ജമ്മു കശ്മീരിലെ സോപൂരിൽ ഏറ്റമുട്ടൽ; മൂന്ന് ലഷ്കര്‍ ഭീകരരെ കൊലപ്പെടുത്തി സൈന്യം

ശ്രീനഗര്‍: ജമ്മു കശ്മീരിലെ സോപൂരിൽ ഭീകരരും സൈന്യവും തമ്മിൽ ഏറ്റുമുട്ടൽ. ഒരു ലഷ്കറെ തയ്ബ കമാൻഡര്‍ അടക്കം മൂന്ന് ഭീകരര്‍ സൈന്യത്തിൻ്റെ ആക്രമണത്തിൽ കൊല്ലപ്പെട്ടു. ഞായറാഴ്ച രാത്രിയിലാണ് ഏറ്റുമുട്ടൽ തുടങ്ങിയതെന്നും ജമ്മു കശ്മീര്‍ പോലീസും സിആര്‍പിഎഫും ഓപ്പറേഷനിൽ പങ്കെടുത്തുവെന്നും പോലീസ് അറിയിച്ചു.



മൂന്ന് പോലീസുകാരടക്കം ഏഴു പേരെ കൊലപ്പെടുത്തി കേസിലെ പ്രതിയായ മുദാസിര്‍ പണ്ഡിറ്റ് അടക്കമുള്ളവരാണ് കൊല്ലപ്പെട്ടതെന്ന് പോലീസ് അറിയിച്ചു. അടുത്തിടെ ഇയാളുടെ ആക്രമണത്തിൽ രണ്ട് കൗൺസിലര്‍മാരും രണ്ട് സാധാരണക്കാരും കൊല്ലപ്പെട്ടിരുന്നു. മൊത്തം മൂന്ന് ലഷ്കര്‍ ഭീകരര്‍ ആക്രമണത്തിൽ കൊല്ലപ്പെട്ടതായി പോലീസ് വാര്‍ത്താ ഏജൻസിയായ എഎൻഐയെ അറിയിച്ചു.

Also Read: അമ്മ മകനെ പീഡിപ്പിച്ചെന്ന പരാതി; കടയ്‌ക്കാവൂർ പോക്‌സോ കേസിൽ വഴിത്തിരിവ്

ജൂൺ 12ന് പോലീസ് ഉദ്യോഗസ്ഥരെ ലക്ഷ്യമിട്ടുള്ള ലഷ്കര്‍ ആക്രമണം സേനയ്ക്കുള്ളിൽ വലിയ പ്രതിഷേധത്തിന് ഇടയാക്കിയിരുന്നു. ഇതേത്തുടര്‍ന്ന് വടക്കൻ കശ്മീരിലെ സോപൂര്‍ മേഖലയിൽ സൈന്യം നിരവധി ഓപ്പറേഷനുകള്‍ നടത്തുകയും ചെയ്തിരുന്നു.

സോപൂര്‍ ടൗണിൽ സബ് ഇൻസ്പെക്ടര്‍ മുകേഷ് കുമാറിൻ്റെ നേതൃത്വത്തിലുള്ള സംഘം കൊവിഡ് 19 നിയന്ത്രണങ്ങള്‍ ഉറപ്പാക്കാൻ എത്തിയപ്പോഴായിരുന്നു ആക്രമണം നടന്നത്. ലഷ്കര്‍ ഭീകരരുടെ ആക്രമണത്തിൽ വസീം, ഷൗക്കത്ത് എന്നീ കോൺസ്റ്റബിള്‍മാര്‍ മരിച്ചതായും പോലീസ് അറിയിച്ചു.

Also Read: നവജാത ശിശുക്കളെ പോലും വിടാതെ ‘ഡെൽറ്റ’; 80 വയസിന് മുകളിലുള്ളവരിലും രോഗബാധ

സോപൂരിൽ സുരക്ഷാസൈനികരെയും സാധാരണക്കാരെയും ലക്ഷ്യമിട്ടു നടത്തിയ ആക്രമണത്തെ അപലപിക്കുന്നതായി ലഫ്റ്റനൻ്റ് ഗവര്‍ണര്‍ മനോജ് സിൻഹ അറിയിച്ചു. പരിക്കേറ്റവര്‍ എത്രയും വേഗം സുഖം പ്രാപിക്കട്ടെയെന്നും അദ്ദേഹം വ്യക്തമാക്കി.