വിസ്മയയുടെ മരണം; ഭർത്താവ് കിരൺ കസ്റ്റഡിയിൽ

കൊല്ലം: വിസ്മയ എന്ന യുവതി ഭർതൃഗൃഹത്തിൽ തൂങ്ങി മരിച്ച സംഭവത്തിൽ ഭർത്താവ് കിരണിനെ കസ്റ്റഡിയിലെടുത്ത് പോലീസ്. മോട്ടോർ വെഹിക്കിൾ ഇൻസ്പെക്ടറായ കിരണിനെ പോലീസ് ചോദ്യം ചെയ്യുകയാണ്. ഭർത്താവിൽ നിന്നും ക്രൂരമായ പീഡനമേറ്റതിനു പിന്നാലെയാണ് വിസ്മയ ജീവനൊടുക്കിയത്. കിരൺ പോലീസ് സ്റ്റേഷനിലെത്തി കീഴടങ്ങുകയായിരുന്നു.



Also Read: ‘സ്ത്രീധനം വേണ്ട; സ്ത്രീയാണ് ധനം’; കിരൺ കല്യാണാലോചനയ്ക്ക് വന്നപ്പോൾ പറഞ്ഞത്

യുവതിയുടെ ആത്മഹത്യയിൽ പോലീസ് ഇതുവരെ കേസെടുത്തിട്ടില്ല. മരണകാരണം വ്യക്തമായതിനു ശേഷമായിരിക്കും കേസ് രജിസ്റ്റർ ചെയ്യുക. വിസ്മയ മരിച്ചതിനു ശേഷം കിരൺ ഒളിവിലായിരുന്നു. യുവതിയുടെ സംസ്കാരം കഴിഞ്ഞ ശേഷമാണ് കിരൺ കീഴടങ്ങിയിരിക്കുന്നത്.

കൊല്ലം നിലമേൽ കൈതോട് സ്വദേശിയാണ് മരണപ്പെട്ട 24 കാരിയായ വിസ്മയ. സ്ത്രീധന പീഡനത്തെത്തുടർന്ന് മകളെ കൊലപ്പെടുത്തുകയായിരുന്നുവെന്നാണ് ബന്ധുക്കളുടെ പരാതി. 2020 മാർച്ചിലാണ് മോട്ടോർ വാഹന വകുപ്പ് ഉദ്യോഗസ്ഥനായ കിരണുമായി വിസ്മയയുടെ വിവാഹം നടന്നത്.

Also Read: ‘വിസ്മയയുടെ മരണത്തിൽ ഭർത്താവിന്റെ വീട്ടുകാർക്കും പങ്കുണ്ട്; അവർ കിരണിനെ തിരുത്തിയില്ല’

ഭർതൃവീട്ടിൽ വെച്ച് മർദ്ദനമേറ്റെന്ന് വ്യക്തമാക്കി വിസ്മയ ബന്ധുക്കൾക്ക് മെസേജ് അയച്ചിരുന്നു. പരിക്കിന്റെ ചിത്രങ്ങളും അയച്ചു നൽകി. ഇന്നു പുലർച്ചെയാണ് വിസ്മയ മരണപ്പെട്ട വിവരം വീട്ടുകാർ അറിഞ്ഞത്. സംഭവത്തിൽ വിശദമായ അന്വേഷണം നടത്തുമെന്ന് പോലീസ് പറഞ്ഞു. സംഭവത്തിൽ വനിതാ കമ്മീഷൻ സ്വമേധയാ കേസെടുത്തിട്ടുണ്ട്.