ചർമ്മത്തിലെ ചുളിവുകൾ കുറയ്ക്കാൻ ചെറുപയർ കൊണ്ടൊരു സൂപ്പർ വിദ്യ

Green Gram Face Pack : മുഖത്ത് ചുളിവുകൾ പ്രത്യക്ഷപ്പെടുന്നത് അകാല വാർധക്യത്തിൻ്റെ ആദ്യ ലക്ഷണമാണ്. നിങ്ങളുടെ മുപ്പതുകളിലും നാല്പതുകളിലും ഇത്തരം ലക്ഷണങ്ങൾ പ്രകടമാകാൻ തുടങ്ങുന്നുണ്ടെങ്കിൽ അതിനർത്ഥം ചർമത്തിൻ്റെ സ്വാഭാവിക പുനരുജ്ജീവന ശേഷി നഷ്ടപ്പെട്ടു തുടങ്ങുന്നു എന്നാണ്. ഇത്തരമൊരവസ്ഥ ചെറുപ്രായത്തിൽതന്നെ നിങ്ങളുടെ ചർമ്മത്തെ കൂടുതൽ പ്രായമുള്ളതായി തോന്നിപ്പിക്കുകയും മുഖത്തിൻ്റെ സ്വാഭാവിക സൗന്ദര്യം കവർന്നെടുക്കുന്നതിനും കാരണമാകും. ഇതുമൂലം ചുളിവുകളും പിഗ്മെന്റേഷനും അടക്കമുള്ള ലക്ഷണങ്ങൾ കൂടുതൽ പ്രകടമാവുകയും അത് നിങ്ങളുടെ മുഖത്തിന്റെ ആകർഷണീയത കവർന്നെടുക്കുകയും ചെയ്യുന്നു. പ്രധാനമായും പോഷണത്തിൻ്റെ കുറവുമൂലം നിങ്ങളുടെ മുഖത്തിന് സംഭവിച്ച വാർദ്ധക്യ ലക്ഷണങ്ങളെ നേരിടാൻ അടുക്കളയിലെ ചില പ്രകൃതിദത്ത പരിഹാരങ്ങൾ കൊണ്ട് കഴിയും. വാർദ്ധക്യത്തിന്റെ ലക്ഷണങ്ങൾ നിങ്ങളുടെ മുഖചർമ്മത്തിൽ പ്രകടമാകുന്നുണ്ടെങ്കിൽ ഇതിന് പരിഹാരമായി ചെലവേറിയ ചികിത്സകൾ ഒന്നും തന്നെ ആവശ്യമില്ല. മറിച്ച് അടുക്കളയിലെ കറി കൂട്ടായ ചെറുപയർ കൊണ്ട് ഇതിന് പരിഹാരം കാണാം കാണാം.



ഗുണങ്ങൾ

ചെറുപയറിൽ അടങ്ങിയിരിക്കുന്ന എണ്ണമറ്റ പോഷക ഗുണങ്ങൾ നിങ്ങളുടെ ചർമ്മത്തിൽ ഒരു ആന്റി ഏജിംഗ് ഏജൻറ് ആയി പ്രവർത്തിക്കുന്നു. ഇത് ചർമ്മത്തെ എക്സ്ഫോളിയേറ്റ് ചെയ്യാൻ സഹായിക്കുന്നു. ഇത് ചർമ്മത്തെ ആരോഗ്യകരമായി നിലനിർത്താൻ ആവശ്യമായ പോഷണം നൽകുന്നു. ചർമത്തിലെ ഈർപ്പം പൂട്ടി വയ്ക്കാൻ സഹായിക്കുന്ന ധാരാളം വിറ്റാമിനുകളും എൻസൈമുകളും ഇതിലുണ്ട്. ഇക്കാരണം കൊണ്ടു തന്നെ നിങ്ങൾക്ക് എല്ലാ വിധത്തിലുള്ള ചർമ്മപ്രശ്നങ്ങളും ഒരു പരിധിവരെ ഒഴിവാക്കാൻ കഴിയും. വാസ്‌തവത്തിൽ ചർമം നേരിടുന്ന നിരവധി സൗന്ദര്യ പ്രശ്‌നങ്ങൾക്കായി ചെറുപയർ ഉപയോഗിച്ചുകൊണ്ടുള്ള ഫേസ്പാക്കുകൾ പരീക്ഷിക്കാം. ഇതുപയോഗിച്ച് ഫേസ് പാക്ക് തയ്യാറാക്കുക വളരെ എളുപ്പമാണ്. ഇതിനുള്ള നടപടിക്രമങ്ങൾ എങ്ങനെയെന്ന് നോക്കിയാലോ?

മുഖത്തെ അനാവശ്യരോമം നീക്കാൻ വീട്ടിലുണ്ട് മാർഗ്ഗങ്ങൾ

ചർമത്തിലെ ചുളിവുകളെ നേരിടാൻ ഫെയ്സ് പാക്ക് എങ്ങനെ തയ്യാറാക്കാം

ആവശ്യമായ ചേരുവകൾ

> 2 ടീസ്പൂൺ ചെറുപയർ

> 1 ടീസ്പൂൺ ചന്ദനപ്പൊടി

> 4 ബദാം

> 10 മുതൽ 12 വരെ കറിവേപ്പില

> അര ടീസ്പൂൺ തേൻ

> റോസ് വാട്ടർ

ഇതിനായി ഏറ്റവും ആദ്യം ചെറുപയർ വെള്ളത്തിലിട്ട് കുറച്ച് നേരം കുതിർക്കുക. ഇതിനു ശേഷം കറിവേപ്പിലയും കുതിർത്തുവച്ച പയറും നന്നായി കഴുകിയശേഷം മിക്സിയിൽ ഇട്ട് അരച്ചെടുക്കുക. ചെറുപയറും കറിവേപ്പിലയും നന്നായി അരഞ്ഞുകഴിഞ്ഞാൽ, ബാക്കിയുള്ള ചേരുവകളായ ബദാം, റോസ് വാട്ടർ, തേൻ ചന്ദനപ്പൊടി എന്നിവ ചേർത്ത് മിക്സറിൽ ഒരിക്കൽ കൂടി അരച്ചെടുക്കുക. നന്നായി കട്ടികുറഞ്ഞ പേസ്റ്റ് തയ്യാറായ ശേഷം ഒരു പാത്രത്തിലേക്ക് ഇത് മാറ്റി പത്ത് മിനിറ്റ് സൂക്ഷിക്കുക. മുഖം കഴുകിയ ശേഷം ഒരു തുണി കൊണ്ട് തുടച്ച് ഫേസ് പാക്ക് പുരട്ടുക.

നന്നായി മസാജ് ചെയ്തതിനെത്തുടർന്ന് കുറഞ്ഞത് 25 മിനിറ്റെങ്കിലും ഈ ഫേസ് പാക്ക് മുഖത്ത് സൂക്ഷിക്കുക. തുടർന്ന് വെള്ളത്തിൽ കഴുകുക. ആഴ്ചയിൽ രണ്ട് തവണയെങ്കിലും ഈ ഫേസ് പാക്ക് പരീക്ഷിക്കുന്നത് വഴി നിങ്ങളുടെ ചർമത്തിലെ അകാല വാർദ്ധക്യലക്ഷണങ്ങളെ തടഞ്ഞുനിർത്താൻ ആവും. കുറച്ചു തവണ പരീക്ഷിച്ചു കഴിയുമ്പോൾ തന്നെ ഏറ്റവും മികച്ച മാറ്റങ്ങൾ നിങ്ങൾ തിരിച്ചറിയും.