ഒമിക്രോൺ ഒരുവട്ടം വന്നാലും വീണ്ടും വരാം, മാസ്ക് ഉപേക്ഷിക്കരുത്; മുന്നറിയിപ്പുമായി വിദഗ്ധർ

പൂനെ: ഒമിക്രോൺ വകഭേദം ഒരുവട്ടം ബാധിച്ചവര്‍ക്കും അത് വീണ്ടും വരാനുള്ള സാധ്യതയുണ്ടെന്ന് ആരോഗ്യവിദഗ്ധരുടെ മുന്നറിയിപ്പ്. രോഗവ്യാപനവും മരണനിരക്കും പിടിച്ചു നിര്‍ത്താനായി മാസ്കും വാക്സിനും അടക്കമുള്ള പ്രതിരോധ മാര്‍ഗങ്ങള്‍ തുടരണമെന്നും വിദഗ്ധര്‍ അഭിപ്രായപ്പെട്ടു.



ഒമിക്രോൺ ഒരു തവണ ബാധിച്ചാലും വീണ്ടും ബാധിച്ചേക്കാമെന്നും ഇതിനുള്ള സാധ്യത തള്ളിക്കളയാനാകില്ലെന്നുമാണ് മഹാരാഷ്ട്ര കൊവിഡ് 19 ടാസ്ക് ഫോഴ്സ് അംഗം ഡോ. ശശാങ്ക് ജോഷി ടൈംസ് ഓഫ് ഇന്ത്യയോട് വ്യക്തമാക്കിയത്. ഏതു വകഭേദമാണെങ്കിലും ഒന്നിലധികം തവണ കൊവിഡ് ബാധിക്കാനുള്ള സാധ്യതയുണ്ടെന്ന് അദ്ദേഹം പറഞ്ഞു. അടുത്തിടെ ഒമിക്രോൺ ബാധിച്ച് സുഖം പ്രാപിച്ചവരാണെങ്കിലും അവര്‍ക്ക് വീണ്ടും രോഗം ബാധിക്കാനുള്ള സാധ്യതയുണ്ടെന്നും മാസ്ക് ഉപയോഗിക്കുന്നതിൽ വീഴ്ച വരുത്തി വീണ്ടും രോഗബാധ ക്ഷണിച്ചു വരുത്തരുതെന്നും അദ്ദേഹം പറഞ്ഞു.

Also Read: മാറ്റമില്ലാതെ പ്രതിദിന കൊവിഡ് ബാധ; 3,37,704 പുതിയ കേസുകൾ; 10,000 കടന്ന് ഒമിക്രോൺ

അതേസമയം, ഒമിക്രോൺ വീണ്ടും ബാധിച്ച കേസുകള്‍ ഇതുവരെ രാജ്യത്ത് കണ്ടെത്തിയിട്ടില്ലെന്നാണ് ടാസ്ക്ഫോഴ്സിലെ മറ്റൊരു അംഗമായ ഡോ. രാഹുൽ പണ്ഡിറ്റ് വ്യക്തമാക്കിയത്. എന്നാൽ അടുത്തിടെ കൊവിഡ് 19 ബാധിച്ചു സുഖം പ്രാപിച്ചെന്നു കരുതി മാസ്ക് വെക്കുന്നതിൽ അലംഭാവം കാണിക്കരുതെന്നും ഭാവിയിൽ ഉണ്ടാകുന്ന വകഭേദം എങ്ങനെയായിരിക്കുമെന്നു ചിന്തിക്കാൻ കഴിയില്ലെന്നും അദ്ദേഹം പറഞ്ഞു. ഒമിക്രോൺ ആയാലും മറ്റൊരു കൊവിഡ് വകഭേദമായാലും രോഗബാധ ചെറുക്കാൻ മാസ്കും സാമൂഹിക അകലവും ശീലിക്കണമെന്നും അദ്ദേഹം പറഞ്ഞു.

Also Read: മൂന്നാം തരംഗം: ദുരിതം നേരിടുന്നവരെ സഹായിക്കാൻ എല്ലാ പാർട്ടി ഘടകങ്ങളും രംഗത്ത് വരണം: സിപിഎം

ഒരിക്കൽ രോഗബാധയുണ്ടായി മൂന്നു മാസത്തിനുള്ളിൽ വീണ്ടും വൈറസ് ബാധിച്ചാൽ ഇത് റീഇൻഫെക്ഷൻ ആയി കണക്കാക്കാമെന്നാണ് മൈക്രോബയോളജിസ്റ്റ് ഡോ. ഗഗൻദീപ് കാങ് പറയുന്നത്. മറ്റു വകഭേദങ്ങളിൽ ഇങ്ങനെ സംഭവിച്ചിട്ടുള്ളതിനാൽ ഒമിക്രോൺ വകഭേദത്തിലും ഇതിനുള്ള സാധ്യതയുണ്ടെന്നും അദ്ദേഹം പറഞ്ഞു.

Also Read: യുപിയിൽ മുഖ്യമന്ത്രി സ്ഥാനാര്‍ഥിയാകുമോ? ആകാംക്ഷയ്ക്ക് വിരാമമിട്ട് പ്രിയങ്ക ഗാന്ധിയുടെ ഉത്തരം

യുഎസിൽ അടക്കം കൊവിഡ് 19 ഒമിക്രോൺ വകഭേദം ആളുകളെ രണ്ടാമതും ബാധിച്ചതിൻ്റെ തെളിവുകള്‍ ലഭിച്ചതായി വിദഗ്ധര്‍ സാക്ഷ്യപ്പെടുത്തുന്നുണ്ട്. പകര്‍ച്ചവ്യാധി വിദഗ്ധനും ആരോഗ്യസാമ്പത്തിക വിദഗ്ധനുമയ ഡോ. എറിക് ഫെഗിൽ ഡിങ് ആണ് ഇതു സംബന്ധിച്ച് മുന്നറിയിപ്പ് നൽകിയത്. ആദ്യതവണ ഒമിക്രോൺ ബാധിച്ചപ്പോള്‍ വലിയ രോഗതീവ്രത ഉണ്ടായില്ലെങ്കിലോ രോഗപ്രതിരോധശേഷി കുറവാണെങ്കിലോ വീണ്ടും രോഗബാധയേൽക്കാൻ സാധ്യതയുണ്ടെന്നും ജാഗ്രത തുടരണമെന്നും അദ്ദേഹം ആവശ്യപ്പെട്ടു.

അതേസമയം, നിലവിൽ മൊത്തം കേസുകളുടെ എണ്ണവുമായി തട്ടിച്ചു നോക്കുമ്പോള്‍ ഇത്തരം കേസുകള്‍ വളരെ കുറവാണെന്നും എന്നാൽ ജാഗ്രത തുടരണമെന്നും ഐ സി എം ആര്‍ ദേശീയ കൊവിഡ് 19 ടാസ്ക് ഫോഴ്സ് അംഗം ഡോ. സഞ്ജയ് പൂജാരി പറഞ്ഞു.