Sumayya P | Samayam Malayalam | Updated: 21 Jun 2021, 09:26:34 AM
പ്രവാചകന്റെ കാലത്തോ അതിനു ശേഷമുള്ള നാല് ഖലീഫമാരുടെ കാലത്തോ പിന്നീട് വന്ന ഭരണാധികാരികളുടെ കാലഘട്ടങ്ങളിലോ ഒന്നും അഞ്ചു നേരത്തെ പ്രാര്‍ഥനാ വേളയില്‍ കടകള്‍ അടച്ചിട്ടതായി ചരിത്രപരമായ തെളിവുകളിലെന്നും ശൂറാ കൗണ്‍സില്‍ അംഗങ്ങള്‍
റിയാദ്: അഞ്ചു നേരത്തെ നമസ്‌കാര വേളയില്‍ സൗദിയിലെ വ്യാപാര സ്ഥാപനങ്ങള്‍ അടച്ചിടണമെന്ന നിലവിലെ നിബന്ധന തുടരണമോ നിര്‍ത്തലാക്കണമോ എന്ന കാര്യത്തില്‍ തീരുമാനം ഇന്ന്. പ്രാര്‍ഥനാ വേളയില്‍ നിബന്ധനായും കടകള്‍ അടയ്ക്കണമെന്നില്ലെന്ന് വ്യക്തമാക്കുന്ന ശുപാര്‍ശ ഇന്ന് ചേരുന്ന ശൂറാ കൗണ്‍സില്‍ ചര്‍ച്ച ചെയ്ത് അന്തിമ തീരുമാനം കൈക്കൊള്ളുമെന്നാണ് റിപ്പോര്‍ട്ട്.
വെള്ളിയാഴ്ച മാത്രം കടകള്‍ അടച്ചാല്‍ മതി
നിര്‍ബന്ധ കടയടപ്പ് വ്യവസ്ഥ വെള്ളിയാഴ്ച പ്രാര്‍ഥനയ്ക്കായി മാത്രം ചുരുക്കാനും മറ്റ് ദിവസങ്ങളില്‍ താല്‍പര്യമുള്ളവര്‍ മാത്രം അടച്ചാല്‍ മതിയെന്ന് നിര്‍ദ്ദേശിക്കുന്നതുമാണ് പുതിയ ശുപാര്‍ശ. ഇതിന്‍മേല്‍ ഇന്ന് വോട്ടെടുപ്പ് നടക്കുമെന്ന് സൗദി ഗസറ്റ് റിപ്പോര്‍ട്ട് ചെയ്തു. ശൂറാ കൗണ്‍സിലിന്റെ കീഴിലുള്ള ഇസ്ലാമിക് ആന്റ് ജുഡീഷ്യല്‍ കമ്മിറ്റിയാണ് ഇത്തരമൊരു നിര്‍ദ്ദേശം മുന്നോട്ടുവച്ചിരിക്കുന്നത്. ശൂറ അംഗങ്ങളായ അത്ത അല്‍ സുബൈത്തി, ഡോ. ഫൈസല്‍ അല്‍ ഫാദില്‍, ഡോ. ലതീഫ അല്‍ ശാലന്‍, ഡോ. ലതീഫ അല്‍ അബ്ദുല്‍ കരീം എന്നിവര്‍ സമര്‍പ്പിച്ച ശുപാര്‍ശയാണ് ഇന്ന് വോട്ടിനിടുക. നിലവില്‍ ഫാര്‍മസികള്‍, പെട്രോള്‍ സറ്റേഷനുകള്‍ ഉള്‍പ്പെടെയുള്ള വ്യാപാര സ്ഥാപനങ്ങള്‍ അഞ്ച് നേരത്തേ നമസ്‌കാര വേളയില്‍ നിര്‍ബന്ധമായും അടച്ചിടണം എന്നതാണ് വ്യവസ്ഥ. എന്നാല്‍ ഇത് വെള്ളിയാഴ്ച ജുമുഅ പ്രാര്‍ഥനയ്ക്ക് മാത്രമാക്കി പരിമിതപ്പെടുത്താനും ബാക്കിയുള്ള ദിവസങ്ങളില്‍ ഈ വ്യവസ്ഥ ഒഴിവാക്കാനും ഇസ്ലാമിക കാര്യ മന്ത്രാലയം ബന്ധപ്പെട്ട ഏജന്‍സികളുമായി സഹകരിച്ച് നടപടി സ്വീകരിക്കണമെന്നാണ് ശുപാര്‍ശയിലെ ആവശ്യം.
പ്രാര്‍ഥനാ വേളയിലെ കടയടപ്പ് സൗദിയില്‍ മാത്രം
കടകള്‍ അടച്ചിടേണ്ടതില്ലെന്ന തങ്ങളുടെ ആവശ്യത്തിന് ന്യായീകരണമായി വിവിധ വാദമുഖങ്ങളാണ് ശൂറാ കൗണ്‍സില്‍ അംഗങ്ങള്‍ മുന്നോട്ടുവച്ചിരിക്കുന്നത്. അതില്‍ ഏറ്റവും പ്രധാനം സൗദി അറേബ്യയില്‍ മാത്രമാണ് ഇത്തരമൊരു രീതി നിലവിലുള്ളത് എന്നതാണ്. കഴിഞ്ഞ ഏതാനും ദശകങ്ങള്‍ക്കു മുമ്പ് മാത്രമാണ് ഈ രീതി സൗദിയില്‍ തുടങ്ങിയത്. പണ്ഡിതന്മാര് സ്വന്തം വ്യാഖ്യനത്തിലൂടെ കണ്ടെത്തി നടപ്പിലാക്കിയതാണ് പ്രാര്‍ഥനാ വേളയിലെ നിര്‍ബന്ധിത കടയടപ്പ് രീതി. ഇതിന് നിയമപരമായ എന്തെങ്കിലും അടിസ്ഥനമില്ല. മറ്റ് സര്‍ക്കാര്‍-സ്വകാര്യ സ്ഥാപനങ്ങളെ പോലെ തന്നെ ജനങ്ങള്‍ക്ക് സേവനം നല്‍കുകയും അതുവഴി ജീവിതമാര്‍ഗം കണ്ടെത്തുകയും ചെയ്യുന്ന സ്ഥാപനങ്ങളാണ് കടകളെന്നും പ്രാര്‍ഥനാ വേളകളില്‍ അവ അടച്ചിടണമെന്ന് പറയുന്നത് ശരിയല്ലെന്നും ശൂറാ കൗണ്‍സില്‍ അംഗങ്ങള്‍ വ്യക്തമാക്കി.
ഖുര്‍ആനിലും പ്രവാചക ചര്യകളിലും ഇങ്ങനെയൊരു നിര്‍ദ്ദേശമില്ല
എന്നു മാത്രമല്ല, വിശുദ്ധ ഖുര്‍ആനിലും പ്രവാചക ചര്യയായ സുന്നത്തിലും പ്രാര്‍ഥനാ വേളയിലെ നിര്‍ബന്ധിത കടയടപ്പിനെ കുറിച്ച് എവിടെയും പറഞ്ഞിട്ടില്ല. വെള്ളിയാഴ്ചകളില്‍ ജുമുഅ പ്രാര്‍ഥനാ വേളയില്‍ മാത്രമാണ് ഖുര്‍ആനില്‍ ഇത്തരമൊരു നിര്‍ദ്ദേശം നല്‍കിയിട്ടുള്ളത്. പ്രാര്‍ഥനാ വേളയില്‍ കടകള്‍ അടക്കണമെന്ന് പ്രവാചകന്‍ പറഞ്ഞതായുള്ള റിപ്പോര്‍ട്ടുകള്‍ ബലഹീനമാണ്. അത് ആധികാരികമാണെന്ന് ഇതുവരെ തെളിയിക്കപ്പെട്ടിട്ടില്ലെന്നും ശൂറാ അംഗങ്ങള്‍ വ്യക്തമാക്കി. പള്ളികളില്‍ നടക്കുന്ന സമൂഹ പ്രാര്‍ഥനകളില്‍ പങ്കെടുക്കാന്‍ ജീവനക്കാര്‍ക്ക് അവസരം നല്‍കുന്നതിന് വേണ്ടിയാണ് ഇത്തരമൊരു നിയമം സൗദി നടപ്പിലാക്കിയത്. എന്നാല്‍, പള്ളികളില്‍ മാത്രമേ സമൂഹ പ്രാര്‍ഥനകള്‍ നടത്താവൂ എന്നോ തനിച്ച് നമസ്‌ക്കരിച്ചാല്‍ പ്രാര്‍ഥന ശരിയോവില്ലെന്നോ പ്രവാചകന്‍ പറഞ്ഞതായി റിപ്പോര്‍ട്ടില്ലെന്നും അധികൃതര്‍ വ്യക്തമാക്കി.
പ്രവാചകന്റെ കാലത്ത് കടകള്‍ അടച്ചിരുന്നില്ല
എന്നു മാത്രമല്ല, പ്രവാചകന്റെ കാലത്തോ അതിനു ശേഷമുള്ള നാല് ഖലീഫമാരുടെ കാലത്തോ പിന്നീട് വന്ന ഭരണാധികാരികളുടെ കാലഘട്ടങ്ങളിലോ ഒന്നും അഞ്ചു നേരത്തെ പ്രാര്‍ഥനാ വേളയില്‍ കടകള്‍ അടച്ചിട്ടതായി ചരിത്രപരമായ തെളിവുകളിലെന്നും ശൂറാ കൗണ്‍സില്‍ അംഗങ്ങള്‍ വാഗിക്കുന്നു. ഇതുമായി ബന്ധപ്പെട്ട് ഏതെങ്കിലും ഇസ്ലാമിക പണ്ഡിതന്മാര് ഫത്‌വ ഇറക്കിയതിനും തെളിവില്ല. ഇങ്ങനെ അഞ്ചു നേരം കടകള്‍ അടച്ചിടുന്നത് കൊണ്ട് ഉപഭോക്താക്കളായ പലര്‍ക്കും വലിയ പ്രയാസങ്ങള്‍ ഉണ്ടാവാന്‍ സാധ്യതയുണ്ടെന്നും വ്യാപാരികളെ സംബന്ധിച്ചിടത്തോളം അത് പ്രയാസകരമാണെന്നും ശുപാര്‍ശ അവതരിപ്പിച്ചവര്‍ ചൂണ്ടിക്കാട്ടി.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : businesses in saudi arabia may no longer need to close during prayer time
Malayalam News from malayalam.samayam.com, TIL Network
