കൊവിഡ് വ്യാപനം കൂടി; ഒമാനില്‍ ഇന്നു മുതല്‍ രാത്രികാല കര്‍ഫ്യൂ

മസ്‌ക്കറ്റ്: ഏതാനും ആഴ്ചകളായി ഒമാനില്‍ കൊവിഡ് വ്യാപനം രൂക്ഷമായി തുടരുകയും മരണ നിരക്ക് വലിയ തോതില്‍ വര്‍ധിച്ചുവരികയും ചെയ്യുന്ന പശ്ചാത്തലത്തില്‍ കൂടുതല്‍ നിയന്ത്രണങ്ങള്‍ ഏര്‍പ്പെടുത്തി അധികൃതര്‍. രാത്രി എട്ടു മണി മുതല്‍ പുലര്‍ച്ചെ നാല് മണി വരെ ആളുകളോ വാഹനങ്ങളോ പുറത്തിറങ്ങരുത്. ഈ സമയത്ത് മുഴുവന്‍ വാണിജ്യ സ്ഥാപനങ്ങളും അടച്ചിടണം. ഇന്ന് ഞായറാഴ്ച മുതല്‍ ഇനിയൊരു അറിയിപ്പുണ്ടാവുന്നത് വരെയാണ് രാത്രികാല കര്‍ഫ്യൂ നിയന്ത്രണം നിലവില്‍ വരികയെന്ന് സുപ്രിം കമ്മിറ്റി അറിയിച്ചു.



Also Read: മികച്ച മത്സരാധിഷ്ഠിത സാമ്പത്തിക വ്യവസ്ഥ; ഖത്തറിന് 17ാം സ്ഥാനം

ഹോം ഡെലിവറി ഉള്‍പ്പെടെ നേരത്തേ ഉണ്ടായിരുന്ന കര്‍ഫ്യൂ വേളയില്‍ ഇളവ് നല്‍കപ്പെട്ട സേവനങ്ങളെയും വിഭാഗങ്ങളെയും പുതിയ നിയന്ത്രണങ്ങളില്‍ നിന്ന് ഒഴിവാക്കിയിട്ടുണ്ട്. അതേസമയം, നേരത്തേ പ്രഖ്യാപിച്ച പ്രകാരം കൊവിഡ് വാക്സിനേഷന്‍ നടപടികളുമായി ആരോഗ്യ മന്ത്രാലയം മുന്നോട്ടു പോവുമെന്ന് സുപ്രിം കമ്മിറ്റി അറിയിച്ചു. അര്‍ഹരായ മുഴുവന്‍ ജനങ്ങളും വാക്സിനെടുക്കാന്‍ മുന്നോട്ട് വരണമെന്ന് മന്ത്രാലയം ആഹ്വാനം ചെയ്തു. ഒമാനിലെ പ്രവാസികള്‍ ഉള്‍പ്പെടെയുള്ള 45 വയസ്സായവര്‍ക്ക് ഇന്നു മുതലാണ് വാക്‌സിന്‍ വികരണം ആരംഭിക്കുക. കൊവിഡില്‍ നിന്ന് സ്വയം സുരക്ഷിതരാകുവാനും മറ്റുള്ളവര്‍ക്ക് സുരക്ഷ ഏകുവാനും എല്ലാവരും വാക്‌സിനേഷന്‍ ഡ്രൈവില്‍ സജീവമായി പങ്കാളികളാവണമെന്നും സുപ്രിം കമ്മിറ്റി അറിയിച്ചു

രാജ്യത്ത് കഴിഞ്ഞ ഏതാനും ആഴ്ചകളായി തുടരുന്ന കൊവിഡ് വ്യാപനത്തിന്റെയും അതുമൂലമുള്ള മരണങ്ങളുടെയും പശ്ചാത്തലത്തില്‍ രാജ്യത്തെ സ്ഥിതിഗതികള്‍ വിലയിരുത്തിയ ശേഷമാണ് രാത്രികാല ലോക്കഡൗണ്‍ നടപ്പിലാക്കാന്‍ സുപ്രിം കമ്മിറ്റി തീരുമാനമെടുത്തത്. സമൂഹത്തിന്റെ വലിയൊരു വിഭാഗം കൊവിഡ് പെരുമാറ്റച്ചട്ടങ്ങളും നിയന്ത്രണങ്ങളും പാലിച്ചു മുന്നോട്ടുപോവുമ്പോള്‍ ഒരു ചെറിയ വിഭാഗം ഇവയെല്ലാം ലംഘിക്കുന്നത് ശ്രദ്ധയില്‍പ്പെട്ടിട്ടില്ലെന്നും കമ്മിറ്റി വിലയിരുത്തി. ഇതാണ് രാജ്യത്ത് കൊവിഡ് വ്യാപനത്തിന്റെ ശക്തികൂട്ടുന്നത്. നിയമം ലംഘിക്കുന്നവര്‍ക്കെതിരേ ശക്തമായ നടപടി സ്വീകരിക്കാന്‍ ബന്ധപ്പെട്ടവര്‍ക്ക് നിര്‍ദ്ദേശം നല്‍കിയിട്ടുണ്ടെന്നും സുപ്രിം കമ്മിറ്റി മുന്നറിയിപ്പ് നല്‍കി.