800 കിലോ ചാണകം മോഷണം പോയി; കേസെടുത്ത് പോലീസ്

റായ്പുർ: മോഷണ വാർത്തകൾ രാജ്യത്തിന്‍റെ വിവിധ ഭാഗങ്ങളിൽ നിന്ന് പതിവായി റിപ്പോർട്ട് ചെയ്യാറുണ്ട്. എന്നാൽ അവയൊന്നും അത്രയേറെ ചർച്ചയാകാറില്ല. എന്നാൽ ഇപ്പോൾ ഛത്തീസ്ഗഡിൽ നിന്നും പുറത്തുവരുന്ന വാർത്ത ദേശീയ തലത്തിൽ തന്നെ ചർച്ചയാവുകയാണ്. കോർബ ജില്ലയിലെ ഒരു ഗ്രാമത്തിൽ നിന്നും 800 കിലോ ചാണകമാണ് കാണാതെ ആയിരിക്കുന്നത്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.



കോർബയിലെ ദിപ്ക പൊലീസ് സ്റ്റേഷനിൽ പരിധിയിൽ വരുന്ന ധുരേനയിലാണ് സംഭവം. 1600 രൂപയോളം വില വരുന്ന എണ്ണൂറ് കിലോ ചാണകം മോഷണം പോയെന്നാണ് പരാതി. മോഷണ വാർത്ത എഎസ്ഐ സുരേഷ് കുമാർ സ്ഥിരീകരിച്ചതായി വാർത്താ ഏജൻസിയായ എഎൻഐയാണ് റിപ്പോർട്ട് ചെയ്തത്.

കൊവിഡ് പോരാട്ടത്തിൽ യോഗ പ്രതീക്ഷയുടെ കിരണം; ലോകത്തിന് സുഖാശംസകള്‍ നേര്‍ന്ന് പ്രധാനമന്ത്രി

സംഭവത്തിൽ ഔദ്യോഗികമായി പരാതി ലഭിച്ചിട്ടുണ്ടെന്നും പോലീസ് പറഞ്ഞു. ‘ഗോദാൻ സമിതിയുടെ തലവനായ കംഹാൻ സിംഗ് കവാർ എന്നയാളാണ് ഇക്കഴിഞ്ഞ ജൂൺ 15ന് പരാതി നൽകിയത്’ ദിപ്ക എസ്എച്ച്ഒ ഹരീഷ് ടണ്ടേക്കർ മാധ്യമങ്ങളോട് പറഞ്ഞു.

Also Read : രാജ്യത്ത് പ്രതിദിന കൊവിഡ് ബാധ കുറഞ്ഞുതന്നെ; 24 മണിക്കൂറിനിടെ 53,256 കേസുകൾ



‘ഗോദാൻ ന്യായ് യോജന’ പദ്ധതിയുടെ ഭാഗമായി കമ്പോസ്റ്റ് നിർമ്മാണത്തിനായി സംസ്ഥാന സർക്കാർ രണ്ട് രൂപ നിരക്കിൽ ചാണകം ആളുകളിൽ നിന്നും വാങ്ങുന്നുണ്ട്. ഗ്രാമത്തില്‍ ഇതിനായി കന്നുകാലികളെ പ്രത്യേകമായി പാർപ്പിക്കുന്ന ഇടങ്ങൾ തന്നെയുണ്ട്.

ജൂൺ എട്ടിനും ഒന്‍പതിനും ഇടയ്ക്കാണ് മോഷണം നടതെന്നാണ് സൂചന. പരാതിയുടെ അടിസ്ഥാനത്തിൽ അജ്ഞാതർക്കെതിരെ കേസ് രജിസ്റ്റർ ചെയ്ത് പൊലീസ് അന്വേഷണം ആരംഭിച്ചു.