കൊവിഡ് പോരാട്ടത്തിൽ യോഗ പ്രതീക്ഷയുടെ കിരണം; ലോകത്തിന് സുഖാശംസകള്‍ നേര്‍ന്ന് പ്രധാനമന്ത്രി

ന്യൂഡൽഹി: ലോകം മുഴുവൻ കൊവിഡ് 19നെതിരെ പോരാടുമ്പോള്‍ യോഗയ്ക്കുള്ള പ്രാധാന്യം വര്‍ധിക്കുകയാണെന്ന് പ്രധാനമന്ത്രി നരേന്ദ്ര മോദി. മഹാമാരി മൂലം കഴിഞ്ഞ രണ്ട് വര്‍ഷമായി ഒരു പൊതുപരിപാടി പോലും സംഘടിപ്പിച്ചിട്ടില്ലെങ്കിലും യോഗയോടുള്ള താത്പര്യത്തിൽ ഒട്ടും കുറവു വന്നിട്ടില്ലെന്നും പ്രധാനമന്ത്രി പറഞ്ഞു. അന്താരാഷ്ട്ര യോഗ ദിനത്തിൽ വീഡിയോ സന്ദേശത്തിൽ സംസാരിക്കുകയായിരുന്നു പ്രധാനമന്ത്രി.



“ഇന്ന് ലോകം മുഴുവൻ കൊവിഡ് 19 മഹാമാരിയ്ക്കെതിരെ പോരാടുമ്പോള്‍ യോഗ ഒരു പ്രതീക്ഷയുടെ കിരണമായി മാറിയിരിക്കുകയാണ്.” പ്രധാനമന്ത്രി പറഞ്ഞു. ചികിത്സയ്ക്കു പുറമെ ശാരീരിക സൗഖ്യത്തിനാണ് ഇന്ന് വൈദ്യശാസ്ത്രവും മുൻഗണന കൊടുക്കുന്നതെന്നും യോഗ സൗഖ്യത്തിന് സഹായിക്കുമെന്നും മോദി പറഞ്ഞു. “സൗഖ്യത്തിനായി യോഗ” എന്നതാണ് ഇത്തവണത്തെ അന്താരാഷ്ട്ര യോഗ ദിനത്തിൻ്റെ തീം. ലോകത്തെ എല്ലാ രാജ്യങ്ങളും പ്രദേശങ്ങളും ജനങ്ങളും ആരോഗ്യവാന്മാരായിരിക്കട്ടെയെന്ന് പ്രധാനമന്ത്രി ആശംസിച്ചു.

Also Read: സംസ്ഥാനത്തെ ബാറുകള്‍ ഇന്ന് മുതല്‍ അടച്ചിടും; കനത്ത നഷ്‌ടമുണ്ടാകുമെന്ന് ഉടമകൾ

ഡോക്ടര്‍മാരും നഴ്സുമാരും ശ്വസനം എളുപ്പത്തിലാക്കാൻ പ്രാണായാമം ഉള്‍പ്പെടെയുള്ള യോഗമുറകള്‍ രോഗികളെ പഠിപ്പിക്കുന്നതിൻ്റെ ചിത്രങ്ങളുണ്ടെന്ന് പ്രധാനമന്ത്രി പറഞ്ഞു. ഡോക്ടര്‍മാര്‍ പോലും രോഗികളെ ചികിത്സിക്കാനുള്ള ആയുധമാക്കി യോഗയെ ഉപയോഗിക്കുകയാണ്. യോഗ ശ്വസനസംവിധാനത്തെ ശക്തിപ്പെടുത്തുന്നതായി അന്താരാഷ്ട്ര വിദഗ്ധര്‍ ചൂണ്ടിക്കാണിച്ചിട്ടുണ്ടെന്നും പ്രധാനമന്ത്രി സന്ദേശത്തിൽ പറഞ്ഞു.

Also Read: കോഴിക്കോട്ട് രാമനാട്ടുകരയിൽ കാറും ലോറിയും കൂട്ടിയിടിച്ചു; 5 പേര്‍ക്ക് ദാരുണാന്ത്യം

ലോകാരോഗ്യസംഘടനയുമായി ചേര്‍ന്ന് കേന്ദ്രസര്‍ക്കാര്‍ പുറത്തിറക്കുന്ന എം-യോഗ ആപ്പിനെപ്പറ്റിയും പ്രധാനമന്ത്രി സംസാരിച്ചു. വിവിധ ഭാഷകളിൽ യോഗ വീഡിയോകള്‍ പങ്കുവെക്കുന്ന ഈ ആപ്പ് സുപ്രധാന ചുവടുവെയ്പ്പാണെന്ന് ചൂണ്ടിക്കാണിച്ച പ്രധാനമന്ത്രി “ഒരു രാജ്യം, ഒരേ ആരോഗ്യം” എന്ന ലക്ഷ്യത്തിന് ഇത് സഹായിക്കുമെന്ന് ചൂണ്ടിക്കാട്ടി.