ്റിവിറ്റി നിരക്ക് 17.94% ആണ്. പ്രതിവാര പോസിറ്റിവിറ്റി നിരക്ക് 16.56% ആണെന്നും കേന്ദ്രം പുറത്തുവിട്ട റിപ്പോർട്ടിൽ പറയുന്നുണ്ട്.